Hechos 6:1-15

  • Mijuna rakiypaq qanchis runakunata ajllakusqanmanta (1-7)

  • Estebanta Dios k’amiqmanta tumpanku (8-15)

6  Jesuspa discipulonkunaqa askhayasharankun chay p’unchaykunapi, jinan juj kutipi griego rimaq judiokuna quejakuranku hebreo rimaq judiokunaq contranpi, paykunamanta kaq viudakunamanmi sapa p’unchay rakikusqan mijuyta mana qoshasqakuchu.  Chaymi chunka iskayniyoq apostolkunaqa llapa iñiqkunata juñuspa niranku: “Noqaykupaqqa manan allinchu kanman Diospa simin yachachiyta saqespa mijuykunata rakiyqa.  Chayrayku, wayqeykuna, qankuna ukhumanta ajllaychis qanchis qharikunata, allin respetasqa kaqkunata, espirituwan yachaywan ima junt’a kaqkunata, chhaynapi chay necesario ruwaypi paykunata churanaykupaq;  noqaykuqa Diosmanta mañakuspa siminta yachachispa imallañan kasaqku”, nispa.  Lliu iñiqkunan chay nisqankutaqa allinpaq qhawariranku, chaymi ajllaranku Estebanta, payqa allin iñiyniyoq runan karan, junt’an kasharan santo espirituwanpas, ajllallarankutaqmi Felipeta, Procorota, Nicanorta, Timonta, Parmenasta, Antioquiamanta judioman tukupuq Nicolastapas.  Jinaspan apostolkunaman pusamuranku, jinan apostolkunaqa Diosmanta mañakuranku, chaymantataq paykuna pataman makinkuta churaykuranku.  Chhaynapin Diospa siminqa lliuman ch’eqerisharan, Jerusalén llaqtapi iñiqkunapas askhamanmi tukupusharanku; sacerdotekunapas askhan iñipusharanku.  Estebanqa Diospa sumaq qhawarisqan kaspa, atiyninwanpas junt’a kaspa iman runakunaq ñaupanpi jatun milagrokunata señalkunata ima ruwasharan.  Chayllamanmi jamuranku “kacharisqakunaq sinagogan”* nisqamanta wakin runakuna, paykunawan kuskan jamusqaku Cirene runakuna, Alejandría runakuna, Cilicia runakuna, Asia runakunapiwan, paykunaqa Estebanwan discutiqmi jamusqaku. 10  Ichaqa manan Estebanta atipayta atirankuchu yachaywan espirituq yanapayninwan ima rimasqanrayku. 11  Jinan paykunaqa pakallapi juj qharikunata kallpacharanku: “Kay runatan uyariyku Moisesmanta Diosmantawan millayta rimashaqta”, nispa rimanankupaq. 12  Jinan chay runakunaqa llaqta runakunata, kuraq runakunata, kamachikuy simita yachachiqkunatawan ch’aqwachiranku, chaymi Estebanman phawaykuspa jap’iranku, jinaspa Jatun Juntaman* aparanku. 13  Pusarankun llulla testigokunatapas, paykunan niranku: “Kay runaqa templo contra kamachikuy simi contra iman mana sayk’uspa imaymanata rimashan. 14  Paypa nisqanman jinaqa Nazaret llaqtayoq Jesussi templota thuninqa, cambianqas Moisespa saqewasqanchis kamachikuykunatapas”, nispa. 15  Jatun Juntaq juñunakuyninpi llapa tiyashaqkunataq payta qhawaykuranku, jinan paypa uyanta rikuranku angelpa uyanta jina.

Uraypi willakuykuna

Qhaway “explicasqa simikuna” nisqapi “sinagoga” nisqata.
Qhaway “explicasqa simikuna” nisqapi “Jatun Junta” nisqata.