Apocalipsis 18:1-24

  • Jatun Babiloniaq urmasqanmanta (1-8)

    • “Llaqtalláy, lloqsipuychis chaymanta” (4)

  • Babilonia llaqtaq urmasqanwan waqasqankumanta (9-19)

  • Babiloniaq urmasqanmanta janaq pachapi kaqkuna kusikunku (20)

  • Babilonia rumi jina lamar-qochaman wijch’uykusqa kananmanta (21-24)

18  Chaykuna qhepatataq rikuruni juj angelta jatun autoridadwan janaq pachamanta uraykamushaqta, lliflli kayninpas lliu allpa pachamanmi k’anchariran.  Paymi fuertetapuni nimun: “¡Urmaykapunñan! Arí, ¡urmaykapunñan jatun Babiloniaqa! Kunanqa supaykunan chaypi tiyapun, chaymantapas millay espiritukuna,* alton phawaq cheqnisqa qhelli animalkuna iman chaypiqa muyushan.  Qhelli jucha ruwayta sinchi munasqan vinowanmi llapa nacionkuna macharan, allpa pachapi llapa reykunataqmi paywanqa qhelli juchatapas ruwaranku, chaymantapas allpa pachapi llapa negocio ruwaqkunan qhapaqman tukuranku chay warmi mana p’enqakuspa imaymana qhapaq kaykunata juñusqanwan”, nispa.  Chayllamanmi janaq pachamanta juj kunka nimullantaq: “Llaqtalláy, lloqsipuychis chaymanta, ama paykunaq juchallikuqmasinqa kaychischu, mana chayqa qankunapas castigasqan kankichis.  Chay warmiq jucha ruwasqanqa janaq pachakamaraqmi tauqasqa kashan, chaymi Diosqa tukuy mana allin ruwasqankunamanta payta juzganqa.  Imaynatachus jujkunata ruwasqanta jina paytaqa ruwaychis, arí, chay ruwasqanmantapas iskay kutitaraq paytaqa ruwaychis. Ujanata preparasqan copapi aswan fuertetaraq paypaq preparapuychis.  Imaynachus jatunchakusqanman jina, imaynachus mana p’enqarikuspa qhapaqyasqanman jina paytaqa ñak’arichispa qaparichiychis. Payqa: ‘Noqaqa reinan kani, manan viudachu kasaq, manataqmi jayk’aqpas waqasaqchu’, nispan sonqonpi nishan.  Chaymi juj p’unchayllapi paypa castigonqa jamunqa, arí, yarqay, waqay, wañuy iman paymanqa chayamunqa, chaymantataq jujpaqkama ninawan kanaykusqa kanqa, juzgaqnin Jehová Diosqa ancha kallpayoq kasqanrayku.  ”Paywan qhelli juchata ruwaq, mana p’enqarikuspa juñusqan qhapaq kaynintapas gastaysiqmasin reykunataq, chay kanaykusqa warmimanta q’osñi lloqsimuqta rikuspanku waqaspa sonqonkuta takakunqaku. 10  Pay jina ñak’arichisqa kayta manchakuspankutaq karullapi sayaykuspa ninqaku: ‘¡Ay, imay sonqon qanta kay pasarusunki! Qanqa jatun llaqtamá karanki, atiyniyoq Babilonia llaqtamá karanki, ¡imaynapitaq juicioykiri juj horallapi chayaramun!’, nispa. 11  ”Allpa pachapi negocio ruwaqkunapas manaña pipas tukuy imaymanankuta rantiqninku kaqtinmi llakisqa paymanta waqaykunqaku. 12  Arí, manañan pipas paykunamanta rantinqachu tukuy ima vendesqanku qorita, qolqeta, sumaq qespi rumikunata, perlakunata, sumaq lino telakunata, pukaniraq azul telakunata, sedamanta telakunata, k’anchaq puka telakunatapas; chaymantapas manañan pipas rantinqachu sumaq q’apaq k’aspimanta tukuy ima ruwasqakunata; jinallataq marfilmanta, ancha sumaq k’aspimanta, cobremanta, fierromanta, mármol rumimanta tukuy ima ruwasqakunatapas. 13  Manallataqmi pipas paykunamantaqa rantinqachu canelata, Indiamanta sumaq q’apaqkunata, inciensota, sumaq q’apaq jawinata, yuraq inciensota, vinota, oliva aceiteta, allin jak’uta, trigota, wakakunata, ovejakunata, caballokunata, carretakunata, kamachikunata, ni runakunatapas. 14  Arí, allin poqosqa frutakuna munapayasqaykiqa manañan kapunchu, tukuy ima sumaqllaña kaqkunapas, tukuy ima k’ancharishaq kaqkunapas manañan qanpiqa kanñachu, manañataqmi jayk’aqpas chaykunaqa qanpiqa kanqañachu. 15  ”Chaymantapas tukuy chaykunata payman vendespa qhapaqyaq negocio ruwaqkunaqa chay warmi jina ñak’arichisqa kayta manchakuspankun karullapi sayaykuspa sinchi llakisqa paymanta waqaykunqaku: 16  ‘¡Ay imay sonqotaq kay jatun llaqtawanri kay pasarun! Sumaq lino p’achawan, pukaniraq azul p’achawan, k’anchaq puka p’achawan, qorimanta adornokunawan, sumaq qespi rumikunawan, perlakunawan ima churaykusqamá payqa puriq. 17  ¡Imaynapitaq juj horallapiri chhaynaniraq qhapaq kaykuna ch’usaqman tukurapun!’, nispanku. ”Barcopi capitankunapas, chaypi viajaqkunapas, barcopi llank’aqkunapas, lamar-qochapi llapa llank’aqkunapas karullapi sayaykuspan 18  chay warmimanta q’osñi lloqsimusqanta rikuspanku ninqaku: ‘¿Ima llaqtataq kay jatun llaqta jina kanman?’, nispa. 19  Jinaspa umankuman allpata jach’iykuspa, sinchi llakisqa qaparinqaku waqanqaku ima: ‘¡Ay, imay sonqotaq kay jatun llaqtawanri kay pasarun! Paywanmá lamar-qochapi llapa barcoyoqkunaqa qhapaqyaranku, ¡imaynapitaq juj horallapiri ch’usaqman tukuchisqa karapun!’, nispanku. 20  ”Chayrayku, ¡kusikuychis qankuna janaq pachapi kaqkuna, ch’uya kaqkuna, apostolkuna, qankuna profetakunapas; qankunaraykun Diosqa chay warmiman juiciota apamun!”, nispa. 21  Chayllamanmi juj kallpasapa ángel juj jatun molino rumiman rijch’akuq rumita oqarispa lamar-qochaman wijch’uykuran, jinaspa niran: “Chhayna wijch’uykusqan kanqa chay jatun Babilonia llaqtaqa, manataqmi jayk’aqpas tarisqachu kanqa. 22  Yau Babilonia llaqta, manañan qanpiqa jayk’aqpas uyarikunqañachu arpawan compañachikuspa takiqkuna, musicokuna, flauta tocaqkuna, ni trompeta tocaqkunapas. Manañan ima artesanopas qanpiqa kanqañachu, manañan molino rumiq kutasqanpas qanpiqa uyarikunqañachu. 23  Manañataqmi qanpiqa ima k’anchaypas k’anchanqañachu, manañan novioq kunkanpas ni noviaq kunkanpas qanpiqa uyarikunqañachu. Qanwan negocio ruwaqkunaqa ancha importante runakunan karanku, layqa ruwasqaykikunawanmi llapa nacionkunapas pantachisqa karanku. 24  Arí, chay llaqtapin tarisqa karan profetakunaq yawarnin, ch’uya runakunaq yawarnin, allpa pachapi mana khuyapayaspa wañuchisqa runakunaq yawarninpas”, nispa.

Uraypi willakuykuna

Chaytaqa “samaykuna” nispapas t’ijrakullanmantaqmi.