Juan 16:1-33

  • Jesuspa discipulonkuna wañuchisqa kanankumanta (1-4a)

  • Santo espíritu imatachus ruwananmanta (4b-16)

  • Discipulokunaq llakikuynin kusikuyman tukupunanmanta (17-24)

  • Kay pachata Jesús atipan (25-33)

16  Jesusqa nillarantaqmi: “Chaykunataqa nishaykichis ama saqerpariwanaykichispaqmi.  Sinagogamantan qarqosqa kankichis. Tiempon chayamushan, chaypachan runakunaqa qankunata wañuchispa piensanqaku Diosta servishanankupaq.  Chaytan paykunaqa ruwanqaku Yayaytapas noqatapas mana reqsiwasqankurayku.  Chaykunataqa nishaykichis chaykuna pasananpaq tiempo chayamuqtin chay nisqayta yuyarinaykichispaqmi. ”Qankunawan kashasqayraykun chaykunataqa mana qallariymantapachachu niraykichis.  Kunanmi ichaqa kachamuwaqniyman ripusaq. ¿Manachu mayqennillaykichispas tapuriwankichis: ‘¿maytataq rinkiri?’, nispa?  Qankunaqa chaykunata nisqaywanmi sonqoykichispi sinchi llakisqa kashankichis ¿riki?  Ichaqa cheqaqtan niykichis: Allinniykichispaqmi noqaqa ripusaq; manachus ripuyman chayqa, manan yanapaqqa jamunmanchu, ripuspaymi ichaqa noqa chay yanapaqta kachamusaykichis.  Chay yanapaqmi chayamuspa kay pacha runakunaman sut’ita rikuchinqa imachus jucha chayta, imachus chanin kay chayta, imachus Diospa juzgaynin chaytawan.  Ñaupaqtan rikuchinqa imachus jucha chayta, paykuna noqapi mana iñisqankurayku. 10  Chaymantataq rikuchinqa imachus chanin kay chayta, Yayaman ripusqayrayku; qankunaqa manañan rikuwankichisñachu. 11  Chaymantapas rikuchillanqataqmi imachus Diospa juzgaynin chaytapas, kay pachata kamachiq juzgasqaña kasqanrayku. 12  ”Imaymanakunaraqmi qankunaman ninay kashan, ichaqa sasa entiendeyraqmi kunanqa kasunkichisman. 13  Chay yanapaqmi ichaqa chayamuspa pusasunkichis, chhaynapi cheqaq kaqta llapanta entiendenaykichispaq, chay yanapaqqa cheqaq kaqta sut’iman orqoq espiritun; payqa manan payllamantachu rimanqa, aswanpas Diosmanta imachus uyarisqanman jinan rimanqa, qhepa tiempoman imakunachus kanqa chaytapas willasunkichismi. 14  Paymi noqamanta imachus chaskisqanta qankunaman willasunkichis, chhaynapin jatunchawanqa. 15  Yayaqa tukuy imaymana yachasqantan noqaman willawan. Chaymi niykichis ‘noqamanta imachus chaskisqantan espirituqa willasunkichis’ nispa. 16  Juj chikanmantaqa manañan rikuwankichisñachu, chaymantapas juj chikanmantaqa rikuwallankichismi”, nispa. 17  Jinan discipulonkunaqa ninakuranku: “¿Ima ninantataq niwashanchis: ‘Juj chikanmantaqa manañan rikuwankichisñachu, chaymantapas juj chikanmantaqa rikuwallankichismi’, ‘Yayaman ripusqayrayku’, nisqanwanri?”, nispa. 18  Chaymantapas paykunaqa ninakushallarankutaqmi: “¿Ima ninantataq nishan: ‘Juj chikanmanta’ nisqanwanri? Manan entiendekunchu imamantachus rimasqanqa”, nispanku. 19  Jinan Jesusqa tapukuy munasqankuta reparaspa paykunata niran: “¿‘Juj chikanmantaqa manañan rikuwankichisñachu, chaymantapas juj chikanmantaqa rikuwallankichismi’, nispa nisqaymantachu tapunakushankichis? 20  Cheqaqtapunin niykichis: Qankunaqa waqankichismi, llakikuymantan qaparinkichis, kay pacha runakunataq kusikunqaku; qankunaqa sinchi llakisqan kashankichis, ichaqa llakikuyniykichismi kusikuyman tukupunqa. 21  Warmiqa sinchitan nanachikun onqokunan hora chayamuqtinqa ¿riki?, onqokusqan qhepamanmi ichaqa manaña ñak’arisqantapas yuyarinchu nacemuq wawanta rikusqanrayku. 22  Chhaynallataqmi qankunapas kunanqa sinchi llakikuypi kashankichis, jujmanta qankunawan tupaqtiymi ichaqa sonqoykichisraq kusikuymanta llanllarinqa, manataqmi pipas chay kusikuyniykichistaqa qechusunkichischu. 23  Chay p’unchayqa manañan imatapas qankunaqa tapuwankichisñachu. Cheqaqtapunin niykichis: Yayamanta sutiypi imatapas mañakuqtiykichisqa qosunkichismi payqa. 24  Qankunaqa manan imatapas sutiypiqa mañakunkichisraqchu ¿riki? Mañakuychis, chaskinkichismi, chhaynapi ancha kusisqa kanaykichispaq. 25  ”Chaykunataqa ejemplokunata churaspan rimapayashaykichis, ichaqa tiempon chayamunqa manaña ejemplokunawanchu rimapayanaypaq, chaypiqa sut’intan Yayamanta willasaykichis. 26  Chay p’unchayqa qankunañan Yayamanta sutiypi mañakunkichis; chaywanqa ‘manañan noqachu qankunapaq mañapusaykichis’ ninaytan nishani. 27  Noqata munakuwasqaykichisrayku, Yayaq sutinpi jamusqayta creesqaykichisrayku iman Yayaqa qankunata munakusunkichis. 28  Noqaqa Yayaq sutinpin kay pachaman jamurani, kunanmi ichaqa kay pachata saqespa Yayaman kutipushani”, nispa. 29  Discipulonkunataq payta niranku: “Señor, kunanqa clarotan rimashanki, manataqmi ejemplokunata churaspañachu. 30  Kunanqa yachaykun tukuy imaymana yachasqaykita, qanqa manan pipas tapunasuykitaraqchu suyanki, yachankiñan imachus piensasqankutapas. Chaypin reparayku Diosmanta jamusqaykita”, nispa. 31  Jinan Jesusqa paykunata niran: “¿Cheqaqtapunichu kunanqa creenkichis? 32  Ñan hora chayamushanña, kaypiñataqmi kashanpas, chaypin qankunaqa wasiykichisman ch’eqerinkichis, noqatataq sapallayta saqerpariwankichis. 33  Chaykunataqa nishaykichis noqarayku thaj kanaykichispaqmi. Kay pachapiqa sasachakuykunapin tarikunkichis, ichaqa ¡kallpachakuychis!, noqaqa ñan atipaniña kay pachata”, nispa.

Uraypi willakuykuna