Lucas 15:1-32

  • Chinkasqa ovejamanta (1-7)

  • Chinkasqa dracma qolqemanta (8-10)

  • Chinkasqa churimanta (11-32)

15  Impuesto cobraqkunapas juchasapa runakunapas llapankun Jesusmanqa achhuykushallaranku uyarinankupaq.  Chaymi fariseokunapas kamachikuy simita yachachiqkunapas rimapakuyta qallariranku: “Kay runaqa sumaqtan chaskin juchasapakunata, paykunawantaqmi mijunpas”, nispa.  Jinan Jesusqa juj ejemplota paykunaman churaran:  “¿Mayqenniykichistaq pachaj ovejayoq kashaspa jujnin chinkaqtin, isqon chunka isqonniyoqta ch’inneqpi saqeykuspa, mana chay chinkasqa ovejata maskhaq rinmanchu tarimunankama?  Tarispaqa much’un patapi apamuspan anchata kusikun.  Wasinman chayaspataq amigonkunata wasimasinkunatawan juñuspa nin: ‘Noqawan kuska kusikuychis, chinkasqa ovejaytan tariramuni’, nispa.  Niykichismi: Chhaynallataqmi janaq pachapipas aswan kusikuy kanqa juj juchasapaq pesapakusqanmanta, isqon chunka isqonniyoq allin runakunamantaqa, paykunaqa manañan necesitankuchu juchankumanta pesapakuyta.  ”Pi warmipas chunka dracma qolqenmanta jujninta chinkachispaqa, ¿manachu mecherota jap’ichispa wasinta pichanman, jinaspa allinta maskhanman chay qolqeta tarinankama?  Tarispaqa amigankunata wasimasinkunatawan juñuspan nin: ‘Noqawan kuska kusikuychis, chinkachisqay dracma qolqetan tariruni’, nispa. 10  Niykichismi: Chhaynallataqmi Diospa angelninkunapas anchata kusikunku juj juchasapaq pesapakusqanmanta”, nispa. 11  Chaymantataq Jesusqa niran: “Juj runaqmi karan iskay qhari wawankuna. 12  Sullk’a kaqmi taytanta niran: ‘Papáy, kaqniykikunamanta tupaqniyta qopuway’, nispa. Jinan chay runaqa kaqninkunata paykunaman rakipuran. 13  Pisi p’unchaykunamantataq sullk’a kaq wawanqa llapa imachus tupaqninta apakapuspa juj lado nacionman ripuran, chaypitaq munasqanman jina mana allinta kausaspa llapa kaqninkunata tukupuran. 14  Chaymantataq jatun yarqay chay llaqtantinpi karan, jinan paypas yarqaypi rikukuran. 15  Chaymi payqa chay llaqtapi juj runaqta llank’apakuq riran, jinan chay runaqa camponman kacharan khuchinkunata michinanpaq. 16  Chaypin payqa khuchikunaq mijunantaraq mijuyta munaq, manataq pipas imallatapas qoqchu. 17  ”Chaymi yuyayman kutispa niran: ‘¡Taytaypa llapa llank’apakuqninkunaqa puchu-puchu mijunayoqraqmi kashanku, noqataq ichaqa kaypi yarqaymanta wañushaniña! 18  Sayarispa taytayman kutipusaq, jinaspa nisaq: “Papáy, janaq pachapi kaq Dios contra, qan contra iman juchallikuni. 19  Manañan ‘wawáy’ niwanaykipaq jinañapaschu kani, jujnin llank’apakuqniykita jinallaña chaskiykuway”’, nispa. 20  Jinan sayarispa taytanman ripuran. Taytantaq karullapiraq kashaqtin payta rikuran, jinaspa mayta khuyapayaykuspa payman phawariran, abrazaykuspataq much’aykuran. 21  Jinan payqa taytanta niran: ‘Papáy, janaq pachapi kaq Dios contra, qan contra iman juchallikuni. Manañan ‘wawáy’ niwanaykipaq jinañachu kani’, nispa. 22  Taytantaq ichaqa kamachinkunata niran: ‘Pampakama chayaq aswan allin kaq p’achata usqhaylla orqomuychis, jinaspa chaywan p’achachiychis, makinmanpas anillota churaychis, chakinmanpas usut’ata churaychis. 23  Chaymantapas wirayachisqa malta torota apamuspa nak’aychis, jinaspa mijusunchis kusirikusunchis ima; 24  kay wawayqa wañusqan kasharan, kausarimpuntaq; chinkasqan kasharan, tarisqataq kapun’, nispa. Jinan kusikuyta qallariranku. 25  ”Kuraq kaq wawanqa chajrapin kasharan, chaymanta kutimuspa wasiman qayllaykamusqanman jinan tocaqta tusuqta ima uyariran. 26  Chaymi jujnin kamachita wajaspa tapuran: ‘¿Iman kashan?’, nispa. 27  Jinan payqa niran: ‘Wayqeykin kutimpusqa, qhalillataqmi kashanpas, chaymi taytayki wirayachisqa malta torota nak’achispa fiestata ruwachishan’, nispa. 28  Jinan payqa sinchita phiñakuspa mana jaykuyta munaranchu. Chaymi taytanqa lloqsimuspa jaykunanpaq rogaran. 29  Paytaq taytanta niran: ‘Khaytukuy watakunañan kamachi jinaraq qanpaq llank’ashani mana juj kutillapas kamachikuyniykikunata p’akispa, chaywanpas qanqa manan jayk’aqpas juj cabrachallatapas qowarankichu amigoykunawan kusirikunaypaq. 30  Ichaqa, qhellipi kausaq warmikunawan purispa kaqniykikunata tukuq wawayki chayamuqtintaq, wirayachisqa malta torotaraq nak’arachipusqanki’, nispa. 31  Taytantaq niran: ‘Wawáy, qanqa noqawanpunin kashanki, tukuy imaypas qanpan. 32  Kay wayqeykin ichaqa wañusqa kashaspa kausarimpun, chinkasqa kashaspa tarisqa kapun; chaymi kusirikunanchis’”, nispa.

Uraypi willakuykuna