Romanos 10:1-21

  • Imaynatachus Diospa allin qhawarisqan kanamanta (1-15)

    • Jujkunaman willana (10)

    • Jehová Diosta llapa wajakuqkunaqa salvasqan kanqaku (13)

    • Ima munaymi allin willakuykunata willaqkunaq chakinqa (15)

  • Allin willakuykunata mana uyarisqankumanta (16-21)

10  Wayqe-panaykuna, noqaqa tukuy sonqoywanmi munashani paykuna salvasqa kanankuta, chaytan Diosmantapas rogakushani.  Noqaqa allintan yachani tukuy sonqowan Dios serviy munasqankuta, ichaqa manan allintachu paymanta yachanku.  Paykunaqa manan yachankuchu ima ninchus Dios juj runa chanin kananpaq chayta, aswanpas munayninkuman jinallan chanin kayta munanku, manataq Diospa nisqanman jinachu.  Cristowanmi kamachikuy simiqa tukupun, chhaynapi pipas iñiqqa chanin kananpaq.  Kamachikuy simirayku chaninpaq jap’isqa kaymantan Moisés qelqaran: “Kamachikuy simita kasukuq runaqa chay kamachikuyraykun kausanqa”, nispa.  Ichaqa Diospa siminqa nillantaqmi runaqa iñisqanrayku chaninpaq jap’isqa kananta, khaynatan nin: “Aman sonqoykipi ninkichu: ‘¿Pitaq janaq pachatari wichanqa?’, nispaqa (chayqa ‘¿pitaq janaq pachatari wichanqa, chhaynapi Cristota uraykachimunanpaq?’ ninantan nin).  Aman: ‘¿Pitaq chinkay-chinkay ukhumanri jaykunqa?’, ninkipaschu (chayqa ‘¿pitaq chinkay-chinkay ukhumanri jaykunqa, chhaynapi Cristota wañusqanmanta kutichimunanpaq?’ ninantan nin)”, nispa.  Ichaqa, ¿ima nintaq Diospa siminri chaymanta? “Diospa siminqa ladoykipin kashan, simiykipi sonqoykipi iman kashan”, nispan nin; chay “simiqa” iñiywan chaskina simin, chay simimantan noqanchisqa willashanchis.  Simiykiwanchus runa qayllapi rimanki: “Jesusqa Señormi”, nispa, sonqoykiwantaqchus iñinki Diosqa wañusqamanta kausarichimusqanpi chayqa, salvasqan kanki. 10  Chanin kanapaqqa tukuy sonqowanmi iñina, salvasqa kanapaqtaq chay simimanta jujkunaman willana. 11  Diospa simin qelqapas ninmi: “Manan pipas paypi iñiqqa p’enqaypichu tarikunqa”, nispa. 12  Judío runakunawan griego runakunawanqa igual-llan kanchis, juj Señorllataqmi llapapaqpas kan; payqa llapa wajakuqninkunapaqmi qoykukuqllaña. 13  Chaymantapas “Jehová Diospa sutinta llapa wajakuqkunaqa salvasqan kanqaku”. 14  Ichaqa, ¿imaynatan wajakunkuman paypi mana iñishaspanku? ¿Imaynatan iñinkuman paymanta mana uyarishaspanku? ¿Imaynatan uyarinkumanpas paykunaman mana pipas willashaqtin? 15  ¿Imaynatan paykuna willankuman mana kachasqa kashaspa? Qelqasqa kasqanman jina, “¡ima munaymi allin willakuykunata willaqkunaq chakinqa!” 16  Chaywanpas, manan llapankuchu kasukuranku chay allin willakuykunataqa. Chaymi profeta Isaiaspas niran: “Jehová Diosníy, ¿pitaq iñiran imachus willasqaykupi?”, nispa. 17  Chhaynaqa, willasqata uyarispallan pipas iñin. Chay willakuytaqa uyarikun Cristomanta pipas rimallaqtinmi. 18  Ichaqa, ¿nisunmanchu: “Manan pipas chay willakuytaqa uyariranchu”, nispa? ¡Manapunin! Aswanpas chay “willakuyqa pachantinpin uyarikuran, kay pachaq k’uchunkunakamaraqmi chayaranpas”. 19  Chaywanpas, ¿nisunmanchu: “Israel runakunaqa manan yacharankuchu”, nispa? ¡Manapunin! Paykunaqa yacharankun. Moisespas niranmi: “Waj nacionkunawanmi phiñachisaykichis; mana yuyayniyoq nacionkunawanmi sonqoykichistaraq t’impurichisaq”, nispa. 20  Isaiaspas mana manchakuspan Diospa nisqanta niran: “Mana maskhawaqniykunawanmi tarichikurani, noqamanta mana tapurikuqniykunawanmi reqsichikurani”, nispa. 21  Israel runakunamantan ichaqa niran: “P’unchay ch’isiyaqtan makiyta jaywarimurani mana uyarikuq k’ullu llaqtaman”, nispa.

Uraypi willakuykuna