Marcos 8:1-38

  • 4.000 runakunata Jesuspa mijuchisqanmanta (1-9)

  • Juj señalta rikuy munasqankumanta (10-13)

  • Fariseokunaq, Saduceokunaq levaduranmanta (14-21)

  • Betsaidapi juj ñausa runaq qhaliyachisqa kasqanmanta (22-26)

  • Pedroq Jesusta “Criston kanki” nisqanmanta (27-30)

  • Wañunanmanta Jesuspa willakusqan (31-33)

  • Cheqaq discípulo kaymanta (34-38)

8  Chay p’unchaykunapin wajmanta askha runakuna chaypi kasharanku, manataq imapas mijunankupaq karanchu, jinan Jesusqa discipulonkunata wajaspa niran:  “Khuyapayanin kay runakunata, paykunaqa kinsa p’unchayñan noqawan kashanku, manataqmi imapas mijunankupaq kanchu.  Mana mijusqatachus wasinkuman kachapusaq chayqa, ñanpichá pisipapunkuman, wakinqa karu llaqtamantaraqmi kankupas”, nispa.  Discipulonkunataq niranku: “¿Maypitaq kay ch’inneqpiri khaytukuy runakunata sajsachinapaq t’antata tarimuykuman?”, nispa.  Jinan paykunata tapuran: “¿Jayk’a t’antaykichismi kashan?”, nispa. Paykunataq: “Qanchisllan kashan”, niranku.  Chaymi Jesusqa runakunata kamachiran pampapi tiyaykunankupaq. Chaymantataq qanchis t’antata jap’ispa Diosman graciasta qoran, phasmispataq discipulonkunaman jaywaran rakinankupaq, paykunataq runakunaman rakiranku.  Kallarantaqmi iskay kinsa challwachakunapas, Diosman graciasta qospataq discipulonkunata kamachiran chaykunatapas rakinankupaq.  Jinan sajsanankukama mijuranku, puchuq phasmikunatataq qanchis jatun canastakunapi junt’ata juñuranku.  Mijuq qharikunaqa tawa waranqa jinan karanku. Chaymantataq Jesusqa paykunata kachapuran. 10  Chay qhepallamanmi discipulonkunapiwan juj boteman seqaran, jinaspa Dalmanuta llaqta ladoman jaykuran. 11  Chaypin fariseokunaqa jamuspa Jesuswan discutiyta qallariranku, pruebaman churayta munaspankutaq niranku: “Rikuchiwayku cielomanta juj señalta”, nispa. 12  Jinan Jesusqa sonqonpi sinchita llakikuspa niran: “¿Imaraykun kay tiempo runakuna juj señalta rikuyta munashanku? Cheqaqtan nini: Manan ima señaltapas kay tiempo runakunamanqa rikuchisaqchu”, nispa. 13  Paykunata saqespataq Jesusqa wajmanta boteman seqaspa qocha chimpaman riran. 14  Discipulonkunan ichaqa qonqapusqaku t’anta apayta, chaymi botepiqa mana imapas mijunankupaq karanchu, juj t’antallan chaypiqa kasharan. 15  Jinan Jesusqa paykunata niran: “Allinta ñawiykichista kichariychis; cuidakuychis fariseokunaq levaduranmanta Herodespa levaduranmantawan”, nispa. 16  Chaymi paykunaqa t’antata mana apamusqankumanta tumpanakuyta qallariranku. 17  Chayta reparaspan Jesusqa paykunata niran: “¿Imaraykun tumpanakushankichis t’antata mana apamusqaykichismanta? ¿Manaraqchu reparankichis entiendenkichispas? ¿Rumiyasqaraqchu sonqoykichis kashan, chaychu mana entiendenkichis? 18  ‘Ñawiyoqña kashaspapas, ¿manachu rikunkichis? Ninriyoqña kashaspapas, ¿manachu uyarinkichis?’ ¿Manachu yuyarinkichis 19  pisqa t’antata pisqa waranqa qharikunapaq askhayachisqayta? ¿Jayk’a canasta junt’atan t’anta phasmikunata juñurankichis?”, nispa. Paykunataq: “Chunka iskayniyoq canastatan”, niranku. 20  Jesusqa nillarantaqmi: “Qanchis t’antata tawa waranqa qharikunapaq askhayachiqtiy, ¿jayk’a jatun canasta junt’atan t’anta phasmikunata juñurankichis?”, nispa. Paykunataq: “Qanchis canastatan”, niranku. 21  Jinan Jesusqa paykunata niran: “¿Manaraqchu entiendenkichis?”, nispa. 22  Betsaidaman chayaqtinkutaq Jesusman pusamuranku juj ñausa runata, jinaspa rogakuranku payta llamiykunanpaq. 23  Jinan Jesusqa chay ñausa runata makinmanta jap’ispa llaqta jawaman pusaran, ñawinkunaman thoqaykuspataq payman makinta churaykuran, jinaspa tapuran: “¿Imallatapas rikunkichu?”, nispa. 24  Jinan chay runaqa qhawakacharikuspa niran: “Runakunatan sach’ata jina rikushani, ichaqa purishaqta”, nispa. 25  Chaymi Jesusqa wajmanta chay runaq ñawinkunaman makinta churaykuran, jinan chay runaqa qhaliyapuran, allintataq tukuy imatapas rikupuran. 26  Chaymantataq wasinman kachapuran: “Aman kay llaqtamanqa jaykunkichu”, nispa. 27  Jinaspan Jesusqa discipulonkunapiwan “Cesarea Filipo” nisqa llaqtapi ayllukuna ladoman puririranku, ñanta rishaqtinkun qatikuqninkunata tapuran: “Runakunari, ¿pin niwankutaq?”, nispa. 28  Jinan paykunaqa niranku: “Wakinqa ‘bautizaq Juanmi’ ninkun, wakintaq ‘Eliasmi’ ninku, wakinñataq ‘profetakunamanta jujninchá’ ninku”, nispa. 29  Jesustaq paykunata tapuran: “Qankunari, ¿pin niwankichistaq?”, nispa. Jinan Pedroqa niran: “Qanqa Criston kanki”, nispa. 30  Jinaspanmi Jesusqa paykunata allin-allinta kamachiran ama pimanpas pichus kasqanta willanankupaq. 31  Chaymantataq paykunaman willayta qallariran* runaq Churinqa imaymanapi ñak’arinanmanta, kuraq runakunaq, umalli sacerdotekunaq, kamachikuy simita yachachiqkunaq pisichasqan kananmanta, wañuchisqa kananmanta, kinsa p’unchaymanta kausarimpunanmantawan. 32  Sut’itan paykunaman willaran chaykuna kananta. Chaymi Pedroqa payta waj ladoman pusaspa anyayta qallariran. 33  Jesustaq kutirispa discipulonkunata qhawaspa Pedrota anyaran: “¡Manan uyarisaykichu, Satanás! Qanqa manan Dios jinachu piensanki, aswanpas runakuna jinallan piensanki”, nispa. 34  Jinaspan runakunata discipulonkunatawan wajaspa niran: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta apaspa qhepayta jamushallachun. 35  Pipas vidanta* salvayta munaqqa chinkachinqan, pipas noqarayku allin willakuykunarayku ima vidanta chinkachiqmi ichaqa salvanqa. 36  Juj runachus kay pachapi tukuy imata tarinman, vidantataq chinkachinman chayqa, ¿ima allintaq paypaqri kanman? 37  Juj runa tukuy imantaña qonman chaypas, ¿atinmanchu vidan salvayta? 38  Pipas noqamanta rimasqaymantawan kay mana kasukuq* juchasapa runakuna* ukhupi p’enqakunqa chayqa, runaq Churinpas paymantaqa p’enqakullanqataqmi ch’uya angelninkunapiwan Yayanpa qhapaq atiy qosqanwan* kutimuspa”, nispa.

Uraypi willakuykuna

Griego rimaypiqa “yachachiyta qallariran” ninmi.
Chaypiqa “almanta” nillanmantaqmi.
Chaypiqa “Diosta wasanchaq” nillanmantaqmi.
Chaypiqa “kay tiempo runakuna” nillanmantaqmi.
Chaypiqa “Yayanpa lliflli kayninwan” nillanmantaqmi.