Romanos 11:1-36

  • Israel llaqtaqa mana llapachu wijch’usqa kasqanmanta (1-16)

  • Olivo sach’amanta ejemplota churakun (17-32)

  • Diospa yachaynin may jatunpuni kasqanmanta (33-36)

11  Chhaynaqa, ¿nisunmanchu: “Diosqa wijch’upunmi llaqtantaqa”, nispa? ¡Manapunin! Noqapas Israel llaqtamantan kani, Abrahanpa mirayninmanta, Benjamín ayllumanta.  Diosqa manan wijch’unchu llaqtantaqa, aswanmi payqa ñaupaqmantaraq paykunata ajllakuran; icha, ¿manachu yachankichis imatachus Eliasmanta Diospa simin qelqa nisqanta? Paymi Israel llaqtaq contranpi Diosman willakuran:  “Jehová Diosníy, llapa profetaykikunatan wañuchipunku, altarniykikunatapas thunipunkun, noqallañan qhepani, chaymi noqatañataq maskhamuwashanku* wañuchiwanankupaq”, nispa.  Ichaqa, ¿ima nirantaq Diosri? “Qanchis waranqa runakunatan qhepachikuni, paykunaqa manan qonqorikunkuchu Baal diosmanqa”, nispan niran.  Kunan tiempopipas kallantaqmi llaqtanpiqa wakin qhepaqkuna, paykunatan Diosqa ajllakun ancha sumaq sonqo kayninpi.  Arí, paykunataqa ancha sumaq sonqo kayninpin ajllan, manan imatapas ruwasqankuraykuchu; imapas ruwasqankuraykuchus ajllasqa kankuman chayqa, manañachá Diospa ancha sumaq sonqo kayninraykuchu chayqa kanman.  Chhaynaqa, Israel llaqta runakunaqa wakillanmi tariranku imatachus tukuy sonqowan maskhasharanku chayta, paykunan karanku ajllasqakuna; wakinmi ichaqa mana uyariyta munarankuchu.  Paykunamantan Diospa simin qelqapas nin: “Diosmi paykunaq yuyayninta tutayachin misk’itapas puñushankuman jinata, paykunamanmi qon mana rikuq ñawita mana uyariq ninrita ima; paykunaqa kunankamapas chhaynan kashanku”, nispa.  Davidpas ninmi: “Mesankupas juj toqllaman, juj trampaman, urmachiq rumiman, castigonkuman ima tukuchun. 10  Ñawinkupas tutayachun amaña rikunankupaq, wasankupas k’umusqalla kachun”, nispa. 11  Chhaynaqa, ¿nisunmanchu: “Paykunaqa jujpaqkaman urmapuranku”, nispa? ¡Manapunin! Paykunaq urmasqankuraykun waj nacionkunamanta runakunaqa salvasqa kanku, chhaynapi paykuna phiñasqa kanankupaq. 12  Chhaynaqa, urmasqankuqa kay pachaq allinninpaqtaq karan, pisiyasqankupas waj nacionkunamanta runakunaq allinninpaqtaq karan chayqa, ¡imayna allinraqchá kanqa llapanku juñusqa kaqtinkuqa! 13  Kunanqa qankunamanñataqmi rimaykamusaykichis, waj nacionkunamanta kaq iñiqmasiykuna. Noqaqa waj nacionkunapaq apostolmi kani, chaymi ancha allinpaq Dios serviyniyta qhawarini, 14  chhaynapi imaynallamantapas llaqtamasiy runakunata phiñachispay paykunamanta wakillantapas salvanaypaq. 15  Paykuna wijch’usqa kasqankuraykutaq llapa runakuna Dioswan allipunakapuyta atinkuman chayqa, ¿imaynaraqtaq kanman paykuna chaskisqa kaqtinkuri? ¡Wañuymantapas kausarimpunkuman jinaraqmi kanman! 16  Chaymantapas, masamanta ñaupaq kaq orqosqaqa ch’uyataq chayqa, llapa masapas ch’uyallataqmi; sach’aq saphinchus ch’uya chayqa, k’allmankunapas ch’uyallataqmi. 17  Wakin k’allmakunan ichaqa wit’usqa karanku, chhaynapin qanqa k’ita olivo sach’aq k’allmanña karanki chaypas, huerta olivo sach’aman k’askachisqa karanki wakin k’allmankunawan kuska kanaykipaq, chaymi kunanqa qanpas chay sach’aq saphinmanta imaymana allinkunata chaskishanki. 18  Chayraykun mana pisichanaykichu chay wit’usqa k’allmakunataqa; manan qanchu saphimanqa kausayta qonki, aswanpas saphin qanman kausayta qoshasunki. 19  Yaqapaschá qanqa nishanki: “Chay sach’aman k’askachisqa kanaypaqmá riki wakin k’allmakunaqa wit’usqa karanku”, nispa. 20  Arí, chhaynan karan, paykunaqa mana iñisqankuraykun wit’usqa karanku, qanmi ichaqa iñisqaykirayku qaqata sayashanki. Chayrayku ama jatunchakuychu, aswanpas allinta cuidakuy. 21  Diosqa manataq kikin k’allmakunatapas jinallatachu qhawaran chayqa, qantapas manan jinallatachu qhawasunki paykuna jina imatapas ruwanki chayqa. 22  Chhaynaqa, yuyariy Diospa ancha sumaq sonqo kasqanta phiñakuq kasqantapas. Payqa juchaman urmaqkunapaqqa phiñakunmi, qantan ichaqa sumaq sonqowan qhawarisunki, chayrayku chhayna sumaq sonqollawan qhawarinasuykipaq jina kausay, mana chayqa wit’usqan qanpas kawaq. 23  Ichaqa paykunachus iñiyta qallarinkuman chayqa, paykunapas k’askachisqallataqmi kankuman olivo sach’amanqa, Diosqa atiyniyoqmi kikin sach’ankuman k’askachipunanpaq. 24  Qanpas k’ita olivo sach’amanta wit’usqa kaspan huerta olivo sach’aman k’askachisqa karanki, manaña chayta ruwakunchu chaypas; chhaynaqa, astawanraqchá riki kikin k’allmankunaqa chay sach’aman k’askachisqa kankuman. 25  Wayqe-panaykuna, ama “llapantan yachayku” nispa ninaykichispaqmi kay pakasqa ch’uya yachayta yachanaykichista munani: Israel llaqta wakin runakunan mana uyarikunkuchu, chayqa chhaynapunin kanqa waj nacionkunamanta Diospa ajllasqan runakuna junt’akunankama, 26  chhaynapin llapa Israel llaqta salvasqa kanqa. Diospa simin qelqapipas ninmi: “Sionmantan juj kacharichiq lloqsimunqa, jinan Jacobpa mirayninta mana allin ruwaykunamanta karunchachinqa. 27  Maypachachus juchankuta perdonasaq, chaypachan noqaqa paykunawan rimanakusaq”, nispa. 28  Paykunaqa allin willakuykunata mana uyarisqankuraykun Diospa enemigon kanku, chayqa allinniykichispaqmi, ichaqa ñaupa taytankuman prometekusqanraykun Diosqa paykunamanta wakinta ajllaran amigonkuna kanankupaq. 29  Diosqa manan pesapakunqachu imatapas qosqanmantaqa, ni pita wajasqanmantapas. 30  Qankunapas ñaupa tiempopiqa manan Diosta kasukurankichischu, kunanmi ichaqa khuyapayasqa kankichis paykuna mana kasukusqankurayku. 31  Chhaynaqa, paykunaq mana kasukusqankuraykun Diosqa qankunata khuyapayashasunkichis, chaymi kunanqa paykunapas khuyapayasqa kashanku. 32  Jinaspapas Diosqa lliu runatan mana kasukuq kasqankurayku presota jina rikun, chhaynapi llapankuman khuyapayakuyninta rikuchinanpaq. 33  ¡May jatunpunin Diospa qokuyninpas, yachayninpas, yuyayninpas! ¡Manapunin pipas llapantaqa yachanmanchu imachus piensasqantaqa, manataqmi pipas llapantaqa entiendenmanchu imachus ruwasqankunatapas! 34  “¿Pipas Jehová Diospa yuyayninta reqsinmanchu? ¿Pipas yuyaychaqnin kanmanchu?” 35  “¿Pipas payman ñaupaqta imatapas qonmanchu, chhaynapi pay kutichipunanpaq?” Manan ¿riki? 36  Aswanmi tukuy imapas paymanta jamun, payraykutaq kanpas, paypaqtaqmi kanpas. Chayrayku, payqa wiñay-wiñaypaq jatunchasqa kachun. Amén.

Uraypi willakuykuna

Chaypiqa “almaytañataq maskhamushanku” nillanmantaqmi.