Hechos 4:1-37

  • Pedrota Juantawan carcelman wisq’asqankumanta (1-4)

    • 5.000 runakunaña iñiq kapunku (4)

  • Jatun Junta paykunata juzgasqanmanta (5-22)

    • ‘Manapunin upallakusaqkuchu’ (20)

  • Mana manchakuq kanapaq mañakusqankumanta (23-31)

  • Discipulokuna imachus kaqninkuta qonakusqankumanta (32-37)

4  Pedrowan Juanpiwan runakunata rimapayashaqtinkun sacerdotekuna, templo qhawaq umalli, saduceokuna ima jamuranku.  Paykunaqa phiñasqan kasharanku chay apostolkuna runakunaman yachachisqankurayku, Jesuspa kausarimpusqanmanta sut’itapuni willasqankurayku ima.  Chaymi iskayninkuta jap’ispa ch’isinña kasqanrayku carcelman wisq’aranku qhepantin p’unchaykama.*  Chaywanpas paykunaq rimasqanta uyariqkunaqa askhan iñipuranku, chaymi iñiqkunaqa astawan yapakuranku, yupasqaqa qharikunallan pisqa waranqa jina karanku.  Qhepantin p’unchaymi Jerusalenpi juñunakuranku umallikuna, kuraq runakuna, kamachikuy simita yachachiqkunapiwan,  paykunawan kuskan juñunakullarankutaq umalli sacerdote Anás, jinallataq Caifás, Juan, Alejandro, umalli sacerdoteq llapa familiankuna ima.  Paykunan Pedrota Juantawan chaupipi sayaykachiranku, jinaspa tapuyta qallariranku: “¿Pin atiyta qorasunkichis kayta ruwanaykichispaq? ¿Piqpa sutinpin kayta ruwankichis?”, nispa.  Chaymi Pedroqa santo espirituwan junt’a kaspa paykunata niran: “Israel llaqta umallikuna, kuraq runakuna,  ¿juj such’u runapaq allin ruwasqaykumantachu, imaynapi qhaliyapusqanmantachu yachayta munashankichis? 10  Chhaynaqa, qankunapas llapa Israel runakunapas kayta yachaychis: Kay runaqa Nazaret llaqtayoq Jesucristoq sutinpin qhaliyachisqa kapun, chaymi ñaupaykichispi qhali sayashan, chay Jesucristotan qankunaqa k’aspipi wañuchirankichis, ichaqa Diosmi kausarichimpuran. 11  Paymi ‘qankuna wasi sayarichiqkunaq mana valeqta jina wijch’usqaykichis rumiqa, paymi esquina jap’iq jatun kaq rumi kapun’. 12  Chaymantapas payllan salvawaqninchisqa; kay pachapiqa manan pitapas Diosqa ajllaranchu salvawananchispaq, aswanpas payllatan ajllaran”, nispa. 13  Paykunaqa Pedrota Juantawan mana manchakuspa rimasqankuta uyarispa, mana educasqa común runakunalla kasqankutawan yachaspan admirakuranku, chaymantañan repararanku Jesuswan kuska puriq kasqankuta. 14  Chay qhaliyachisqa runata qhawaykuspankutaq mana ima niytapas atirankuñachu. 15  Chaymi kamachiranku juñunakusqanku salamanta* kinsantinku lloqsinankupaq, jinaspa paykunalla rimanakuranku: 16  “Kunanri, ¿imatataq kay runakunawan ruwasun? Chay milagro ruwasqankuqa sut’in kashan, Jerusalén llaqtapi tiyaqkunapas llapankun chaytaqa yachanku, noqanchispas manan chay ruwasqankutaqa negayta atisunmanchu. 17  Chhaynaqa, chay pasasqanmanta willakuy ama ch’eqerinanpaq, Jesuspa sutinpi amaña pimanpas rimanankupaqwan paykunata amenazasun”, nispa. 18  Jinan Pedrotawan Juantawan wajaspanku kamachiranku: “Aman maypipas Jesuspa sutinpiqa imatapas rimankichischu, amataq yachachinkichispaschu”, nispa. 19  Jinan Pedrowan Juanwanqa paykunata niranku: “Diosta uyarinaykumantaqa qankunata uyariykuman chayqa, ¿allinpaqchu Dios chayta qhawarinman? Chhaynatachus piensankichis chayqa, qankunamantañachá chayqa kanqa. 20  Noqaykun ichaqa manapuni imachus rikusqaykumanta imachus uyarisqaykumantawan willaytaqa upallakusaqkuchu”, nispa. 21  Jinaqtinmi wajmanta amenazaspanku kacharipuranku. Paykunaqa manan imatapas paykunapi tarirankuchu castiganankupaq jinaqa, jinaspapas runakunatan manchakusharanku, imachus pasasqanmanta llapallanku Diosta jatunchasqankurayku. 22  Chay qhaliyachisqa runaqa tawa chunka más watanpiñan kasharan. 23  Kacharisqa kaspankutaq paykunaqa iñiqmasinkunaman riranku, jinaspa willakuranku umalli sacerdotekunaq kuraq runakunaq imachus nisqankuta. 24  Chayta uyarispan iñiqkunaqa juj sonqolla alto kunkawan Diosmanta mañakuranku: “Ancha jatun Señorniyku, qanmi ruwaranki cielotapas, kay pachatapas, lamar-qochatapas, chaykunapi lliu kaqkunatapas, 25  qanmi santo espirituykiwan ñaupa taytayku serviqniyki Davidwan rimachiranki: ‘¿Imanaqtinmi nacionkuna ch’aqwayta qallariranku? ¿Imanaqtinmi llaqtakuna yanqa kaqkunapi piensayta qallariranku? 26  Kay pacha reykunan Jehová Diospa contranpi, ajllasqanpa contranpiwan jatarinankupaq alistakuranku, kamachikuqkunapas juj sonqollan paykuna contra juñunaykukuranku’, nispa. 27  Cheqaqpunitaqmi Herodespas Poncio Pilatopas nacionkunamanta runakunawan, Israel llaqta runakunapiwan kay llaqtapi juñunakuranku ch’uya serviqniyki Jesús contra, qanqa paytan ajllakuranki Cristo kananpaq. 28  Paykunaqa juñukuranku ñaupaqmantaña willachisqaykiman jina ruwanankupaqmi. Chaykunaqa atiyniykiwanmi munayniykiman jina ruwakuran. 29  Kunanqa, Jehová Diosniyku, uyariyyá khayna amenazawasqankuta, kamachiykikunatapas yanapaykuwayku mana manchakuspa simiykimanta rimashanallaykupaq, 30  onqosqakunatapas qhaliyachishallay atiyniykiwan, ch’uya serviqniyki Jesuspa sutinpipas ruwakushallachun señalkuna milagrokunapas”, nispa. 31  Chhaynata rogakuyta tukuruqtinkutaq, maypichus juñunasqa kashasqankuqa chhafchirisqa karan; jinan llapallankuman santo espíritu junt’aykuran, chaymi mana manchakuspa Diospa siminta willaranku. 32  Chaymantapas iñiqkunaqa llapankun juj sonqolla juj yuyaylla kasharanku, manan mayqenninkupas imachus kapuqninkumantaqa ‘noqaqmi kayqa’ niqkuchu, aswanpas tukuy imankupas llapankupaqmi kaq. 33  Apostolkunapas ancha atiywanmi Señor Jesuspa kausarimpusqanmanta willashallaranku, Diostaq llapankuman sumaq sonqo kayninta anchatapuni rikuchisharan. 34  Manan pipas pisichikuypi tarikuranchu; llapa kaqniyoqkunan chajrankuta wasinkuta vendespa chaypa precionta apamuqku, 35  jinaspa apostolkunaman qoqku. Paykunataq sapankaman rakiqku necesitasqankuman jina. 36  Juj runan karan José sutiyoq, paytan apostolkuna niqku “Bernabé” nispa (chay sutiqa “jujkunata kallpachaq” ninantan nin), payqa Chipre llaqtapi naceq Leví runan karan, 37  paymi allpanta vendepuspa, chay vendesqan qolqeta apostolkunaman apamuran.

Uraypi willakuykuna

Qhepantin p’unchaytaqa “paqaristin p’unchay” nillankutaqmi.
Griego rimaypiqa “Jatun Juntaq juñunakunan salamanta” ninmi. Qhaway “explicasqa simikuna” nisqapi “Jatun Junta” nisqata.