Mateo 12:1-50

  • Jesús ‘sábado p’unchaypa Señornin’ kasqanmanta (1-8)

  • Makin ch’akisqa runa qhaliyachisqa kasqanmanta (9-14)

  • Diospa munasqa serviqninmanta (15-21)

  • Santo espirituwan supaykunata qarqokusqanmanta (22-30)

  • Mana perdonana juchamanta (31, 32)

  • Juj sach’aqa imayna rurusqanpi reqsisqa kasqanmanta (33-37)

  • Jonaspa señalninmanta (38-42)

  • Millay espíritu kutiqtin imachus pasananmanta (43-45)

  • Jesuspa mamanmanta wayqenkunamantawan (46-50)

12  Chay tiempopin Jesusqa sábado p’unchaypi chajra-chajranta purisharan. Discipulonkunataq yarqachikuspanku trigota p’itispa mijuyta qallariranku.  Fariseokunataq chayta rikuspa niranku: “¡Qhawariy! Discipuloykikunan sábado p’unchaypi mana ruwanata ruwashanku”, nispa.  Jesustaq niran: “¿Manachu leerankichis imatachus David ruwaran chayta? Runankunapiwan yarqasqa kashaspan  payqa Diospa wasinman jaykuran, jinaspa Diosman jaywasqa t’antata chaskikuspa chayta runankunapiwan mijuran, chay t’antaqa manan paykunaq mijunanpaqchu karan, aswanpas sacerdotekunallapaqmi karan.  ¿Manachu kamachikuy simipipas leerankichis sacerdotekunaqa sábado p’unchaypi templopi llank’ashaspapas mana juchayoq kasqankumanta?  Chaymi niykichis: Templomantapas aswan allin kaqqa kaypin kashan.  Diosmi niran: ‘Khuyapayakuq kanaykichistan munani, manan sacrificiokuna jaywawanaykichistachu’, nispa; chayta entiendewaqchis karan chayqa, manachá juchachawaqchischu karan mana juchayoqkunataqa.  Runaq Churinqa sábado p’unchaypa Señorninmi”, nispa.  Chaymanta ripuspataq paykunaq sinagoganman jaykuran, 10  chaypin kasharan jujnin makin ch’akisqa runa, jinan Jesusta tapuranku: “¿Allinchu kanman sábado p’unchaypi pitapas qhaliyachiy?”, nispa. Chaytaqa niranku imallamantapas juchachayta munaspan. 11  Jesustaq paykunata niran: “¿Mayqenniykichistaq juj ovejaykichis sábado p’unchaypi t’oqoman urmaykuqtin mana orqowaqchischu? 12  ¿Manachu runaqa ovejamantapas aswan valorniyoqraq? Chhaynaqa, allinmi sábado p’unchaypi allin kaqta ruwayqa”, nispa. 13  Chaymantataq chay runata niran: “Makiykita jaywarimuy”, nispa; paytaq makinta jaywariran, jinan makinqa juj kaq makin jina qhali kapuran. 14  Fariseokunataq chaymanta lloqsispa Jesusta wañuchinankupaq rimanakuranku. 15  Chayta yacharuspan Jesusqa chaymanta ripuran, askha runakunataqmi qatikurankupas, paytaq llapa onqosqakunata qhaliyachiran. 16  Paykunatan allin-allinta kamachiran ama pimanpas paymanta willanankupaq. 17  Chhaynapin junt’akuran profeta Isaiaspa willasqan, paymi niran: 18  “Kaymi ajllakusqay kamachiy, paytan munakuni, payqa sonqoypaq jinan.* Paymanmi espirituyta qosaq, paymi nacionkunaman yachachinqa imachus chanin kay kasqanta. 19  Manan piwanpas jap’inakunqachu, manan qaparkachanqachu, manataqmi pipas jatun ñankunapiqa paypa kunkanta uyarinqachu. 20  Manan q’ewisqa soqostapas sarurparinqachu, manataqmi q’osñishaq mechatapas wañuchinqachu chanin kayta allinta tajachinankama. 21  Paypa sutinpin nacionkuna suyakunqa”, nispa. 22  Jesusmanmi pusamuranku supaypa junt’aykusqan ñausa upa runata, Jesustaq payta qhaliyachiran, jinan chay runaqa rimaripuran qhawaripuran ima. 23  Llapan runakunataq ancha admirasqa ninakuranku: “¿Paychu icha Davidpa Churinqa kanpas?”, nispa. 24  Chayta uyarispan fariseokunaqa niranku: “Kayqa supaykunata kamachiq Beelzebubpa* atiyninwanmi supaykunata qarqon”, nispa. 25  Jesustaq paykunaq imachus piensasqankuta yachaspa niran: “Mayqen nacionpas t’aqanasqa kaspaqa tukukapunmanmi, mayqen llaqtapas mayqen familiapas t’aqanasqa kaspaqa chinkapunmanmi. 26  Chhaynaqa Satanaschus payllatataq qarqokunman chayqa, pay kikinmi t’aqanasqa kashanman, chhayna kaqtinqa, ¿imaynapitaq gobiernonri sayashallanman? 27  Noqachus Beelzebubpa atiyninwan supaykunata qarqoni chayqa, ¿piqpa atiyninwantaq qankunata qatikuq runakunari qarqonku? Chayraykun paykunaqa qankunata juzgasunkichis. 28  Ichaqa Diospa espiritunwanchus supaykunata qarqoni chayqa, Diospa gobiernonmi qonqaylla qankunaman chayaramun. 29  Chaymantapas, ¿imaynapitaq pipas juj kallpasapa runaq wasinta jaykuspa kaqninkunata qechunman manaraq chay kallpasapa runata watashaspa? Wataruspañan wasintaqa ch’usaqyachipunman ¿riki? 30  Pipas mana noqawanchu kashan chayqa, contraypin kashan, pipas mana noqawanchu juñuqqa ch’eqechishanmi. 31  ”Chayraykun niykichis: Runaqa ima juchanmantapas, pisichaspa k’amisqanmantapas perdonasqan kanqa; santo espirituta k’amiqmi ichaqa mana perdonasqachu kanqa. 32  Pipas runaq Churinpa contranpi rimaqqa perdonasqan kanqa, pipas santo espirituq contranpi rimaqmi ichaqa mana perdonasqachu kanqa, ni kay tiempopipas ni jamuq tiempopipas. 33  ”Allin sach’achus kankichis chayqa, allin rurutan rurunkichis; mana allin sach’achus kankichis chayqa, mana allin rurutan rurunkichis, sach’ataqa imayna rurusqanpin reqsikun. 34  Mach’aqway miraykuna, ¿imaynapin allin kaqkunata rimawaqchis millay sonqoyoq kashaspaykichis? Simiqa riman imachus sonqopi kashan chaytan. 35  Allin runaqa sonqonpi allin kaqkuna kasqanraykun allin kaqkunata riman; millay runan ichaqa, sonqonpi mana allin kaqkuna kasqanrayku millay kaqkunata riman. 36  Noqan niykichis: Runakunaqa juicio p’unchaypin* cuentata qonqaku tukuy yanqa kaqkuna rimasqankumanta. 37  Imachus rimasqaykimantan allinpaq jap’isqa kanki, imachus rimasqaykimantan juchachasqapas kanki”, nispa. 38  Jinan kamachikuy simita yachachiqkuna fariseokunapiwan Jesusta niranku: “Yachachikuq, juj señaltan qanmanta rikuyta munayku”, nispa. 39  Jesustaq paykunata niran: “Yau Diosta mana kasukuq* millay runakuna,* ¿señaltachu rikuyta munashankichis? Manan ima señaltapas rikunkichischu, aswanpas profeta Jonasta imachus pasasqan milagrollan qankunapaqqa señal kanqa. 40  Imaynan Jonaspas jatun challwaq wijsanpi kinsa p’unchay kinsa tuta karan, chhaynallataqmi runaq Churinpas allpaq sonqonpi kinsa p’unchay kinsa tuta kanqa. 41  Nínive llaqta runakunan kay tiempo runakunawan kuska juicio p’unchaypi jatarimunqaku, jinan kay tiempo runakunata juchachanqaku; paykunaqa juchankumantan pesapakuranku Jonaspa predicasqanwan. Qhawariychis, Jonasmantapas aswan jatun profetan kaypiqa kashan. 42  Uray ladomanta kaq reinan kay tiempo runakunawan kuska juicio p’unchaypi jatarimunqa, jinan kay tiempo runakunata juchachanqa; payqa kay pachaq k’uchunmantaraqmi jamuran Salomonpa yachaywan rimasqanta uyariq. Qhawariychis, Salomonmantapas aswan yachayniyoqmi kaypiqa kashan. 43  ”Juj millay espíritu juj runamanta lloqsispaqa ch’aki ch’inneqkunapin purin mayllapipas samaykunanpaq maskhaspa, mana tarispataq 44  nin: ‘Lloqsimusqay wasiman aswanpas kutipusaq’, nispa; wasiman chayaspataq ch’inta tarin, ichaqa allin pichasqata adornasqata ima. 45  Jinan payqa chaymanta rispa qanchis espiritukunatawan pusamun, paymanta aswan millaykunataraq, chay wasiman jaykuspankutaq chaypi tiyanku. Jinan chay runaqa ñaupaqpi imayna tarikusqanmantapas aswan mana allinpiraq tarikapun. Chhaynallataqmi kay tiempo millay runakunawanpas kanqa”, nispa. 46  Runakunaman Jesús rimaykushallaqtinraqmi mamanqa wayqenkunapiwan jamuranku, jinaspa jawapi kasharanku paywan rimayta munaspa. 47  Chaymi juj runa payman willaran: “Mamaykin wayqeykikunapiwan jawapi sayashanku qanwan rimayta munaspa”, nispa. 48  Paytaq willaqnin runata niran: “¿Pitaq mamayri, pikunataq wayqeykunapasri?”, nispa. 49  Discipulonkunaman makinta jaywarispataq niran: “Paykunan mamaypas wayqeykunapas. 50  Pipas janaq pachapi kaq Yayaypa munayninta ruwaqmi wayqeypas, panaypas, mamaypas”, nispa.

Uraypi willakuykuna

Chaypiqa “almaypaq jinan” nillanmantaqmi.
“Beelzebub” sutiqa Satanaspa juj kaq sutinmi.
Qhaway “explicasqa simikuna” nisqapi “juicio p’unchay” nisqata.
Griego rimaypiqa “Diosta wasanchaq” ninmi.
Chaypiqa “kay tiempo runakuna” nillanmantaqmi.