Hechos 12:1-25

  • Santiagota wañuchisqankumanta, Pedrota carcelman wisq’asqankumantawan (1-5)

  • Pedrota juj ángel librasqanmanta (6-19)

  • Juj ángel Herodesta onqoywan jap’ichisqanmanta (20-25)

12  Chay tiempopin Herodesqa* iñiq t’aqamanta wakinta qatikachayta qallariran.  Paymi Juanpa wayqen Santiagota espadawan wañuchiran.  Chay ruwasqanwan judiokuna kusikusqanta rikuspan payqa Pedrotapas presota jap’ichiran. (Chayqa karan mana levadurayoq t’anta mijuna p’unchaykuna kashaqtinmi.)  Jap’ichispataq carcelman wisq’achiran, jinaspa tawa t’aqa soldadokunaman entregaran sapanka t’aqa qhawanankupaq, sapanka t’aqapin karan tawa soldadokuna. Payqa Pascua fiesta tukuytan llaqta runakunaman orqomuyta munasharan.  Chaykamaqa carcelpin Pedroqa kasharan, iñiq t’aqapi kaqkunan ichaqa tukuy sonqowan Diosmanta mañapusharanku.  Pedroqa iskay cadenawan watasqan puñusharan iskay soldadokunaq chaupinpi, guardiakunapas punkupin sayasharanku punkuta qhawaspa. Paqaristinmi Herodesqa Pedrota runakunaman orqomunan karan.  Chayllamanmi Jehová Diospa angelninqa rijuriran, juj k’anchaytaq Pedrota wisq’asqanku ukhupi k’anchariran. Jinan angelqa Pedrota waqtanmanta kuyurichispa rijch’arichiran, jinaspa niran: “Usqhaylla jatariy”, nispa. Jinan makinpi cadenakunaqa urmapuran.  Jinaspan angelqa nillarantaq: “P’achakuy, usut’aykitapas churakuy”, nispa. Chayta ruwaqtintaq angelqa niran: “Jawa p’achaykiwan churakuspa qhepayta jamuy”, nispa.  Jinan payqa lloqsispa qhepanta riran, ichaqa manan repararanchu angelpa ruwasqan cheqaqpuni kashasqanta, payqa juj rijuriyta rikunanpaqmi piensasharan. 10  Ñaupaq t’aqa guardiakunata iskay kaq t’aqa guardiakunatapas pasaruspataq, llaqtaman lloqsina fierro punkuman chayaranku, chay punkuqa kikillanmi paykunapaq kicharikuran. Lloqsispankutaq juj callenta riranku, chayllamanmi angelqa Pedroq qayllanmanta chinkapuran. 11  Chayraqmi Pedroqa cuentata qokuran, jinaspa niran: “Jehová Diosmá angelninta kachamuwasqa, chhaynapi Herodespa makinmanta, judiokuna noqapaq mana allinta munasqankumantawan librawananpaq”, nispa. 12  Chayta reparaspan Pedroqa Mariaq wasinta riran, payqa “Marcos” nisqa Juanpa mamanmi karan, chaypin askha iñiqkuna juñunasqa Diosmanta mañakusharanku. 13  Punkuta takaykuqtinmi Rode sutiyoq warmi kamachi lloqsimuran pichus takamushan chayta qhawaq. 14  Pedroq kunkanta uyarispataq payqa anchata kusikuran, chaymi mana punkutapas kicharanchu aswanmi phawaylla kutiykuspa willamuran: “Pedron punku jawapi kashan”, nispa. 15  Jinan paykunaqa niranku: “Locayashankichá”, nispa. Paymi ichaqa niran: “Pedropunin kashan”, nispa. Chaymi paykunaqa ninakuranku: “Chhaynaqa angelninchá”, nispanku. 16  Pedroqa takakushallaranmi punkuta, kichaspankutaq payta rikuspa anchata admirakuranku. 17  Pedron ichaqa makillanwan paykunata niran ch’inlla kanankupaq, chaymantataq lliuta willaran imaynatas Jehová Dios carcelmanta orqomuran chayta, nirantaq: “Llapa chaykunata Santiagoman iñiqmasikunamanwan willamuychis”, nispa. Chaymanta lloqsispataq juj ladoman ripuran. 18  P’unchayamuqtintaq soldadokunaqa afanta rimasharanku, imachus Pedrowan pasasqanmanta. 19  Herodesqa lliutan maskhachiran, mana tariqtinkutaq guardiakunata allinta tapuran, jinaspa kamachikuran paykunata apaspa castigamunankupaq.* Chaymantataq Herodesqa Judeamanta Cesarea llaqtaman uraykuran chaypi juj tiempo kananpaq. 20  Payqa Tiro llaqtapaq Sidón llaqtapaq iman phiñasqa kasharan. Chay llaqta runakunaqa Herodespa kamachisqan llaqtamantan mijuyta rantiqku, chaymi paykunaqa juj yuyaylla jamuspanku reypa wasinpi encargasqa Blastota valekuranku yanapananpaq, jinaspa reywan rimaranku allipunakapunankupaq. 21  Juj señalasqa p’unchaymi Herodesqa kamachikunan allin p’achanwan p’acharukuspa juzgana tiyanapi tiyaykuran, jinaspa runakunata rimapayayta qallariran. 22  Chayta uyarispan chaypi juñunasqa runakunaqa qapariranku: “¡Kayqa manamá runaq kunkanchu, diospa kunkanmá!”, nispanku. 23  Chayta niqtinku jinan Jehová Diospa angelninqa Herodesta onqoywan jap’ichiran Diosta mana jatunchasqanrayku; jinan kuruq tukusqan wañupuran. 24  Jehová Diospa siminqa jinantinmanmi ch’eqerisharan, chaymi askha runakuna iñipusharanku. 25  Bernabewan Saulowantaq yanapay apamusqankuta Jerusalenpi saqeykuspa Antioquía llaqtaman kutipuranku “Marcos” nisqa Juantawan pusarikuspa.

Uraypi willakuykuna

Payqa karan Herodes Agripa I.
Yaqapaschá chay castigoqa karan wañuy.