Juan 11:1-57

  • Lazaroq wañupusqanmanta (1-16)

  • Martata Mariatawan Jesuspa kallpachasqanmanta (17-37)

  • Lazarota Jesuspa kausarichisqanmanta (38-44)

  • Jesusta wañuchinankupaq rimanakusqankumanta (45-57)

11  Betania llaqtachamanta Lazaron onqosqa kasharan, chaypin payqa tiyaran panankunawan, Mariawan Martapiwan.  Marian Señortaqa sumaq q’apaq jawinawan jich’aykuran, chakintataq chujchanwan ch’akichiran; paypa turan Lazaron onqosqa kasharan.  Chaymi Lazaroq panankunaqa juj runata kacharanku: “Señor, munakusqayki runan onqosqa kashan”, nispa Jesusman willamunankupaq.  Chayta willaqtinkun Jesusqa niran: “Chay onqoyqa manan wañunanpaqchu kashan, aswanpas Dios jatunchasqa kananpaqmi kashan, chhaynapi Diospa Churinpas chaywan jatunchasqa kananpaq”, nispa.  Jesusqa munakuranmi Martata, ñañanta, Lazarotawan.  Chaywanpas Lázaro onqosqa kashasqanta yachaspaqa iskay p’unchaytawanmi qhepakuran maypichus kasharan chaypi.  Chaymantataq discipulonkunata niran: “Jaku, Judeata kutisun”, nispa.  Jinan discipulonkunaqa niranku: “Yachachikuq, qayninpallamá riki Judeapiqa wañuchiyta munashasunkiku, ¿chaychu kunan kutiyta munashanki?”, nispa.  Jinan Jesusqa niran: “Chunka iskayniyoq horasmi p’unchayqa ¿riki? Pipas p’unchaypi puriqqa manan imawanpas laq’akunqachu, k’anchayta rikusqanrayku. 10  Pipas tutapi puriqmi ichaqa imawanpas laq’akunqa, k’anchay mana kasqanrayku”, nispa. 11  Chaykunata nispanmi Jesusqa nillarantaq: “Amigonchis Lazaroqa puñurapunmi; noqaqa payta rijch’arichiqmi risaq”, nispa. 12  Jinan discipulonkunaqa payta niranku: “Señor, puñushantaq chayqa, qhaliyallanqachá”, nispa. 13  Jesusqa Lázaro wañusqa kasqanmantan rimasharan, paykunan ichaqa piensasharanku puñuyllamanta rimananpaq. 14  Chaymi Jesusqa sut’inta paykunata niran: “Lazaroqa wañupunmi. 15  Ichaqa kusikunin mana chaypichu kasqaymanta, qankunaq allinniykichispaqmi chayqa, chhaynapi astawan iñinaykichispaq. Jaku payman risunchis”, nispa. 16  Jinan “Mellizo” nisqa Tomasqa discipulomasinkunata niran: “Jaku noqanchispas paywan kuska wañumunanchispaq”, nispa. 17  Jesuspa chayananpaqqa ñan tawa p’unchayña Lazaroqa sepulturapi kasharan. 18  Betania llaqtachaqa kinsa kilometropi jinallan karan Jerusalén llaqtamantaqa. 19  Chaymi askha judiokuna jamusqaku Martata Mariatawan turanku wañupusqanmanta kallpachanankupaq. 20  Martataq Jesuspa jamushasqanta yachaspa payman aypaq lloqsimuran, Mariataq ichaqa wasillapi qhepakuran. 21  Martan Jesusta niran: “Señor, kaypi kawaq karan chayqa, manachá turayqa wañunmanchu karan. 22  Chaywanpas yachanin, Diosmanta tukuy imatapas mañakuqtiykiqa qonasuykita”, nispa. 23  Jinan Jesusqa payta niran: “Turaykiqa jatarimpunqan”, nispa. 24  Chaymi Martaqa niran: “Noqaqa yachanin tukukuy p’unchaypi kausarimpuy kaqtin jatarimpunanta”, nispa. 25  Jinan Jesusqa payta niran: “Noqan kani kausarimpuypas kausaypas. Pipas noqapi iñiqqa, wañunmanña chaypas, kausarimpunqan. 26  Pipas kausaqqa jinaspa noqapi iñiqqa manan jayk’aqpas wañunqachu, ¿creenkichu qan chayta?”, nispa. 27  Jinan payqa niran: “Arí, Señor. Noqaqa creenin, qanqa Diospa Churin Criston kanki, kay pachaman jamunan karan chaypunin kanki”, nispa. 28  Chayta nispan Martaqa ñañan Mariata wajaq riran, paytan pakallapi niran: “Yachachikuqmi chayaramusqa, wajashasunkin”, nispa. 29  Chayta niqtinmi Mariaqa usqhaylla jatarispa Jesusman phawaran. 30  Jesusqa manaraqmi jaykuranchu chay aylluman, maypichus Martawan tuparan chayllapiraqmi kasharan. 31  Mariata kallpachaspa wasipi kashaq judiokunataq, Mariaq usqhaylla sayarispa lloqsisqanta rikuspa qhepanta riranku “sepulturatachá waqaq rishan” nispanku. 32  Mariataq Jesusta rikuspa paypa kasqanman chayaspa pampakama k’umuykuran, jinaspa niran: “Señor, kaypi kawaq karan chayqa, manachá turayqa wañunmanchu karan”, nispa. 33  Jinan Jesuspa sonqonqa “phoq” niran* Mariata paywan jamuq judiokunatapas waqaqta rikuqtin, sinchitataq llakikuranpas, 34  jinaspa niran: “¿Maymanmi churamurankichis?”, nispa. Paykunataq niranku: “Señor, jaku rikuchimusaykiku”, nispa. 35  Jesustaq waqaran. 36  Chayta rikuspan judiokunaqa ninakuranku: “¡Qhawariychis, anchatamá paytaqa munakusqa!”, nispa. 37  Wakintaq ichaqa niranku: “Kay runaqa ñausaq ñawintapas kichariranmá riki, ¿manachu imallatapas ruwanman karan chay runa mana wañunanpaq?”, nispa. 38  Wajmantan Jesuspa sonqonqa “phoq” niran, chaymantataq payqa sepultura t’oqoman riran, chayqa qaqa t’oqon karan, jatun rumiwan wisq’asqataqmi kasharanpas. 39  Jinan Jesusqa niran: “Chay rumita suchuchiychis”, nispa. Wañuqpa panan Martataq payta niran: “Señor, ñachá asnakushanña, ñan tawa p’unchayña karun”, nispa. 40  Jesustaq payta niran: “¿Manachu nirayki: ‘Creenki chayqa, rikunkin Diospa qhapaq atiyninta’, nispa?”, nispa. 41  Rumita suchuchiqtinkutaq Jesusqa wichayman qhawaspa niran: “Yayáy, graciastan qoyki uyariwasqaykimanta. 42  Noqaqa yachanin uyariwaqpuni kasqaykita; ichaqa kaypi kashaq runakuna kachamuwasqaykita yachanankupaqmi mañakamushayki”, nispa. 43  Chaykunata nispataq fuerteta niran: “¡Lázaro, lloqsimuy!”, nispa. 44  Jinan chay wañusqa runaqa telawan chakin makin k’uyusqa lloqsimuran, uyanpas k’uyusqan kasqa. Jinan Jesusqa paykunata niran: “Paskaychis purinanpaq”, nispa. 45  Chayta rikuspan Mariata watukuq jamuqkunamanta askha judiokuna Jesuspi iñipuranku. 46  Wakintaq ichaqa fariseokunaman rispa Jesuspa imachus ruwasqanta willaranku. 47  Chaymi umalli sacerdotekunaqa fariseokunapiwan Jatun Juntata* juñuranku, jinaspa niranku: “¿Imatan ruwasun? Kay runaqa imaymana señalkunatamá ruwashan. 48  Jinallata qhawasun chayqa, llapa runachá paypi iñipunqaku, jinaqtintaq Roma llaqta runakuna jamuspa templonchista llaqtanchistawan qechupuwasunchis”, nispa. 49  Paykunamanta Caifás sutiyoq runan chay tiempopi uma sacerdote kasharan, paymi niran: “Qankunaqa manan imatapas yachankichischu, 50  ¿manachu reparankichis llaqtantin runa wañunanmantaqa juj runaq wañunallan allin kasqanta?”, nispa. 51  Chaytaqa manan payllamantachu rimaran, aswanmi chay tiempopi uma sacerdote kasqanrayku profetizasharan Jesusqa llaqtarayku wañunan kasqanta. 52  Ichaqa manan llaqtaraykullachu wañunan karan, aswanmi Diospa ch’eqerisqa wawankunata jujllaman juñunanpaqwan. 53  Chaymi paykunaqa chay p’unchaymantapacha rimanakusharanku Jesusta wañuchinankupaq. 54  Chaymi Jesusqa judiokunawan mana rikuchikuq jinalla puriq. Chaymantapas ch’inneq lado qayllaman rispan “Efraín” nisqa llaqtaman chayaran, chaypin discipulonkunawan kuska qhepakuran. 55  Judiokunaq Pascua fiestankuqa ñan chayamusharanña, chaymi jawa llaqtakunamanta askha runakunaña ñaupasharanku Jerusalén llaqtaman, chhaynapi ch’uyanchakunankupaq. 56  Paykunan Jesusta maskhasharanku, templopi sayaykuspataq ninakuranku: “¿Ima ninkichistaq qankunari? ¿Manachu fiestallamanpas jamunqa?”, nispa. 57  Umalli sacerdotekunawan fariseokunawanqa ñan kamachikusqakuña pipas maypichus Jesuspa kashasqanta yachaqqa paykunaman willanankupaq, chhaynapi jap’inankupaq.

Uraypi willakuykuna

Chaytaqa “‘ch’allaq’ niran” nikullanmantaqmi.
Qhaway “explicasqa simikuna” nisqapi “Jatun Junta” nisqata.