Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Marcos 5:1-43

KAYKUNAN KASHAN

  • Supaykunata khuchikunaman qatiykusqanmanta (1-20)

  • Jairoq ususinmanta, juj warmi Jesuspa p’achanta llamiykusqanmantawan (21-43)

5  Jinan paykunaqa qocha chimpaman chayaranku, Gerasa runakunaq llaqtanman.  Jesús botemanta lloqsiqtin jinataq panteón ukhumanta millay espirituq junt’aykusqan runa paywan tupaq jamuran.  Chay runaqa panteón ukhupin tiyaq, manan pipas watayta atiqchu ni cadenakunawanpas.  Askha kutitaña chakinta makinta cadenakunawan wataranku chaypas, payqa cadenakunatapas p’itirpariqmi, chaymi mana pipas atipayta atiqchu.  Tuta-p’unchaytaqmi panteonpipas orqokunapipas qaparkachaspa puriq, rumikunawantaq kuchukuqpas.  Karullamantaraq Jesusta rikuruspataq phawaylla rispa payman k’umuykuran.  Jinaspa qapariran: “¿Iman noqawan ruwanayki, ancha jatun Diospa Churin Jesús? Diosrayku jurapuway ama ñak’arichiwanaykipaq”, nispa.  Chaytaqa niran: “Lloqsiy chay runamanta, millay espíritu”, nispa Jesús nisqanraykun.  Chaymantataq Jesusqa tapuran: “¿Iman sutiyki?”, nispa. Paytaq niran: “Waranqa-waranqan sutiyqa,* askha kasqaykurayku”, nispa. 10  Jinan Jesusta askha kutita rogakuran paykunata ama chay llaqtamanta qarqonanpaq. 11  Chaypin juj orqopi askhallaña khuchikuna mijusharanku. 12  Jinan chay espiritukunaqa rogakuranku: “Khuchikunaman kachawayku, chaykunaman jaykunaykupaq”, nispa. 13  Jesustaq kachallaran, chaymi chay millay espiritukunaqa lloqsispa khuchikunaman jaykuranku, jinan t’aqantin khuchikunaqa phawarispa qochaman urmaykuranku, chaypin unuwan jeq’epaspa llapanku wañuranku, chay khuchikunaqa iskay waranqa jinan karan. 14  Khuchi michiqkunataq chaymanta ayqekuspa llaqtapi campokunapi ima willakamuranku, jinan runakunaqa jamuranku imachus pasasqanta rikunankupaq. 15  Chaymi Jesuspa kasqanman chayamuspanku waranqa-waranqa* supaykunaq junt’aykusqan runata rikuranku p’achasqa tiyashaqta, yuyayninpi kashaqta ima, jinan paykunaqa mancharikuranku. 16  Chaykunata rikuq runakunapas willarankun supaykunaq junt’aykusqan runawan khuchikunawanpas imachus pasasqanta. 17  Chaymi llapanku Jesusta rogakuyta qallariranku llaqtankumanta ripunanpaq. 18  Boteman Jesús seqaqtinmi supaykunaq junt’aykusqan runaqa paywan ripunanpaq rogakuran. 19  Jesusmi ichaqa mana munaranchu, aswanmi niran: “Phaway wasiykita ripuy, jinaspa familiaykikunaman willamuy imatachus Jehová Dios qanpaq ruwapusqasuykimanta, khuyapayasqasuykimantawan”, nispa. 20  Jinan chay runaqa chaymanta ripuspa Jesuspa tukuy ima ruwapusqanmanta Decápolis* llaqtantinpi willayta qallariran, jinan lliu runakuna anchata admirakuranku. 21  Wajmantan Jesusqa botepi qocha chimpaman chimparan, jinan ancha askha runakuna payman juñukamuranku qocha patallapiraq kashaqtin. 22  Chayllamanmi jamuran sinagogapi jujnin umalli, Jairo sutiyoq runa, jinaspan Jesusta rikuspa ñaupanpi pampakama k’umuykuran, 23  askha kutitataq rogakuran: “Ususichaymi sinchi onqosqa kashan,* jamuy, llamiykampuway, chhaynapi qhaliyapuspa kausananpaq”, nispa. 24  Jinan Jesusqa paywan kuska riran, runakunapas askhan qhepanta riranku, jinaspa payta k’iskiykuranku. 25  Chaypin juj warmi kasharan chunka iskayniyoq wataña yawar apaywan onqoshaq, 26  payqa askha doctorkunawan jampichikuspan sinchita ñak’arisqa, tukupusqañan lliu imaymanantapas, manataq qhaliyasqachu, aswanpas astawanraqmi onqopusqa. 27  Jesusmanta rimasqankuta uyarispan payqa runa-runa ukhunta qhepallanmanta achhuykuspa Jesuspa jawa p’achanta llamiykuran. 28  Paymi nisqaña: “Jawa p’achallantapas llamiyrusaq chayqa, qhaliyarusaqmi”, nispa. 29  Jinan kaq rato yawar apayninqa ch’akirapuran, paytaq cuerponpi reparakuran chay ñak’arichiq onqoymanta qhali kapusqanta. 30  Jesuspas kaq raton reparakuran paymanta atiy lloqsisqanta, chaymi kutirispa niran: “¿Pin p’achayta llamiyramuwan?”, nispa. 31  Discipulonkunataq niranku: “¿Khaytukuy runakuna qanman k’iskipakamushaqtinchu ninki: ‘Pin llamiyramuwan’, nispa?”, nispanku. 32  Jesustaq muyuriqninta qhawariran pichus llamiykuran chayta rikunanpaq. 33  Chay warmitaq imachus paywan pasasqanta yachaspa, mancharisqa khatatatasparaq Jesusman achhuykuran, ñaupanpi qonqoriykuspataq lliuta willakuran. 34  Jinan Jesusqa niran: “Ususilláy, iñiyniykin qhaliyachisunki, ama llakikuspalla ripuy, qhaliñan kapunki chay ñak’arichiq onqoyniykimantaqa”, nispa. 35  Jesús rimashallaqtinraqmi sinagogapi umalli runaq wasinmanta wakin runakuna jamuranku, jinaspa niranku: “¡Ususiykiqa wañurapunñan! ¿Imapaqñan yachachikuqta sayk’uchiwaq?”, nispa. 36  Jesustaq chay nisqankuta uyarispa sinagogapi umallita niran: “Ama manchakuychu, iñillay qanqa”, nispa. 37  Jinaspan Pedrota, Santiagota, Santiagoq wayqen Juantawan pusarikuran; payqa manan munaranchu jujkunaq rinantaqa. 38  Sinagogapi umalliqpa wasinman chayaspankun Jesusqa rikuran chaypi runakuna ch’aqwashaqta, waqashaqta, qaparkachashaqta ima. 39  Jinan payqa jaykuspa niran: “¿Imanaqtinmi waqashankichis ch’aqwashankichispas? Sipaschaqa manan wañunchu, puñushallanmi”, nispa. 40  Chayta niqtinmi paykunaqa Jesusta pisichaspa asipayayta qallariranku. Jesustaq llapankuta jawaman lloqsichispa chay sipaschaq taytanwan, mamanwan, paywan kaqkunallapiwan sipaschaq kasqanman jaykuran. 41  Jinan makinmanta jap’ispa niran: “Talita kumi”, nispa. Chayqa “sipascha, ¡jatariy!” ninantan nin. 42  Chaymi sipaschaqa kasqan rato jatarispa purikachayta qallariran (payqa chunka iskayniyoq watayoqmi karan). Chaywanmi tayta-mamanqa anchatapuni admirakuspa kusikuranku. 43  Jesusmi ichaqa chunkay-chunkaytaraq paykunata kamachiran amapuni pimanpas chayta willanankupaq, kamachillarantaqmi chay sipaschaman mijuchinankupaqpas.

Uraypi willakuykuna

Griego rimaypiqa “legionmi sutiyqa” ninmi. Ñaupa Roma llaqtapiqa juj legionpin kaq 4.000 otaq 6.000 jina soldadokuna.
Qhaway Mr 5:9 textopi willakuyta.
Qhaway “explicasqa simikuna” nisqapi “Decápolis” nisqata.
Chaypiqa “wañuy patapiña kashan” nillanmantaqmi.