Efesios 5:1-33

  • Mana qhelli simi kanamanta, limpiota kausanamantawan (1-5)

  • K’anchaypa wawankuna jina purinamanta (6-14)

  • Santo espirituwan junt’a kanamanta (15-20)

    • Manan tiempota usuchinachu (16)

  • Qosakunapaq esposakunapaqwan consejokuna (21-33)

5  Chhaynaqa, Dios jina kaychis paypa munasqa wawankuna kasqaykichisrayku.  Chaymantapas munanakuspa kausaychis imaynan Cristopas munakuwaranchis jinata, payqa noqanchisraykun sumaq q’apaq sacrificio jina, sumaq q’apaq ofrenda jina Diosman entregakuran.  Qankunaqa ch’uya runakunan kankichis, chayrayku amapuni qankuna ukhupi rimayllapas kachunchu qhelli jucha* ruwaymanta, tukuy imaymana millakunapaq kaqkunamanta, sinchi munapayaymantapas;  amallataq kachunchu p’enqay ruwaykuna, mana allin yuyaywan rimaykuna, ni qhelli chansakuykunapas, chaykunaqa manapunin allinchu; aswanpas Diosman graciasta qospallapuni kausaychis.  Qankunaqa allintamá riki yachashankichis qhelli juchapi puriqkunapas, millakunapaq kaqkunata ruwaqkunapas, sinchita munapayaqkunapas manapuni Diospa, Cristoqpa gobiernonman jaykunankutaqa (sinchita munapayaqqa ídolo adoraq jinan).  Amapunin mana valeq rimaykunawanqa engañachikunkichischu, chaykuna jawan Diospa sinchi phiñakuyninqa mana kasukuqkunaman chayamunqa.  Chayraykun paykunawanqa ama chaqrukunkichischu.  Ñaupa tiempopiqa tutayaqpin qankunaqa kasharankichis, kunanmi ichaqa Señorwan jujllachasqa kasqaykichisrayku k’anchaypi kashankichis. Chayrayku k’anchaypi puriqkuna jinapuni kausaychis,  k’anchaymi ruruchin tukuy sumaq sonqo kayta, chanin kayta, cheqaq kayta ima. 10  Allinta reparaychis ima ruwaykunachus Señorpa sonqonpaq jina chayta; 11  amataq ruwaysikuychischu tutayaqpi kaq yanqa ruwaykunataqa, aswanpas sut’iman orqoychis chaykunataqa. 12  Paykunaq pakallapi ruwasqankumantaqa rimayllapas p’enqakunapaqmi. 13  Imapas sut’iman orqosqa kaqqa k’anchaypa orqosqanraykun sut’iman orqosqa kashan, chhaynapitaq chay sut’iman orqosqa kaqkunaqa k’anchay kapun. 14  Chaymi Diospa simin qelqapipas nin: “Yau puñuq runa, rijch’ariy, wañusqakuna ukhumanta jatarimuy, chhaynapi Cristo k’anchaykunasuykipaq”, nispa. 15  Chayrayku, allintapuni qhawarikuychis imaynatachus kausashankichis chayta, amapuni mana yuyayniyoqkuna jinaqa kausaychischu, aswanpas yachayniyoq jinapuni kausaychis 16  tiempoykichista ama usuchispa; kunan kausasqanchis p’unchaykunaqa sinchi mana allinmi kashan. 17  Chayrayku ama mana yuyayniyoq jinaqa kaychischu, aswanpas allinta reparaychis imachus Jehová Diospa munaynin chayta. 18  Chaymantapas aman machankichischu, chayqa sinchi mana allinkunamanmi apasunkichisman; aswanpas santo espirituwan junt’a kaychis. 19  Jujkuna-jujkunawan kallpachanakuychis salmo takikunata takispa, Diosta alabaspa, adorana takikunata takispa ima; sonqoykichispipas tocashawaqchis jinata Jehová Diosmanpas takiychis. 20  Chaymantapas tukuy imaymanamanta Señorninchis Jesucristoq sutinpi Yayanchis Diosman graciasta qollaychispuni. 21  Cristota manchakuspa jujkuna-jujkunawan kasunakuychis. 22  Esposakunaqa qosankuta kasukuchunku, imaynan Señortapas kasukunku jinata. 23  Qosaqa esposaq umanmi, imaynan Cristopas iñiq t’aqaq uman chhayna, chay iñiq t’aqaqa paypa cuerponmi, paytaqmi salvaqninpas. 24  Imaynan iñiq t’aqaqa Cristota kasukun, chhaynallatataqmi esposakunapas qosankuta tukuy imapi kasukunanku. 25  Qosakuna, esposaykichista munakuychis, imaynan Cristopas iñiq t’aqata munakuran jinata, chay iñiq t’aqaraykun payqa wañuranpas. 26  Chaytan payqa ruwaran unuwan jina Diospa simin qelqawan ch’uyanchananpaq, 27  chhaynapi chay iñiq t’aqa paypa ñaupanpi munayllaña, mana ima qhelliyoq, mana ima sip’uyoq,* mana imanasqa ima kananpaq, aswanpas ch’uya mana juchachana kananpaq. 28  Chhaynatan qosakunapas kikin cuerponkuta jina esposankuta munakunanku. Esposanta munakuq runaqa pay kikintan munakun. 29  Manan pipas cuerpontaqa jayk’aqpas cheqnikunmanchu, aswanpas sumaqtan mijuchin, munakuywantaqmi uywanpas, imaynan Cristopas iñiq t’aqapaq ruwan jinata, 30  chaytaqa ruwan paypa cuerponpa miembronkuna kasqanchisraykun. 31  Diospa simin qelqapipas ninmi: “Chayraykun runaqa taytantapas mamantapas saqepunqa, jinaspan esposanman jujllachakapunqa, iskayninkutaq juj aychalla kapunqaku”, nispa. 32  Kay pakasqa yachayqa ancha jatunmi. Chayta nispaqa Cristomanta iñiq t’aqamantawanmi rimashani. 33  Chhaynaqa, qosakuna, sapankaykichis esposaykichista qankuna kikiykichista jinapuni munakuychis; jinallataq qankunapas, esposakuna, qosaykichista anchata respetaychis.

Uraypi willakuykuna

Qhaway “explicasqa simikuna” nisqapi “qhelli jucha” nisqata.
Chaypiqa “mana ima ch’awiyoq” nillanmantaqmi.