Juan 4:1-54

  • Jesusmanta Samaria llaqtayoq warmimantawan (1-38)

    • ‘Espirituwan cheqaq kaywan iman’ Diostaqa adorana (23, 24)

  • Askha Samaria runakuna Jesuspi iñipusqankumanta (39-42)

  • Juj runaq wawanta Jesuspa qhaliyachisqanmanta (43-54)

4  Fariseokunan uyarisqaku: “Jesusta qatikuqkunaqa Juanpamantaqa astawanmi askhayashan, aswan askha runakunatan payqa bautizashanpas”, nispa niqta. Chaytan Señorqa yacharuran.  (Manan kikin Jesuspunichu bautizaqqa, aswanpas discipulonkunan bautizaqku.)  Chaymi Judeamanta lloqsispa wajmanta Galileaman riran.  Ichaqa Samariantan pasanan karan.  Jinan chayaran Samariapi “Sicar” nisqa llaqtaman, wawan Joseman Jacobpa qosqan allpa qayllaman.  Chaypin kasharan Jacobpa pozon. Jesusqa purimusqanpin sayk’usqa kasharan, chaymi chay pozoq ladonpi tiyaykuran. Chay ratoqa las doce jinan kasharan.*  Chayllamanmi Samaria llaqtayoq warmi jamuran unu orqoq. Jinan Jesusqa niran: “Juj chikan unuta qoykuway ujanaypaq”, nispa.  (Discipulonkunaqa llaqtatan jaykusqaku mijuna rantiq.)  Jinan chay Samaria llaqtayoq warmiqa payta niran: “¿Imaynapitaq qanri judío runa kashaspa noqa Samaria warmimanta unuta mañakuwanki?”, nispa. (Judío runakunaqa manan rimanakunkuchu Samaria runakunawanqa.) 10  Jesustaq niran: “Sichus Diospa gratislla qokuyninta reqsiwaq, ‘juj chikan unuta qoykuway ujanaypaq’ niqniykitapas reqsiwaq chayqa, qanchá paymanta unuta mañakuwaq karan, paytaq kausay qoq unuta qoykusunkiman karan”, nispa. 11  Jinan warmiqa niran: “Wiraqocha, manamá unu orqonaykipaq imallaykipas kanchu, jinaspapas kay pozoqa ukhumá kakun. ¿Maymantataq chay kausay qoq unutari qowankiman? 12  Qanqa manamá ñaupa taytayku Jacobmantaqa kuraqchu kanki. Paymi kay pozotaqa saqewaranku, kay pozomantan paypas, wawankunapas, uywankunapas unuta ujaranku”, nispa. 13  Chaymi Jesusqa payta niran: “Pipas kay unumanta ujaqqa wajmantan ch’akichikunqa. 14  Noqa qosaq chay unuta ujaqmi ichaqa manaña jayk’aqpas ch’akichikunqachu, aswanmi chay qosqay unuqa phullpumuq puju jina paypi kanqa, chhaynapin chay unuqa wiñay kausayta qonqa”, nispa. 15  Chaymi warmiqa niran: “Wiraqocha, qoykuway chay unuta, chhaynapi amaña ch’akiwananpaq, ni kaymanpas unu orqoq jamushanaypaq”, nispa. 16  Jinaqtinmi Jesusqa niran: “Phaway, qosaykita wajaramuy”, nispa. 17  Warmitaq: “Manan qosayqa kanchu”, niran. Jinan Jesusqa niran: “Sut’illantan nishanki: ‘Manan qosayqa kanchu’, nispaqa. 18  Ichaqa pisqa qosayoqmi karanki ¿riki?, kunan qanwan tiyaq runan ichaqa mana qosaykichu, chhaynaqa sut’illantan chaytaqa nishanki”, nispa. 19  Chaymi warmiqa niran: “Wiraqocha, qanqa profetamá kasqanki. 20  Ñaupa taytaykuqa kay orqopin Diosta adoraranku, qankunataq: ‘Jerusalenpin Diostaqa adorana’, ninkichis”, nispa. 21  Jinan Jesusqa niran: “Cheqaqtan niyki: Tiempon chayamunqa, chaypachaqa manan kay orqopichu ni Jerusalenpipaschu Yayataqa adorankichis. 22  Qankunaqa mana reqsisqaykichistan adorankichis, noqaykun ichaqa reqsisqaykuta adorayku; salvasqa kayqa judío runakunawanmi qallarin. 23  Ichaqa tiempon chayamushanña, kunantaqmi qallarishanpas, chaypachan cheqaq adoraqkunaqa Yayata adoranqaku espirituwan cheqaq kaywan ima; Yayaqa chhayna kaqkunatapunin maskhan payta adoranankupaq. 24  Diosqa espiritun, chaymi payta adoraqkunaqa espirituwan cheqaq kaywan ima adorananku”, nispa. 25  Warmitaq niran: “Noqaqa yachanin ‘Cristo’ nisqa Mesías jamunanta. Paymi chayamuspa tukuy imatapas sut’itapuni willawanqaku”, nispa. 26  Chaymi Jesusqa niran: “Noqa rimapayaqniykin chay runaqa kani”, nispa. 27  Chayllamanmi discipulonkunaqa chayaramuranku, jinaspa admirakuranku chay warmiwan rimashaqta rikuspa. Ichaqa manan mayqenpas niranchu: “¿Imanaqtinmi paywan rimashanki?”, nispaqa, ni “¿imatan chay warmi munan?”, nispapas. 28  Warmitaq unu p’uyñunta saqerparispa llaqtata phawaran, chaypin runakunata niran: 29  “Jamuychis, tukuy ima ruwasqaykunata niwaq runata rikuchimusaykichis. Paychus jina Cristoqa kanman”, nispa. 30  Jinan paykunaqa llaqtamanta lloqsispa Jesusman riranku. 31  Chaykamataq discipulonkunaqa Jesusta nisharanku: “Yachachikuq, mijuy”, nispa. 32  Jinan Jesusqa paykunata niran: “Kashanñan mijunayqa, qankunaqa manan yachankichischu imachus chay kasqanta”, nispa. 33  Chaymi discipulonkunaqa ninakuranku: “¿Pitaq mijunatari aparamunman karan?”, nispa. 34  Jesustaq paykunata niran: “Mijunayqa kachamuwaqniypa munayninta ruwaymi, qowasqan llank’aytapas tukunaykama junt’aymi. 35  Qankunan ninkichis: ‘Tawa killaraqmi cosechapaqqa kashan’, nispa; noqan ichaqa niykichis: Qhawariychis chajrakunata, yuraqñan kashan cosechanapaq. Ñan 36  rutuqqa pagonta chaskishanña, cosecha rurutapas wiñay kausaypaq oqarishanña, chhaynapi t’akaqwan rutuqwan kuska kusikunankupaq. 37  Chhaynapin: ‘Jujninmi t’akaq, jujnintaq rutuq’, nisqa rimayqa cheqaqpuni. 38  Noqan kacharaykichis mana llank’asqaykichis chajramanta rutunaykichispaq. Jujkunan llank’arankuqa, qankunataq chay llank’aqkunaq ruwasqanmanta allinkunata chaskinkichis”, nispa. 39  Chay warmiq: “Tukuy ima ruwasqaykunatan nimuwan”, nispa willasqanta uyarispan chay llaqtamanta askha Samaria runakuna Jesuspi iñiranku. 40  Chaymi chay Samaria runakunaqa payman jamuspa valekuranku paykunawan qhepakunanpaq, jinan Jesusqa iskay p’unchay chaypi qhepakuran. 41  Rimasqanta uyarispan aswan askha runakunaraq paypi iñiranku, 42  jinaspan chay warmita niranku: “Manañan qanpa nisqaykiraykullachu iñiyku, noqayku kikiykupunin paytaqa uyariyku, chaymi yachayku payqa kay pacha runakunata salvaqpuni kasqanta”, nispa. 43  Chay iskay p’unchay qhepatataq Jesusqa chay llaqtamanta lloqsispa Galileaman ripuran. 44  (Jesuspunin niran: “Profetaqa kikin llaqtanpin mana respetasqachu”, nispa.) 45  Galileaman chayaqtinmi chay llaqtayoq runakunaqa sumaqta chaskiranku, paykunaqa Jerusalenpi fiestaman rispan Jesuspa imaymana ruwasqanta rikumusqaku. 46  Jesusqa wajmantan Galileapi Caná llaqtaman riran, unuta vinoman tukuchisqan llaqtaman. Reyta serviq juj runaq qhari wawanmi Capernaum llaqtapi onqosqa kasharan. 47  Chay runan yacharuran Judeamanta Galileaman Jesuspa jamusqanta, chaymi Jesusman riran, jinaspa rogakuran wasinman uraykuspa wawanta qhaliyachinanpaq; wawanqa wañuy patapiñan kasharan. 48  Jinan Jesusqa payta niran: “Qankunaqa manachus rikuwaqchis señalkunata admiranapaq kaqkunatapas chayqa, manapunin creewaqchischu”, nispa. 49  Reypa serviqnintaq niran: “Señor, jaku, manaraq wawachay wañurapushaqtin qhaliyachimpuway”, nispa. 50  Jesustaq niran: “Phaway rillayña, wawaykiqa qhaliyapunñan”, nispa. Jinan chay runaqa Jesuspa nisqanta creespa kutipuran. 51  Wasinman kutipushaqtinmi kamachinkunaqa payman aypamuspa willaranku wawan qhaliña kapusqanmanta. 52  Jinan payqa kamachinkunata tapuran ima horastachus qhaliyapuran chayta. Paykunataq niranku: “Qayna-unchaymi la unata jina* fiebren chinkarapun”, nispa. 53  Chaywanmi taytanqa yuyariran chay horasllatataq Jesuspas: “Wawaykiqa qhaliyapunñan”, nisqanta. Chaymi payqa wasinpi llapa kaqkunapiwan Jesuspi iñiranku. 54  Chaywanqa iskay kutitañan Jesusqa milagrota ruwasharan Judeamanta Galileaman jamuspa.

Uraypi willakuykuna

Griego rimaypiqa “soqta kaq hora jina” ninmi, chaytaqa yupaqku intiq lloqsimusqanmantapachan.
Griego rimaypiqa “qanchis kaq horata jina” ninmi, chaytaqa yupaqku intiq lloqsimusqanmantapachan.