Mateo 16:1-28

  • Juj señalta rikuy munasqankumanta (1-4)

  • Fariseokunaq Saduceokunaq levaduranmanta (5-12)

  • Diospa gobiernonpa llavenkunamanta (13-20)

    • Iñiq t’aqaqa qaqa patapin jatarichisqa kashan (18)

  • Wañunanmanta Jesuspa willakusqan (21-23)

  • Cheqaq discípulo kaymanta (24-28)

16  Chaypin Jesusman achhuykuranku fariseokuna saduceokuna ima, pruebaman churayta munaspankutaq niranku: “Cielomantan juj señalta rikuyta munayku”, nispa.  Chaymi Jesusqa paykunata niran: “Ch’isinyashaqtin cielo nina puka kaqtinmi qankunaqa ninkichis: ‘Allin tiempon kanqa’, nispa;  tutamanta yana phuyu kaqtintaq ninkichis: ‘Kunanqa paranqan, chirinqan’, nispa. Chhaynatan qankunaqa cielota qhawarispa reparankichis imaynachus tiempo kanqa chayta. Chhaynaqa, ¿imaynapitaq mana atinkichischu kay tiempopi imakunachus pasasqanta reparaytari?  Diosta mana kasukuq* millay runakuna,* ¿señaltachu rikuyta munashankichis? Manan ima señaltapas rikunkichischu, aswanpas Jonasta imachus pasasqan milagrollan qankunapaqqa señal kanqa”, nispa. Chaykunata nispataq ripuran.  Chaymantataq discipulonkunaqa qocha chimpaman chimparanku, ichaqa qonqapusqakun t’anta apayta.  Jesustaq paykunata niran: “Allinta ñawiykichista kichariychis, cuidakuychistaq fariseokunaq saduceokunaq levaduranmanta”, nispa.  Chaymi paykunaqa ninakuranku: “T’antata mana apamusqanchisraykuchá chaytaqa niwashanchis”, nispa.  Chayta yachaspan Jesusqa niran: “Pisi iñiyniyoq runakuna, ¿imaraykun rimashankichis t’antata mana apamusqaykichismanta?  ¿Manachu reparankichisraq imamantachus rimashani chayta? ¿Manachu yuyarinkichis pisqa t’antallawan pisqa waranqa qharikunata mijuchiqtiy jayk’a canasta t’antatachus juñusqaykichista? 10  ¿Manallataqchu yuyarinkichis qanchis t’antallawan tawa waranqa qharikunata mijuchiqtiy jayk’a jatun canastakunatachus juñusqaykichista? 11  Noqaqa manamá t’antamantachu rimasharani, ¿imaynapitaq chaytari mana repararankichischu? Aswanpas rimasharani fariseokunaq saduceokunaq levaduranmanta cuidakunaykichispaqmi”, nispa. 12  Chayraqmi paykunaqa entienderanku mana t’antaq levaduranmantachu rimashasqanta, aswanpas fariseokunaq saduceokunaq yachachiyninmanta cuidakunankupaq rimashasqanta. 13  “Cesarea Filipo” nisqa llaqta ladoman chayaqtinkun Jesusqa discipulonkunata tapuran: “Runakunari, ¿pin ninkutaq runaq Churinmanta?”, nispa. 14  Paykunataq niranku: “Wakinqa ‘bautizaq Juanmi’ ninkun, wakintaq ‘Eliasmi’ ninku, wakintaq ‘Jeremiasmi’ ninku, wakinñataq ‘profetakunamanta jujninchá’ ninku”, nispa. 15  Jinan Jesusqa niran: “Qankunari, ¿pin niwankichistaq?”, nispa. 16  Jinan Simón Pedroqa niran: “Qanqa Criston kanki, kausaq Diospa Churin”, nispa. 17  Jesustaq payta niran: “Kusikuy, Jonaspa wawan Simón, manan runachu chaytaqa willarasunki, aswanpas janaq pachapi kaq Yayaymi. 18  Noqan niyki: Qanmi kanki Pedro, kay qaqa patapin iñiq t’aqayta jatarichisaq, manataqmi chaytaqa Sepulturaq* punkunpas atipanqachu. 19  Qanmanmi qosayki janaq pacha gobierno llavekunata, kay pachapi ima watasqaykipas ñan janaq pachapiqa watasqaña kanqa, kay pachapi ima paskasqaykipas ñan janaq pachapiqa paskasqaña kanqa”, nispa. 20  Jinaspan discipulonkunata allin-allinta kamachiran Cristo kasqanmanta ama pimanpas willanankupaq. 21  Chaymantapachan Jesusqa discipulonkunaman willayta qallariran Jerusalén llaqtaman rinanmanta, jinaspa kuraq runakuna, umalli sacerdotekuna, kamachikuy simita yachachiqkuna ima ñak’arichispa wañuchinankumanta, kinsa p’unchaymanta kausarichisqa kananmantawan. 22  Jinan Pedroqa waj ladoman pusaspa anyaran: “Señor, qan kikiykita khuyapayakuy, qanqa manapunin imaraykupas chhaynapiqa tarikunkichu”, nispa. 23  Jesustaq kutirispa Pedrota niran: “¡Manan uyarisaykichu, Satanás! Urmachiytan munawashanki, qanqa manan Dios jinachu piensanki, aswanpas runakuna jinallan piensanki”, nispa. 24  Jinaspan Jesusqa discipulonkunata niran: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta apaspa qhepayta jamushallachun. 25  Pipas vidanta* salvayta munaqqa chinkachinqan, pipas noqarayku vidanta chinkachiqtaq salvanqa. 26  Juj runachus kay pachapi tukuy imata tarinman, vidantataq chinkachinman chayqa, ¿ima allintaq paypaqri kanman? ¿Imatan runa qonman vidanrayku? 27  Runaq Churinqa angelninkunapiwanmi Yayanpa qhapaq atiy qosqanwan* jamunqa, jinan payqa sapankaman pagapunqa imachus ruwasqankuman jina. 28  Cheqaqtan niykichis: Kaypi sayashaqkunamanta wakinqa manapunin wañunqakuchu ñaupaqta runaq Churinta gobiernonpi jamushaqta rikunankukama”, nispa.

Uraypi willakuykuna

Chaypiqa “Diosta wasanchaq” nillanmantaqmi.
Chaypiqa “kay tiempo runakuna” nillanmantaqmi.
Griego rimaypiqa “Hadespa” ninmi.
Chaypiqa “almanta” nillanmantaqmi.
Chaypiqa “Yayanpa lliflli kayninwan” nillanmantaqmi.