Juan 21:1-25

  • Discipulonkunaman Jesuspa rijurisqanmanta (1-14)

  • Pedroq Jesusta ‘munakuykin’ nisqanmanta (15-19)

    • “Ovejachaykunata michipuway” (17)

  • Jesuspa munasqa discipulonwan imachus pasananmanta (20-23)

  • Tukupay simikunamanta (24, 25)

21  Chay qhepatan Jesusqa wajmanta discipulonkunaman rijurillarantaq “Tiberíades”* nisqa qocha qayllapi. Chay rijuriyninqa khaynan karan:  Simón Pedro, “Mellizo” nisqa Tomás, Galileapi kaq Caná llaqtamanta Natanael, Zebedeoq wawankuna, Jesuspa waj iskay discipulonkuna iman kuska kasharanku.  Simón Pedron paykunata niran: “Challwaqmi risaq”, nispa. Jinan paykunapas niranku: “Jaku noqaykupiwan risun”, nispa. Chaymi paykunaqa boteman seqaspa riranku, ichaqa manan imatapas chay tutaqa challwarankuchu.  P’unchayamushaqtintaq Jesusqa qocha patapi sayasharan, discipulonkunan ichaqa mana repararankuchu Jesús kasqanta.  Jesusmi paykunata tapuran: “Wawallaykuna, ¿kashanchu imallaykichispas* mijunaykichispaq?”, nispa. Jinan paykunaqa niranku: “¡Manan!”, nispa.  Chaymi Jesusqa paykunata niran: “Challwanaykichis llikata boteq paña ladonman wijch’uykuychis, chaypin challwata tarinkichis”, nispa. Jinan paykunaqa wijch’uykuranku, ichaqa manan orqoytapas atirankuchu askhallaña challwa kasqanrayku.  Jinaqtinmi Jesuspa munakusqan apostolqa Pedrota niran: “¡Señortáq!”, nispa. Chayta uyarispan Simón Pedroqa q’ala wasalla kashasqanrayku p’achanwan churakuspa qochaman p’itaykuran.  Wakintaq ichaqa juch’uy botepi jamuranku llika junt’a challwa aysantin, paykunaqa manan allpamanta karupichu kasharanku, aswanmi isqon chunka metropi jinalla.  Botemanta allpaman lloqsimuspataq rikuranku sansa patapi challwa kashaqta, rikullarankutaqmi t’antatapas. 10  Jesusmi paykunata niran: “Jap’imusqaykichis challwakunamanta wakinta apamuychis”, nispa. 11  Jinan Simón Pedroqa boteman seqaspa qocha pataman orqomuran jatuchachaq challwakunantin llikata, llapanqa karan pachaj pisqa chunka kinsayoq challwakunan. Chhaytukuyña karan chaypas, llikaqa manan llik’ikuranchu. 12  Jinaqtinmi Jesusqa paykunata niran: “Jamuychis, mijuykuychis”, nispa. Paykunaqa yacharankun Señor kasqanta, chaymi mana mayqenninkupas tapuranchu: “¿Pin kanki?”, nispa. 13  Jesustaq paykunaman achhuykuspa t’antata jaywaran, jaywallarantaqmi challwatapas. 14  Kaywanqa kinsa kutitañan Jesusqa discipulonkunaman rijurisharan. 15  Mijuyta tukuqtinkun Jesusqa Simón Pedrota tapuran: “Juanpa wawan Simón, ¿kaykunamanta astawanchu munakuwanki?”, nispa. Jinan Pedroqa niran: “Arí, Señor, yachashankimá riki qanta munakusqaytaqa”, nispa. Jesustaq payta niran: “Chhaynaqa, ovejachaykunata michipuway”, nispa. 16  Wajmantan Jesusqa tapullarantaq: “Juanpa wawan Simón, ¿munakuwankichu?”, nispa. Pedrotaq niran: “Arí, Señor, yachashankimá riki qanta munakusqaytaqa”, nispa. Jesustaq niran: “Chhaynaqa, ovejachaykunata michipuway”, nispa. 17  Jujtawanmi Jesusqa tapullarantaq: “Juanpa wawan Simón, ¿munakuwankichu?”, nispa. Jinan Pedroqa sinchita llakikuran kinsa kutitaña “¿munakuwankichu?” nisqanrayku; chaymi niran: “Señor, tukuy imatamá riki qanqa yachashanki, yachashankimá riki qanta munakusqaytapas”, nispa. Jinan Jesusqa niran: “Chhaynaqa, ovejachaykunata michipuway. 18  Cheqaqtapunin niyki: Waynallaraq kashaspaykiqa qanllan p’achakuq kanki, maynintachus munasqaykitan puriqpas kanki. Machuyapuspaykin ichaqa makiykita jaywarinayki kanqa; jujmi p’achachisunkipas, mana munasqaykimantaqmi apasunkipas”, nispa. 19  Chaywanqa nisharan imayna wañuywanchus Diosta jatunchanan karan chaytan. Chayta nispataq payta niran: “Qatikamuwashallay”, nispa. 20  Pedrotaq qhepanta qhawarispa rikuran Jesuspa munakusqan apóstol jamushaqta, chay apostolmi cenapipas Jesuspa qhasqonman k’iraykuspa tapuran: “Señor, ¿pitaq jap’ichisunkiri?”, nispa. 21  Payta rikuspan Pedroqa Jesusta tapuran: “Señor, ¿payri imatataq ruwanqa?”, nispa. 22  Jinan Jesusqa payta niran: “Munaqtiyqa payqa kausanmanmi kutimunaykamapas, ¿imataq qanmanri qokusunki? Qanqa qatikamuwashallay”, nispa. 23  Chayta nisqanraykun wakin iñiqmasikuna rimaranku: “Manas chay apostolqa wañunqachu”, nispa. Jesusmi ichaqa mana: “Manan wañunqachu”, nispachu niran, aswanmi niran: “Munaqtiyqa payqa kausanmanmi kutimunaykamapas, ¿imataq qanmanri qokusunki?”, nispa. 24  Chay apostolmi llapa kaykunata willaqqa, kaykunata qelqaqpas, yachaykutaqmi paypa willasqanqa cheqaq kasqanta. 25  Imaymanakunatawanraqmi Jesusqa ruwaran, llapanta jayk’aqllapas qelqakunman chayqa, manachá chay qelqa k’uyukunata waqaychanallapaqpas kay pachapiqa* campo kanmanchu.

Uraypi willakuykuna

Chay qochataqa “Galilea qocha” nillaqkutaqmi. Qhaway Jn 6:1 textota.
Chaypiqa “juj challwallaykichispas” nillanmantaqmi.
“Kay pachapi” nispaqa maypichus librokunata waqaychanku chaykunamantan rimashanman.