Juan 10:1-42

  • Michiqmanta ovejakunamantawan (1-21)

    • Jesusqa ancha allin michiqmi (11-15)

    • “Kallantaqmi waj ovejaykunapas” (16)

  • Templota ch’uyanchay fiestapi judiokuna Jesusman churapakusqankumanta (22-39)

    • Askha judiokuna Jesuspi mana iñisqankumanta (24-26)

    • “Ovejaykunaqa uyarinkun kunkayta” (27)

    • Churiwan Yayawan jujlla kasqankumanta (30, 38)

  • Jordán mayu chimpapi askha runa Jesuspi iñisqankumanta (40-42)

10  Jesusqa nillarantaqmi: “Cheqaqtapunin niykichis: Pipas oveja kanchaman mana punkuntachu jaykunman, aswanpas kancha patanta jaykunman chayqa, suwan chay runaqa jujkunaq kaqninta qechuqtaq kanpas.  Pipas punkunta jaykuqmi ichaqa oveja michiq runa.  Paytaqa punku qhawaqmi kichan, ovejakunapas uyarinkun kunkanta, paytaq ovejankunata sutinmantakama wajaspa jawaman qarqon.  Llapanta qarqospañan ovejankunaq ñaupanta rin, ovejankunataq qhepanta rinku kunkanta reqsisqankurayku.  Mana reqsisqankuq qhepantan ichaqa manapuni rinkumanchu, aswanmi paymantaqa ayqekunkuman kunkanta mana reqsisqankurayku”, nispa.  Chay ejemplowanmi Jesusqa paykunata rimapayaran, paykunan ichaqa mana entienderankuchu imamantachus rimasharan chayta.  Jinan Jesusqa nillarantaq: “Cheqaqtapunin niykichis: Noqan ovejakunapaq punkuqa kani.  Sutiywan sutichakuspa jamuqkunaqa suwakunan kanku, jujkunaq kaqninta qechuqkunataq kankupas, chaymi ovejakunaqa mana paykunata uyarinkuchu.  Noqan punkuqa kani. Pipas noqanta jaykuqqa salvasqan kanqa, jinaspa jaykunqa, lloqsinqa, pastotapas tarinqa. 10  Suwaqa jamun ovejakunata suwakunanpaq, wañuchinanpaq, tukunanpaq imallan. Noqan ichaqa jamuni kausayniyoq kanankupaq, wiñay kausayniyoq kanankupaqwan. 11  Noqan ancha allin michiqqa kani. Ancha allin michiqqa vidantan* qon ovejakunarayku. 12  Pagoraykulla michipakuqmi ichaqa mana michiqpunichu, manataqmi paypachu ovejakunapas, chaymi payqa atoqpa jamushasqanta* rikuspa ovejakunata saqerparispa ayqekapun, chhaynapin atoqqa ovejakunata jap’ispa ch’eqerparichin. 13  Payqa pagoraykullataq michin chayqa, manan imapas ovejakunaqa qokunchu. 14  Noqan ichaqa ancha allin michiq kani. Imaynan Yayaqa noqata reqsiwan, noqapas Yayata reqsini, 15  chhaynatan ovejaykunataqa reqsini, ovejaykunapas reqsiwallankutaqmi noqataqa; noqaqa paykunaraykun vidayta qosaq.* 16  ”Kallantaqmi waj ovejaykunapas, paykunaqa manan kay t’aqamantachu kanku; paykunatapas pusamunaymi kashan, jinan kunkayta uyarinqaku, juj t’aqallataqmi kanqaku, juj michiqllayoqtaq kanqakupas. 17  Yayaqa munakuwan vidayta* qosqayraykun, noqaqa vidayta qosaq wajmanta chaskikapunaypaqmi. 18  Manan pi runachu vidaytaqa qechuwashan, aswanmi noqallamanta qoshani. Noqaqa atiyniyoqmi kani vidayta qonaypaq, wajmanta chaskinaypaqpas. Chaytaqa Yayaymi kamachiwaran”, nispa. 19  Chaykunata uyarispan judiokunaqa mana yuyayninkuta tupachillarankutaqchu. 20  Askhan nisharanku: “Supaypa junt’aykusqanmi kashan manataqmi yuyayninpichu kashanpas, imapaqñan uyarinkichis”, nispa. 21  Jujkunataq ichaqa nisharanku: “Kaykunataqa manan supaypa junt’aykusqan runaqa rimanmanchu. Jinaspapas, ¿atinmanchu juj supay ñausakunaq ñawin kichariyta?”, nispa. 22  Chay tiempopin Jerusalén llaqtapi kasharan templota ch’uyanchay fiesta, chiri tiempon kasharanpas. 23  Chaypin Jesusqa templopi purisharan “Salomonpa columnankuna”* nisqapi. 24  Chayllamanmi judiokunaqa payta muyuykuranku, jinaspa niranku: “¿Jayk’aqkaman mana willawankikuchu pichus kasqaykita? Cristo kanki chayqa, sut’intayá niwayku”, nispa. 25  Jinan Jesusqa paykunata niran: “Ñamá riki niraykichisña, qankunataq ichaqa mana creewankichischu. Yayaypa sutinpi imaymanakuna ruwasqaymi noqamantaqa sut’ita willakun. 26  Qankunan ichaqa mana creenkichischu, mana ovejaykunachu kasqaykichisrayku. 27  Ovejaykunaqa uyarinkun kunkayta, noqapas reqsinin paykunataqa, paykunataq qhepayta jamunku. 28  Noqaqa wiñay kausaytan paykunaman qosaq, chhaynapin mana jayk’aqpas wañunqakuchu, manataqmi pipas makiymantaqa qechuwanqachu. 29  Yayaypa qowasqankunaqa tukuy imamantapas aswan allinmi, manataqmi pipas Yayaq makinmantaqa qechunmanchu. 30  Noqawan Yayawanqa jujllan kayku”,* nispa. 31  Wajmantan judiokunaqa rumikunata oqarikuranku Jesusta ch’aqenankupaq. 32  Jinan Jesusqa paykunata niran: “Yayaymanta kaq askha allin ruwaykunatan qankunaman rikuchiraykichis, chaykunamanta ¿mayqen kaqmantataq qankunari ch’aqewankichis?”, nispa. 33  Judiokunataq payta niranku: “Manan imapas allin ruwasqaykimantachu ch’aqeshaykiku, aswanpas Diosta pisichaspa k’amisqaykimantan, runalla kashaspayki ‘diosmi kani’ nisqaykimantawan”, nispa. 34  Jesustaq paykunata niran: “¿Manachu chaskisqaykichis kamachikuy simipi Diosqa nishan: ‘Qankunaqa dioskunan kankichis’,* nispa? 35  Arí, Diosqa ‘dioskuna’ nispan niran simin qelqaq juchachasqan runakunata, manataqmi Diospa siminqa jayk’aqpas pantanmanchu. 36  Noqaqa kani Diospa ch’uyanchasqan runan, paymi kay pachamanpas kachamuwan; qankunataq ichaqa ‘Diospa Churinmi kani’ nisqayrayku: ‘Diostan pisichaspa k’amishan’, niwashankichis. 37  Manachus Yayaypa munayninta ruwashani chayqa, ama creewaychischu. 38  Ichaqa ruwashanichus chayqa, manaña rimasqayrayku creenkichischu chaypas, creeychisyá ruwasqaykunaraykullapas; chhaynapin reparaspaykichis allinta entiendenkichis Yayaqa noqawan jujllachasqa kasqanta, noqataq Yayawan jujllachasqa kasqayta”, nispa. 39  Chayraykun wajmanta jap’iruytapuni munasharanku, Jesusmi ichaqa mana jap’ichikuranchu. 40  Chaymantataq Jesusqa wajmanta Jordán mayu chimpaman riran, maypichus qallariypi Juan bautizaran chayman, jinaspa chaypi qhepakuran. 41  Chaypin askha runakuna payman jamuranku, jinaspa ninakuranku: “Juanqa manaña juj milagrollatapas ruwaranchu chaypas, kay runamanta tukuy ima rimasqanqa cheqaqmá kasqa”, nispanku. 42  Chaypiqa askhan Jesuspi iñiranku.

Uraypi willakuykuna

Chaypiqa “almantan” nillanmantaqmi.
Griego rimaypiqa “loboq jamushasqanta” ninmi.
Chaypiqa “almayta qosaq” nillanmantaqmi.
Chaypiqa “almayta” nillanmantaqmi.
Chay columnakunaqa chimpa-chimpankan sayasharan, techoyoqtaqmi karanpas, chaupinqa calle jinan karan.
Chaypiqa “juj yuyayllan kayku” nillanmantaqmi.
Chaypiqa “dios jinan kankichis” nillanmantaqmi.