Hebreos 12:1-29

  • Jesús iñiyninchista junt’apaq kasqanmanta (1-3)

    • Phuyu jinaraq askha testigokuna (1)

  • Diospa wanachiyninta ama mana valeqpaq jina qhawarinamanta (4-11)

  • Purina ñanta rectoyachinamanta (12-17)

  • Janaq pacha Jerusalenman asuykunamanta (18-29)

12  Chhayna askha testigokunataq phuyu jinaraq muyuykuwashanchis chayqa, noqanchispas imachus llasawaqninchista wijch’uspa, facil-llata mayt’uwaqninchis juchatawan wijch’uspa, ama pisipaspa phawashallasun kay phawananchis kaq carrerata.  Chayta ruwashananchiskamaqa tukuy yuyaywan qhawashallasun Jesusta, paymi iñiypi pusawaqninchisqa iñiyninchista junt’apaqpas. Payqa qhepaman kusikunanta yachaspan ñak’arina k’aspita aguantaran, manataqmi p’enqakuranchu chhayna p’enqay wañuytapas, chaymi kunanqa Diospa paña ladonpi tiyashan.  Arí, tukuy yuyaywan qhawashallaychis juchasapa runakunaq imaymana k’amisqan aguantaqta, chhaynapi mana sayk’unaykichispaq mana pisipanaykichispaqwan; chaymantapas chay juchasapa runakunaqa paykunaq mana allinnillankupaqtaqmi chaytaqa ruwaranku.  Juchawan maqanakuspaykichisqa manaraqmá qankunaqa wañunaykichiskamaraqchu maqanakunkichis.  Chaymantapas qankunaqa qonqapusqankichismá wawankunata jina Diospa nisqasuykichistaqa; ¿manachu simin qelqapi nishan: “Wawalláy, aman Jehová Diospa wanachisqasuykitaqa mana valeqpaq jinaqa jap’inkichu, amallataq pisipankichu anyasuqtiykipas;  Jehová Diosqa munakusqan runakunatan wanachin, payqa pikunatachus wawankunata jina chaskin chaykunatan jasut’inpas”, nispa?  Imapiña ñak’arinkichis chaypas allintan aguantanaykichis, chaymantapas wanachisqapas kashawaqchis jinatan chaykunataqa qhawarinaykichis. Diosqa wawankunata jinan qankunataqa rikusunkichis; lliu wawakunapas taytankuq wanachisqanmi kanku ¿riki?  Chayrayku, manachus Diospa wanachisqan karankichis chayqa, manachá paypa wawankunapunichu kawaqchis.  Taytanchiskunaqa wanachiwaqmi kanchis ¿riki? Noqanchistaq paykunataqa respetaq kanchis. Chhaynaqa, ¿manachu astawanraq kasukunanchis janaq pacha taytanchistaqa,* chhaynapi kausashanallanchispaq? 10  Taytanchiskunaqa juj tiempollan wanachiwaq kanchis, imachus paykunapaq allin karan chayman jinallataqmi chayqa kaqpas. Janaq pacha taytanchismi ichaqa allinninchispaqpuni wanachiwanchis, chhaynapi pay jina ch’uya kananchispaq. 11  Ichaqa ima wanachiypas kaq ratoqa manan kusichikunchu, aswanpas nanachikunmi; chaymantan ichaqa wanachisqa kaqkunaqa thaj kausayta, chanin kausayta ima chaskinku. 12  Chayrayku, liwi-liwi makikunata pisipaq moqokunatawan kallpachaychis; 13  purinaykichis ñantapas rectoyachiychis, chhaynapi wist’u moqoqa ama phawarunanpaq, aswanpas qhaliyananpaq. 14  Lliu runawan thajpi kanaykichispaq kallpachakuychis; maskhaychis ch’uyanchasqa kaytapas, mana chayqa manan Señorta rikunkichischu. 15  Allinta qhawarikuychis llapankuchus Diospa ancha sumaq sonqo kayninta chaskishanku icha manachus chayta, chhaynapi ama qankuna ukhupi ima venenoyoq saphipas rijurinanpaq, mana chayqa sasachaykunatan jatarichinman, askhatataq qhellichanmanpas. 16  Chaymantapas, paqtataq qankuna ukhupi kashanman qhelli juchapi puriqkuna, Esaú jina Diospa kaqninkunata pisichaqkunapas, paymi phiwi kayninmanta tupaqninta cambiapuran juj plato mijunawan. 17  Yachasqaykichis jina, chay qhepaman bendicionta chaskiytaña munaran chaypas, manan qosqachu karan, waqaykuranña taytanpa imachus nisqanta cambiachiyta munaspa chaypas, yanqapaqñan karan. 18  Qankunaqa manan ninaq raurarisqan, yana phuyuq llanthuykusqan, ni sinchi wayraq t’ojasqan laqhayaq orqomanchu achhuykushankichis; 19  chay orqopin trompeta qapariran, juj kunkapas uyarikuran, chayta uyarispan runakunaqa rogakuranku amaña chay kunka imatapas rimamunanpaq. 20  Paykunaqa sinchitapunin mancharikuranku: “Juj animal-llapas kay orqota saruykamunqa chayqa, rumiwan ch’aqesqan wañunqa”, nisqa kamachikuyta uyarispanku. 21  Chay rikusqankuqa sinchi manchakuypunin karan, chaymi Moisespas niran: “Sinchi manchasqan kashani, cuerpoypas khatatatashanraqmi”, nispa. 22  Qankunaqa achhuykushankichis Sión orqoman, kausaq Diospa llaqtanman, arí, janaq pacha Jerusalenman; jinallataq chunkay-chunkay waranqa angelkunaq 23  juñunakusqanman, janaq pachapi qelqasqa kaq phiwikuna t’aqaman, lliupa jueznin Diosman, ch’uyanchasqa chanin runakunaq espiritual kausayninman, 24  mosoq rimanakuypi yanapaq Jesusman, ch’aqchusqan yawarman iman, chay yawarqa Abelpa yawarninmantapas aswan allintan riman. 25  Chaytaq mana uyariwaqchischu janaq pachamanta rimamuqpa kunkanta; ñaupa tiempopipas kay pacha runakunaqa manan uyarikurankuchu Diospa willachisqanta, chaymi paykunaqa castigasqa karanku. Chhaynataq karan chayqa, astawanraqchá riki noqanchisqa castigasqa kasun manachus janaq pachamanta rimamuqpa kunkanta uyarikusun chayqa. 26  Chay tiempopiqa chay rimamuq kunkaqa chhafchiriranraqmi kay pachatapas, kunanmi ichaqa pay nin: “Jujtawanmi noqaqa chhafchirisaq, ichaqa manan kay pachallatachu, aswanpas cielotawanmi”, nispa. 27  “Jujtawanmi” nispaqa chhafchisqa kaqkuna otaq Diospa mana paqarichisqan kaqkuna wijch’usqa kananmantan rimashan, chhaynapi mana chhafchisqa kaqkuna kaqllapi kananpaq. 28  Chhaynaqa, mana jayk’aq chhafchisqa kaq gobiernotataq chaskisun chayqa, kallpachakushallasun Diospa ancha sumaq sonqo kayninta chaskinanchispaq, chhaynapin paytaqa manchakuywan ancha respetowan ima sonqonman chayaqta servisunchis. 29  Chaymantapas Diosninchisqa raurashaq nina jinaraqmi kashan.

Uraypi willakuykuna

Chaypiqa “espiritual kausayninchismanta taytanchistaqa” nillanmantaqmi.