Marcos 7:1-37

  • Costumbreman jinalla imatapas ruwasqankumanta (1-13)

  • Sonqomanta imachus lloqsimuqmi runataqa qhellichan (14-23)

  • Fenicia llaqtayoq warmi allin iñiyniyoq kasqanmanta (24-30)

  • Roqt’u runa qhaliyachisqa kasqanmanta (31-37)

7  Jerusalén llaqtamantan jamuranku fariseokuna kamachikuy simita wakin yachachiqkunapiwan, jinaspa Jesusman juñukamuranku.  Paykunan Jesuspa wakin discipulonkunata rikuranku qhelli makinkuwan, arí, mana maqchisqa makinkuwan* mijushaqta.  (Fariseokunapas llapa judiokunapas kukuchunkukama* makinkuta maqchikuspallan mijunku, chhaynapin ñaupa runakunaq costumbrenman k’askakunku,  mercadomanta kutimuspapas manan mijunkuchu manachus maqchikunku chayqa; chaymantapas askha costumbrekunatawanmi chaskiranku, chaykunamanmi paykunaqa k’askakunku, chaymi copakunata, p’uyñukunata, cobremanta serviciokunatapas unuman challpunku.)  Chayraykun fariseokunapas kamachikuy simita yachachiqkunapas Jesusta tapuranku: “¿Imanaqtinmi discipuloykikuna mana ñaupa runakunaq costumbrenman jinachu ruwanku, aswanpas qhelli makintin mijunku?”, nispa.  Jinan Jesusqa paykunata niran: “Iskay uyakuna, sut’illantan profeta Isaiasqa qankunamanta qelqaran: ‘Kay runakunaqa simillankuwanmi “respetaykikun” niwanku, sonqonkutaq ichaqa noqamanta karupi kashan.  Yanqapaqmi adorawashanku, paykunaqa runakunaq kamachikusqallantan yachachinku’, nispa.  Qankunaqa Diospa kamachikuyninta saqerparispan runakunaq costumbrenman k’askakunkichis”, nispa.  Jesusqa nillarantaqmi: “Qankunaqa costumbreykichisman jina ruwanaykichisraykun mana reparachikuq jinalla Diospa kamachikuyninkunata saqerparinkichis. 10  Moisesmi niran: ‘Tayta-mamaykitan respetanki’, nispa. Nillarantaqmi: ‘Pipas taytanmantapas mamanmantapas millayta rimaqqa wañuchisqa kachun’, nispa. 11  Qankunan ichaqa ninkichis: ‘Pipas taytantapas mamantapas nillanmanmi: “Qanta yanapanaypaq imapas qonay kaqqa corbanmi”’, nispa (corbanqa “Diospaq ofrenda” ninantan nin). 12  Chhaynapin qankunaqa manaña imapipas taytantapas mamantapas yanapachinkichisñachu. 13  Chhaynapitaq Diospa siminta mana valeqman tukuchipunkichis yachachisqaykichis costumbrekunarayku. Maychá chhaynakuna ruwasqaykichisqa kashanpas”, nispa. 14  Wajmanta runakunata wajaspataq niran: “Llapallaykichis, uyariwaychis, jinaspa entiendeychis. 15  Runataqa manan siminman imapas jaykuqchu qhellichan, aswanpas siminmanta lloqsimuqmi qhellichan”, nispa. 16  *—— 17  Runakunata saqespa juj wasiman jaykuqtintaq discipulonkunaqa chay willasqanmanta tapuyta qallariranku. 18  Jinan Jesusqa paykunata niran: “¿Paykuna jinachu qankunapas mana entiendenkichis? ¿Manachu reparankichis tukuy imapas simiman jaykuqqa runata mana qhellichasqanta? 19  Simiman imapas jaykuqqa manan sonqomanchu jaykun, aswanmi wijsaman, jinaspa jisp’akunapi jisp’asqa kapun”, nispa. Chhaynapin rikuchiran llapa mijuykuna ch’uya kasqanta. 20  Jesusqa nillarantaqmi: “Imachus sonqonmanta lloqsimun chaymi runataqa qhellichan, 21  runaq sonqonmantan lloqsimun sinchi millay piensaykuna, qhelli jucha* ruwaykuna, suwakuykuna, runa wañuchiykuna, 22  jujwan pantaykuna, sinchi munapayaykuna, millay ruwaykuna, engañaykuna, mana p’enqarikuspa juchallikuykuna, envidiakuykuna, pisichaspa k’amiykuna, uma oqariykuna, mana yuyaywan ruwaykuna ima. 23  Llapan chay millay kaqkunan sonqomanta lloqsimuspa runataqa qhellichan”, nispa. 24  Chaymanta jatarispataq Jesusqa Tiro, Sidón llaqtakuna ladoman riran. Chayman chayasqanta mana pipas yachananta munaspan juj wasiman jaykuran, chaywanpas runakunaqa yacharurankupunin. 25  Jinan paymanta uyariruspa juj warmi jamuran, jinaspa ñaupanpi pampakama k’umuykuran. Paypa ususichanmanmi millay espíritu junt’aykusqa. 26  Chay warmiqa griego runakunaq mirayninmi karan, ichaqa Siria provinciapi kaq Fenicia llaqtapin tiyaran.* Paymi askha kutita Jesusta rogakuran ususinmanta supayta qarqonanpaq. 27  Jesustaq payta niran: “Ñaupaqtaqa wawakunaraq sajsaykuchunku, manan allinchu wawakunaq t’antanta uña alqochakunaman qoyqa”, nispa. 28  Paytaq niran: “Arí, wiraqocha, ichaqa uña alqochakunapas wawakunaq mesa ukhuman usuchisqan t’antataqa mijunkun”, nispa. 29  Jinaqtinmi Jesusqa payta niran: “Ripuy wasiykiman, chay nisqaykiraykun supayqa ususiykimanta lloqsipunña”, nispa. 30  Jinan warmiqa wasinman ripuspa erqechata puñunapi tariran, supaytaq paymanta lloqsipusqaña. 31  Tiro ladomanta kutimuspataq Jesusqa Sidón allpanta Decápolis* allpanta rispa inti lloqsimuy ladonta Galilea qochaman chayaran. 32  Chaypin* payman pusamuranku sasachakuspa rimaq roqt’u runata, jinaspa rogakuranku payman makinta churaykunanpaq. 33  Jinan Jesusqa runakunaq qayllanmanta sapaqllaman pusaspa dedonkunata ninrinman winaykuran, chaymantataq dedonman thoqaykuspa chay runaq qallunta tupaykuran. 34  Cielota qhawarispataq ukhumanta samarispa niran: “Efata”, nispa. Chayqa “kichakuy” ninantan nin. 35  Jinan chay runaq ninrinqa kicharikuran, qallunpas paskarikuran, allintataqmi rimaytapas qallariran. 36  Jesustaq runakunata kamachiran ama pimanpas chayta willanankupaq, paykunataq ichaqa chhaynata kamachishaqtinpas astawanraq willaqku. 37  Paykunaqa anchata admirakuspan niranku: “Tukuy imatapas allintapunin ruwan. Roqt’ukunatapas uyarichinmi, mana rimay atiqkunatapas rimarichinmi”, nispa.

Uraypi willakuykuna

Chay maqchikuyqa judío runakunaq costumbrenkuman jina ch’uyanchakuymi karan.
Kukuchutaqa “moqlli, maki moqo, otaq codo” nillankutaqmi.
Kay versiculoqa manan rijurinchu “Westcott, Hort” nisqa griego qelqakunapi, nitaq wakin allin reqsisqa qelqakunapipas.
Qhaway “explicasqa simikuna” nisqapi “qhelli jucha” nisqata.
Chaypiqa “naceran” nillanmantaqmi.
Qhaway “explicasqa simikuna” nisqapi “Decápolis” nisqata.
Chayqa karan Decápolis allpapi Jesús kashaqtinmi.