Filipenses 2:1-30

  • Cristianokuna k’umuykukuq kanankumanta (1-4)

  • Cristoq k’umuykuq kasqanmanta, jatunchasqa kasqanmantawan (5-11)

  • Salvasqa kayman chayanapaq llank’ashanallamanta (12-18)

    • K’anchay jinan kana (15)

  • Timoteowan Epafroditopiwan kachasqa kanankumanta (19-30)

2  Qankunaqa Cristowan jujllachasqataq kashankichis, kallpachanakushankichistaq, munakuywantaq consolanakushankichis, sumaqtataq qhawarinakushankichis, tukuy sonqowantaq munanakushankichis, khuyapayanakushankichistaq kanpas chayqa,  anchatayá kusichiwaychis juj yuyaylla kaspaykichis, jujkuna-jujkunawan munanakuspaykichis, tukuy imapi juj sonqolla kaspaykichis, kaqllata piensaspaykichis ima.  Ama imatapas ruwaychischu cheqnipakuspaqa, imapas kawaqchis jinaraq piensakuspapas; aswanpas k’umuykuywan jujkunata qankunamanta aswan allinpaq qhawariychis.  Amataq munaynillaykichistaqa maskhaychischu, aswanpas jujkunaq munaynintawan maskhaychis.  Imaynachus Cristo Jesuspa yuyaynin karan, chhaynallataq qankunaq yuyayniykichispas kachun,  payqa Dios jinaña karan chaypas, manan jayk’aqpas piensallaranpaschu Dioswan igualakuytaqa;  aswanmi payqa imaynachus kasqanta saqemuspa juj kamachi jina karan. Runamanmi payqa tukuran.  Manan chayllachu, runaman tukuspaqa k’umuykukuqmi karan, wañunankamataqmi kasukuqpas karan; arí, ñak’arina k’aspipi wañupunankaman chhayna karan.  Chayraykun Diosqa aswan allin puestota qoran, sumaq sonqo kayninpitaq lliu sutimantapas aswan allin sutita qoran, 10  chhaynapi janaq pachapi llapa kaqkuna, kay pachapi llapa kaqkuna, allpa ukhupi llapa kaqkunapas Jesusman* qonqorikunankupaq, 11  payqa Dios Yaya jatunchasqa kananpaq Señor kasqanta lliu runa rimarinanpaqwan. 12  Munasqa wayqe-panaykuna, qankunawan kashaqtiyqa kasukuqmi karankichis, qankunawan mana kashaqtiypas aswan kasukuqraqmi kashankichis, chhaynallatapuni manchakuywan khatatataywan ima sapankaykichis llank’ashaychis salvasqa kayman chayanaykichispaq. 13  Diosmi qankunataqa munayninman jina kallpachashasunkichis, chaymi qankunaqa paypa munaynin ruwayta munankichis, chayta ruwanaykichispaqpas atiyta qosunkichis. 14  Ama rimapakuspa, ama discutispa ima tukuy imatapas ruwaychis, 15  chhaynapi mana juchachana mana ima juchayoq kanaykichispaq, kay tiempopi q’ewisqa millay runakuna ukhupipas Diospa wawankuna jinapuni mana ima qhelliyoq kanaykichispaqwan; qankunaqa kay pachapi chay runakunapaqmi k’anchay jina k’anchashankichis. 16  Chaymantapas Diospa kausay qoq siminman allinta jap’ipakuychis, chhaynapi mana yanqapaqchu phawasqayta mana yanqapaqchu chhaynaniraqta llank’asqaytapas yachaspa Cristoq p’unchayninpi anchata kusikunaypaq. 17  Iñiyniykichispa apasqasuykichis sacrificio jaywasqaykichisman, Diospaq servicio ruwasqaykichisman iman noqaqa vino ofrenda jina jich’asqa kashani; chhaynaña kashani chaypas, maytan qankunawanqa kusikuni. 18  Chhaynallatataqmi qankunapas noqawan kusikunaykichis. 19  Señor Jesús munaqtinqa apurayllan Timoteota kachamusaykichis, chhaynapi qankunamanta willawaqtin kallpachasqa kanaypaq. 20  Manan pipas pay jinaqa kanchu, payqa tukuy sonqowanmi qankunata qhawarisunkichis. 21  Jujkunan ichaqa allinnillankuta maskhashanku, manataq Jesucristoq allinnintachu. 22  Yachasqaykichis jina, payqa allintan rikuchishan imayna llank’aqchus kasqanta, imaynan juj wawaqa taytanwan llank’an chhaynatan payqa juj kamachi jina noqawan kuska llank’ashan allin willakuykuna mast’arikunanpaq. 23  Chayraykun paytapuni kachamuyta munashani imachus noqamanta kanqa chayta yacharuspay jina. 24  Señor munaqtinqa noqapas “usqhaylla jamusaq” nishanin. 25  Kunanqa Epafroditotan kachamushasaykichis, payqa wayqeymi, llank’aqmasiymi, soldadomasiy iman, paytan qankunaqa kachamusqankichis noqata serviwananpaq. 26  Payqa maytapunin qankunawan tupayta munashan, ichaqa sinchi llakisqan kashan onqosqanta yachasqaykichismanta. 27  Arí, payqa sinchitapunin onqoykun, yaqallan wañupunpas; ichaqa Diosmi khuyapayaran, noqatapas khuyapayawallarantaqmi, chhaynapi ama llakipas llakipata kanaypaq. 28  Chayraykun noqaqa apuraylla payta kachamushaykichis, chhaynapi payta rikuspa wajmanta kusikunaykichispaq, noqapas amaña sinchi llakisqachu kanaypaqwan. 29  Chhaynaqa, kusikuywanyá payta chaskinkichis, imaynan Señorpa discipulonkunata chaskinkichis jinatapuni, pay jina iñiqmasikunataqa sumaqllatapuni qhawarinkichis. 30  Payqa yaqallan wañuyta tarin Cristoq kamachinta ruwaspa, arí, wañuytapas mana manchakuspan qankunaq rantiykichispi serviwan.

Uraypi willakuykuna

Griego rimaypiqa “Jesuspa sutinman” ninmi.