Romanos 5:1-21

  • Cristorayku Dioswan sumaq kausay kasqanmanta (1-11)

  • Adanwan wañuy paqarisqanmanta, Cristowantaq kausay kasqanmanta (12-21)

    • Juchawanmi wañuyqa lliuman chayaran (12)

    • Jujllan chanin ruwayqa (18)

5  Iñisqanchisraykutaq chaninpaq jap’isqa kanchis chayqa, Dioswan sumaqta kausashallasun Señorninchis Jesucristorayku.  Paypi iñisqanchisraykun juj ñan kicharikun ancha sumaq sonqo kayninta Dios rikuchiwananchispaq, chaytan kunanqa chaskishanchis; noqanchisqa Dios jatunchawananchistan suyakushanchis, chaymi kusisqa kashananchis.  Sasachakuykunapi tarikushaspapas kusikunallanchistaqmi; yachasqanchis jina, sasachakuykunaqa aguantaq kanapaqmi yanapawasun,  aguantaytaq Diospa sumaq qhawarisqan kanapaq, Diospa sumaq qhawarisqan kaytaq suyakuyta qowasun,  chay suyakuyqa manataqmi yanqachu; Diosqa qowasqanchis santo espirituwanmi munakuyninta rikuchiwanchis.  Juchasaparaq kashaqtinchismi Cristoqa Diosta mana manchakuqkunarayku señalasqa tiempopi wañuran.  Juj runa chaninña kanman chaypas, ñak’aytan pipas payraykuqa wañunman, juj allin runaraykuqa ichapaschá pipas wañunman.  Criston ichaqa juchasaparaq kashaqtinchis noqanchisrayku wañuran, chaywanmi Diosqa munakuyninta rikuchiwaranchis.  Chhaynaqa Cristoq yawarninraykun chaninpaq jap’isqa kanchis, chay yawarmi salvawasun Diospa k’araq phiñakuyninmantapas. 10  Diospa enemigon kashaqtinchistaq Churinpa wañusqanrayku paywan allipunakapuranchis chayqa, astawanraqmi paywan allipunasqaña kashaspanchisqa paypa kausasqanrayku salvasqa kasun. 11  Chaymantapas noqanchisqa kusisqan kashananchis Señorninchis Jesucristorayku Dioswan allinpi kasqanchismanta, paymi Diostawan noqanchistawanqa allipunachiwanchis. 12  Chhaynaqa, juj runallawanmi juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku. 13  Manaraq kamachikuy simi kashaqtinmi juchaqa kasharanña kay pachapi, ichaqa manan pitapas juchachakunmanchu kamachikuy simi mana kaqtinqa. 14  Chaywanpas wañuyqa Adanpa tiemponmantapachan Moisespa tiemponkama rey jina llapa runata kamachisharan, manaña Adán jinachu paykuna juchallikuranku chaypas. Adanqa pichus jamunan karan chay jinan karan. 15  Diospa qokuyninmi ichaqa mana imaynachus jucha jawa karan chhaynachu. Juj runallaq juchallikusqanraykun askha wañushanku, chhaynallataqmi juj runallaq ancha sumaq sonqo kayninrayku askha runakuna Diospa ancha sumaq sonqo kayninta gratislla qokuynintawan chaskishanku, chay runaqa Jesucriston. 16  Manallataqmi Diospa gratislla qokuyninqa imaynan juj runaq juchallikusqan jawa karan chhaynachu. Juj runallaq juchallikusqan jawan llapa runakuna juchachasqa karanku, ichaqa askha jucharayku Diospa qokuyninwanmi askha runakuna chaninpaq jap’isqa kanku. 17  Juj runaq juchanraykullan wañuyqa rey jina kamachikuran. Diospa ancha sumaq sonqo kaynin, chanin runa kananchispaq gratislla qokuynin iman ichaqa aswan jatunraq aswan allinraq. Chaykunata chaskiqkunaqa Jesucristoraykun kausanqaku, rey jinataq kamachikamunqakupas. 18  Chhaynaqa, juj jucharaykullataq imaymana clase runakuna juchachasqa karanku chayqa, juj chanin ruwayraykullataqmi imaymana clase runakuna chaninpaq jap’isqa kanqaku, chhaynapi kausayta chaskinankupaq. 19  Imaynan juj runallaq mana kasukusqanrayku askha runakuna juchasapa kapuranku, chhaynallataqmi juj runallaq kasukusqanrayku askha runakuna chaninpaq jap’isqa kapunqaku. 20  Kamachikuy simiqa rijurimuran runakuna sinchi juchasapa kasqankuta reparachinanpaqmi, ichaqa maypichus sinchi jucha kasqanpin Diospas astawanraq ancha sumaq sonqo kayninta rikuchin. 21  ¿Imaraykun chayta ruwan? Chaytaqa ruwan, imaynan juchawan wañuywan rey jina kamachiranku chhaynata Diospa ancha sumaq sonqo kayninpas rey jina chanin kaywan kamachinanpaqmi, chhaynapi Señorninchis Jesucristorayku runakuna wiñay kausayta chaskinankupaq.

Uraypi willakuykuna