Apocalipsis 22:1-21

  • Kausay unu mayumanta (1-5)

  • Tukupay simikunamanta (6-21)

    • “Pi munaqpas gratislla ujachun kausay unuta” (17)

    • “Jamuy, Señor Jesús” (20)

22  Chaymantataq chay angelqa rikuchiwan kausay unu mayuta, chay mayuqa qespi rumi jinan ch’uyallaña kasqa, Diospa trononmanta corderoq trononmantawanmi lloqsimusqapas,  chay llaqtaq jatun callentataqmi jaykushasqapas. Chaymantapas chay mayuq sapanka chimpanpin kasqa kausay sach’akuna, chay sach’akunan sapa watan chunka iskayniyoq kutita cosechata qoq kasqa, arí, sapa killanmi ruruq kasqa, raphinkunataq nacionkunaq qhaliyananpaq kasqa.  Chay llaqtaqa manan ñakasqachu kanqa, Diospa tronon corderoq tronon iman chay llaqta ukhupi kashanqa; kamachinkunataq Diosta servinqaku,  uyantapas rikunqakun, mat’inkupitaq paypa sutinta apanqaku.  Chaymantapas chay llaqtapiqa manañan kanqachu tuta, chaymi manaña necesitakunqachu mecheroq k’anchaynintapas ni intiq k’anchaynintapas, Jehová Diosmi paykunataqa k’anchaykunqa, paykunataq wiñay-wiñaypaq reykuna kanqaku.  Chaymantataq niwan: “Kay simikunaqa confianapaq jinapunin, cheqaqtaqmi kanpas; arí, profetakunata yuyaychaq Jehová Diosmi angelninta kachamuran imakunachus pisi tiempollamanta pasanqa chaykunata kamachinkunaman rikuchinanpaq.  Noqaqa ñan jamusaqña. Kusisqa kachun pipas kay qelqa k’uyupi profeciaq nisqanta kasukuqqa”, nispa.  Noqa Juanmi tukuy chaykunataqa uyarini rikunipas. Chaykunata rikuspay uyarispay iman noqaqa chaykunata rikuchiwaqniy angelpa ñaupanman pampakama k’umuykurani payta adoranaypaq.  Jinan payqa niwan: “¡Imatan ruwashanki! ¡Ama chayta ruwaychu! Noqaqa qanpa kamachimasillaykin kani, wayqeyki profetakunaq kamachimasin, kay qelqa k’uyupi imachus nisqanta kasukuqkunaq kamachimasin imallan kani. Diostan adoranaykiqa”, nispa. 10  Chaymantan niwallantaq: “Aman sellankichu kay qelqa k’uyupi profeciaq imachus nisqankunataqa, señalasqa tiempoqa ñan chayamushanña. 11  Pipas mana allin kaqta ruwaqqa ruwashallachunyá mana allin kaqta, millay qhellita kausaqpas kausashallachun chhayna qhellita; pipas allin kaqta ruwaq ichaqa allin kaqllatapuni ruwashachun, ch’uya kaqpas ch’uyallapuni kashachun”, nispa. 12  “Noqaqa ñan jamusaqña, chaypachan sapankaman pagonta qopusaq imachus ruwasqanman jina. 13  Noqan kani alfapas omegapas,* arí, noqan kani ñaupaq kaqpas qhepa kaqpas, qallariypas tukukuypas. 14  Kusisqa kachunku pampakama p’achankuta t’aqsaqkunaqa, paykunan libre kanqaku kausay qoq sach’akunamanta mijunankupaq, chay llaqtaman punkunta jaykunankupaqwan. 15  Alqokuna,* layqa ruwaypi* puriqkuna, qhelli jucha ruwaypi puriqkuna, runa wañuchiqkuna, ídolo adoraqkuna, llullakuqkuna, chay ruwayta munakuqkuna iman ichaqa jawapi qhepakapunqaku.” 16  “Noqa Jesusmi angelniyta kachamuraykichis iñiq t’aqakunaq allinninpaq lliu kaykunata willanasuykichispaq. Noqan Davidpa saphinqa kani, noqan mirayninpas kani, noqan pacha illarimuypi k’anchaq ch’askapas kani.” 17  Santo espirituwan noviawanmi nishanku: “¡Jamuy!”, nispa. Pipas chayta uyariqqa “¡jamuy!” nichun, pipas ch’akichikuqqa jamuchun; pi munaqpas gratislla ujachun kausay unuta. 18  “Kay qelqa k’uyupi profeciaq imachus nisqanta uyariqkunatan nini: Pipas kay qelqaman imatapas yapaykunqa chayqa, Diosmi payman yapanqa kay qelqa k’uyupi qelqasqa plagakunata. 19  Pipas kay qelqa k’uyupi profeciaq imachus nisqanmanta imatapas orqonqa chayqa, manan Diosqa payman qonqachu kay qelqa k’uyupi imachus qelqasqa kashan chaykunata, manan mijuchinqachu kausay sach’a ruruta, manataqmi jaykuchinqachu chay ch’uya llaqtamanpas. 20  ”Tukuy chaykunata willaqmi nin: ‘Arí, noqaqa ñan jamusaqña’, nispa.” “¡Amén! Jamuy, Señor Jesús.” 21  Llapa ch’uya kaqkunawan kachun Señor Jesuspa ancha sumaq sonqo kaynin.

Uraypi willakuykuna

Alfaqa griego rimaypi qallariy letran karan, omegataq último letra karan.
Chaypiqa rimashan pikunachus Diospa millakusqan ruwaykunata ruwanku chaykunamantan.
Qhaway “explicasqa simikuna” nisqapi “layqa ruwaykuna” nisqata.