Hebreos 11:1-40

  • Imachus iñiy kasqanmanta (1, 2)

  • Pikunachus allin iñiyniyoq karanku chaykunamanta (3-40)

    • Mana iñiyniyoqqa manan Diospa sonqonpaq jinachu (6)

11  Iñiyqa imatachus suyashanchis chayta cheqaqpaqpuni jap’iymi, mana rikuna kaqkunatapas rikushasunmanpas jinata rikuymi.  Chhayna iñiyniyoq runakunatan Diosqa ñaupa tiempopi sumaqta qhawariran.  Chay iñiymi rikuchiwanchis tukuy imapas Diospa nisqanman jina kamasqa kasqanta,* rikusqanchis kaqkunapas mana rikusqanchis kaqkunamanta paqarimusqanta.  Iñisqanraykun Abelqa Cainmanta aswan allin sacrificiota Diosman jaywaran, chhayna iñiq kasqanraykutaqmi Diospas rikuchiran chaninpaq qhawarisqanta, chaytan ruwaran ofrendakuna jaywasqanta sumaqta chaskispa; chaymi payqa wañupunña chaypas, iñiyninwan rimashanraq.  Iñisqanraykun Enocpas apasqa karan mana ñak’arispa wañunanpaq; Diosmi paytaqa apapuran, manataqmi maypipas tarisqachu karan. Manaraq apasqa kashaqtinmi ichaqa Diosqa willaran sonqonpaq jina kasqanta.  Manachus iñisunman chayqa manapunin Diospa sonqonpaq jinachu kasunman; pipas Diosman achhuykuqqa creenanmi Diosqa cheqaqpuni kasqanta, payta tukuy sonqowan maskhaqninkunamanpas premiota qoq kasqantawan.  Iñisqanraykun Noepas manaraq rikusqankunamanta Dios willaqtin payta manchakuspa juj arcata ruwaran familianpiwan salvasqa kananpaq. Chhayna iñiq kasqanwanmi payqa rikuchiran kay pachaqa chinkachinapaq jinapuni kasqanta, chhayna iñiq kasqanraykutaqmi chanin runapaqpas jap’isqa karan.  Iñisqanraykun Abrahanpas Diospa wajasqanta kasukuspa llaqtanmanta ripuran maypichus herenciata chaskinan karan chay ladoman; payqa manaña yacharanchu maymanchus rinan karan chayta chaypas rillaranmi.  Iñisqanraykun prometesqa allpapipas forastero jina tiyaran; karpakunapitaqmi tiyaranpas paypa chaskisqan promesallatataq chaskiq Isaacwan Jacobwan ima. 10  Payqa cheqaq cimentacionniyoq llaqtatan suyasharan, Diosmi chay llaqtataqa ruwaranpas perqaranpas. 11  Iñisqanraykun Sarapas atiyta chaskiran edadniyoqña karan chaypas onqoq rijurinanpaq, payqa allintan yacharan prometeqqa rimasqanta junt’aqpuni kasqanta. 12  Chhaynapin juj runallamanta askha runakuna paqarimuran, chay runa wañusqa jinaña kasharan chaypas, wawankunaqa cielopi ch’askakuna jinaraqmi karan, lamar-qocha patapi mana yupay atina aqo jinaraqtaqmi karanpas. 13  Chay runakunaqa manaña promesakunaq junt’akusqanta rikurankuchu chaypas, llapankun wañupunankukama iñiranku. Qhepa tiempomanña chaykunaqa junt’akunan karan chaypas, rikushankumanpas jinan paykunapaqqa karan, chaywanmi paykunaqa kusisqa karanku. Chaymantapas lliumanmi paykunaqa willakuranku maypichus tiyasqanku llaqtapiqa forasterolla, purikuq runakunalla kasqankuta. 14  Chhaynata rimaqqa chay rimasqanwanmi sut’ita rikuchishan may llaqtapichus tiyanqa chayta maskhashasqanta. 15  Ichaqa maymantachus lloqsimuranku chaypi piensashallankuman karan chayqa, ratollachá chayman kutiripunkuman karan. 16  Chay runakunaqa juj allin llaqtatan maskharanku, chay llaqtaqa janaq pachamanta kaqmi. Diosmi chay llaqtataqa paykunapaq preparapuran, chaymi payqa mana p’enqakunchu “Diosníy” ninankuta. 17  Iñisqanraykun Abrahanqa probasqa kashaspa sacrificiopipas jaywashanman karan jinata wawan Isaacwan ruwaran, arí, promesakunata kusisqa chaskiqqa liston kasharan sapallan wawanta sacrificiopi jaywananpaq, 18  Diosña niran: “Mirayniykiqa Isaacmantan jamunqa”, nispa chaypas. 19  Payqa yacharanmi Diosqa wawanta kausarichinanpaq atiyniyoq kasqanta, chaychá wañusqanmantapas kausarimpushanman karan jinata wawantaqa chaskikapuran; chay pasasqanmi rikuchiran qhepaman imachus pasanan karan chayta. 20  Iñisqanraykun Isaacpas Jacobman Esauman ima bendicionta churaran imakunachus qhepaman kanan karan chayta willaspa. 21  Iñisqanraykun Jacobpas wañunan patapiña kashaspa Josepa wawankunaman bendicionta churaran, taunanwan taunaykuspataq Diosta adoraran. 22  Iñisqanraykun Josepas wañunan patapiña kashaspa Israel runakunaman willaran Egipto llaqtamanta lloqsipunankuta, kamachirantaq tullunkunata apapunankupaqpas. 23  Iñisqankuraykun Moisespa tayta-mamanpas kinsa killata payta pakaranku, chaymantapas chay wawaqa munaychan karan, chaymi mana manchakurankuchu reypa kamachisqantapas. 24  Iñisqanraykun Moisespas jatunña kaspa mana munaranchu “Egipto reypa* ususinpa wawan” nisqa kayta. 25  Aswanmi payqa juchapi purispa juj rato kusirikunanmantaqa Diospa llaqtan runakunawan kuska ñak’arichisqa kayta ajllakuran. 26  Diospa ajllasqan kaspa pisichasqa kaytan payqa Egiptopi qhapaq kaykunamanta aswan allinpaq qhawariran, chaymantapas payqa premiota chaskiypin tukuy yuyayninta churaran. 27  Iñisqanraykun payqa mana manchakuranchu reypa phiñakusqantapas, chayraykutaqmi Egiptomantapas lloqsimpuran, chaymantapas mana rikuna Diosta rikushanmanpas karan jinan payqa tukuy imatapas pacienciawan aguantaran. 28  Iñisqanraykutaqmi payqa Pascua fiestamanta kamachikuykunatapas junt’aran, wasi punkuq k’aspinkunatapas yawarwan ch’allaran, chhaynapi Diospa angelnin paykunaq phiwi wawankuta mana wañuchinanpaq. 29  Iñisqankuraykun Israel llaqta runakunapas Puka lamar-qochanta pasaranku ch’aki allpantapas purishankuman karan jinata, Egipto runakunan ichaqa chayninta chimpayta munaspanku llapanku unuq millp’usqan kapuranku. 30  Iñiywanmi Jericó llaqtaq perqankunapas thunikapuran runakuna qanchis p’unchayta muyuykusqanku qhepaman. 31  Iñisqanraykun qhelli kausaypi puriq* Rahabpas qhamiyaq runakunata sumaqta chaskiran, chaymi mana chay llaqtamasin mana kasukuq runakunawan kuskachu wañuran. 32  Maychá kanman jujkunamantawan rimayman chayqa. Manachá tiempopas aypanmanchu Gedeonmanta, Baracmanta, Sansonmanta, Jeftemanta, Davidmanta, jinallataq Samuelmanta, wakin profetakunamantawan rimayman chayqa. 33  Iñisqankuraykun chay runakunaqa reykunata atiparanku, imachus allin kaqta ruwaranku, promesakunata chaskikuranku, leonkunaq siminta wisq’aranku, 34  manchay nina raurayta wañuchiranku, espadawan wañuchinamanta ayqekuranku, pisi kallpa kashaspa kallpasapaman tukuranku, guerrapi allin maqanakuqman tukuranku, ejercitokunatapas phawachiranku. 35  Karanmi wañuqninkuta kausarichisqata chaskiq warmikunapas; wakin runakunataq sinchi ñak’arichisqa karanku, paykunaqa manan munarankuchu iñiyninkuta negaspa libre kaytaqa, chaymi ñak’ariranku, chhaynapi aswan allin kausarimpuyta chaskinankupaq. 36  Wakintaq pruebaman churasqa karanku asipayasqa soq’aykusqa kaspa, paykunaqa watasqa, carcelman wisq’asqa imaraqmi karanku. 37  Wakintaq rumiwan ch’aqesqa, pruebaman churasqa, serruchowan iskayman kuchusqa, espadawan wañuchisqa ima karanku. Wakintaq oveja qarawan, cabra qarawan p’achaykuspa kayman jaqayman puriranku, chaymantapas paykunaqa mana imayoqmi rikukuranku, sinchi llakikuykunapin tarikuranku, ñak’arichisqataqmi karankupas; 38  kay pachaqa manan chay runakunapaq jinachu karan. Chaymantapas chay runakunaqa ch’aki ch’inneqkunapi, orqon q’asanta iman puriranku t’oqokunapi mach’aykunapi* tiyaspanku. 39  Iñisqankuraykun chay runakunamanqa Dios willaran sonqonpaq jina kasqankuta, chaywanpas manan paykunaqa rikurankuchu promesaq junt’akusqantaqa. 40  Chayqa karan aswan allin kaqta noqanchispaq Dios preparapuwasqanchisraykun, chhaynapi chay runakuna mana noqanchismanta t’aqasqachu ch’uya runaman tukuchisqa kanankupaq.

Uraypi willakuykuna

Griego rimaypiqa “ordenpi churasqa kasqanta” ninmi.
Griego rimaypiqa “Faraonpa” ninmi. Chhaynatan niqku Egiptopi reykunata.
Chaypiqa cuerponta vendeq warmimantan rimashan.
Mach’aytaqa “qaqa t’oqo” nillankutaqmi.