Hebreos 10:1-39

  • Animalkunata sacrificiopi jayway manaña valepusqanmanta (1-4)

    • Kamachikuy simiqa qhepaman chayamunan kaqkunaq llanthullanmi (1)

  • Cristoqa jujpaqkaman juj sacrificiollata jaywaran (5-18)

  • Kausayman apaq mosoq ñanmanta (19-25)

    • Amapuni juñunakuyninchiskunata saqenamanta (24, 25)

  • Yuyaypi juchata ama ruwanamanta (26-31)

  • Aguantanapaq allin iñiyniyoq mana pisipaq ima kanamanta (32-39)

10  Kamachikuy simiqa imakunachus qhepaman jamunan karan chay allin kaqkunaq llanthullanmi karan, manan chay allin kaqkunachu; chaymi watan-watan sacrificiokuna jaywakusqanqa mana atinmanchu Diosman achhuykuqkunata mana juchayoqman tukuchiytaqa.  Ichaqa sacrificio ruwaychus Diosta serviqkunata ch’uyaman tukuchinman karan chayqa, manañachá necesitakunmanchu karan ima sacrificiotapas, concienciankupas manañachá paykunataqa imamantapas juchachanmanchu karan.  Ichaqa manan chhaynachu karan, aswanmi chay sacrificiokunaqa watan-watan paykunata yuyarichiran juchasapa kasqankuta.  Chaymantapas torokunaq cabrakunaq yawarninqa manan atinmanchu juchakuna chinkachiytaqa.  Chaymi payqa kay pachaman jamuspa niran: “‘Manan sacrificiotapas ni ofrendatapas munarankichu, aswanmi qanqa juj cuerpota ruwapuwaranki.  Qanqa manan allinpaqchu qhawariranki ruphachina ofrendakunatapas ni juchapaq ofrendakunatapas’.  Chaymi noqaqa nirani: ‘Diosníy, noqaqa munayniykita ruwaqmi jamushani, qelqa k’uyupin noqamantaqa rimashan’, nispay”, nispa.  Rikusqanchis jina, ñaupaqtan payqa niran: “Manan munarankichu ni allinpaqpaschu qhawariranki sacrificiokunatapas, ofrendakunatapas, ni ruphachina ofrendakunatapas, nitaq juchapaq ofrendakunatapas”, nispa. Chay sacrificiokunaqa kamachikuy simiq nisqanman jinan karan.  Chay qhepamantaq niran: “Noqaqa munayniykita ruwaqmi jamushani”, nispa. Paymi ñaupaq kaqta chinkachipuran, jinaspa mosoq kaqta rijurichimuran. 10  Diospa chay ‘munayninman’ jinan noqanchisqa Jesucristoq cuerpon ch’ulla kutillata ofrendapi jaywasqa kasqanwan ch’uyanchasqa karanchis. 11  Sacerdotekunaqa sapa p’unchaymi maypichus llank’anankuman riqku Diospaq llank’anankuwan junt’aq, kaq sacrificiokunallata sapa rato jaywaq ima; ichaqa manan chay sacrificiokunaqa jujpaqkamachu juchataqa chinkachiq. 12  Jesucriston ichaqa juchata chinkachinanpaq jujpaqkama juj sacrificiollata jaywaran, chaymantataq Diospa paña ladonpi tiyaykuran. 13  Chaymantapachan payqa suyashan enemigonkuna chaki sarunanman churasqa kananta. 14  Juj sacrificiollawanmi payqa jujpaqkama mana juchayoqman tukuchipuran pikunachus ch’uyanchasqa kanku chaykunata. 15  Chayqa chhaynapuni kasqanmanta willaspan santo espiritupas nin: 16  “‘Chay p’unchaykuna qhepatan noqaqa paykunawan rimanakusaq. Sonqonkupin kamachikuyniykunata churasaq, yuyayninkupitaqmi qelqasaqpas’ ninmi Jehová Diosqa”, nispa. 17  Nillantaqmi: “Manañan jayk’aqpas yuyarisaqchu juchankutapas ni mana kasukusqankutapas”, nispa. 18  Chay juchakuna perdonasqa kaqtinqa, manañan necesitakunmanchu juchamanta ima ofrendatapas. 19  Chhaynaqa, wayqe-panaykuna, Jesuspa yawarninraykun mana manchakuspa purinanchis ch’uyay-ch’uya parteman jaykuq ñanninta. 20  Chay ñanqa wiñay kausayman apaq mosoq ñanmi, chaytan payqa kichapuwaranchis cortina ukhunta pasaspa, chay cortinaqa paypa cuerponmi. 21  Chaymantapas payqa Diospa wasinmanta encargasqa ancha allin sacerdotenchismi. 22  Chayrayku, ñataq sonqonchispas conciencianchispas mana allinmanta ch’uyanchasqaña kashan* chayqa, cuerponchispas limpio unuwan maqchisqañataq kashan chayqa, tukuy sonqowan junt’asqa iñiywan ima Diosman achhuykusun. 23  Ama iskayaspa lliuman willashallasun suyakuyninchismanta, pichus prometewaqninchisqa rimasqanta junt’aqmi. 24  Chaymantapas, jujkuna-jujkunawan allintapuni reqsinakusun, chhaynapin kallpachanakusunchis astawan munanakunanchispaq ancha allin ruwaykunatapas ruwananchispaqwan. 25  Amapuni juñunakuyninchiskunatapas saqesunchu imaynan wakinkuna saqeshanku jinataqa, aswanpas astawanraq kallpachanakushasun; Diospa p’unchayninpas cercapiñataq kashan chayqa astawanyá chaykunata ruwashasun. 26  Cheqaq kaqta allinta yachashaspachus yuyaypi juchata ruwasunman chayqa, manañan perdonasqachu kasunman, chhayna juchapaq mana ima sacrificiopas kasqanrayku. 27  Aswanmi manchay juiciota, raurashaq phiñakuyta imallaña suyana kanman, chay phiñakuymi Diospa contranpi kaqkunataqa ch’usaqyachipunqa. 28  Pipas Moisespa chaskisqan kamachikuykunata mana kasukuqtaqa iskay otaq kinsa testigoq willakusqanwanmi mana khuyapayaspa wañuchiqku. 29  Chhaynaqa, pipas Diospa Churinta saruchaqqa, ima yawarwanchus ch’uyanchasqa karan chay rimanakuy yawartapas pisi valorniyoqpaq qhawariqqa, Diospa ancha sumaq sonqo kayninta rikuchiq espiritutapas pisichaqqa, aswan castigasqachá kanqa riki. 30  ¿Manachu Diosqa niran: “Noqamanmi tupawan vengakuyqa, noqañan kutichipusaq”, nispa? Chaymantapas simin qelqapin nishan: “Jehová Diosmi llaqtantaqa juzganqa”, nispa. 31  Sinchi manchakuymi kanman kausaq Diospa makinman chayayqa. 32  Amayá qonqankichischu k’anchayta rikusqaykichis qhepaman sinchi ñak’ariypiña kashaspapas imaynatachus tukuy imatapas aguantarankichis chaytaqa. 33  Mayninpin riki qankunaqa lliupa qayllanpi k’amisqa maltratasqa ima kaq kankichis, mayninpitaq chhaynapi tarikushaqkunaq ñak’ariqmasinkuna kaq kankichis. 34  Chaymantapas qankunaqa khuyapayaqmi kankichis riki carcelpi kaqkunatapas, kaqniykichiskunataña qechurasunkiku chaypas, kusisqallan riki kasharankichis; qhepaman imakunatachus chaskinkichis chaykunaqa aswan allin kasqanta, mana tukukuq kasqanta yachaspachá chaytaqa ruwarankichis. 35  Chhaynaqa, ama manchakuspa rimashallaychis, chayta ruwankichis chayqa, ancha allin premiotan chaskinkichis. 36  Diospa promesanta chaskinaykichispaqqa aguantaqpunin kanaykichis, ñaupaqtan ichaqa paypa munaynintaraq ruwanaykichis. 37  “Juj chikantawan” suyasunchis, “pichus jamushan chayqa tiempollanpipunin chayamunqa”. 38  “Chanin runaqa iñisqanraykun kausanqa”, “ichaqa qhepamanchus kutipunqa chayqa, manan paytaqa sumaqtachu qhawarisaq”. 39  Noqanchisqa manan qhepaman kutipuspa wañuyman rishaq t’aqamantachu kanchis, aswanpas iñispa kausayta tariqkuna* t’aqamantan kanchis.

Uraypi willakuykuna

Griego rimaypiqa “ch’aqchusqaña kashan” ninmi. Chaypiqa Jesuspa yawarninwan ch’aqchusqamantan rimashan.
Chaypiqa “almata tariqkuna” nillanmantaqmi.