Apocalipsis 10:1-11

  • Juj kallpasapa ángel juj juch’uy qelqa k’uyuchayoq (1-7)

    • “Manan unayñachu suyakuna kanqa” (6)

    • Diospa pakasqan yachayqa junt’akapunqan (7)

  • Juch’uy qelqa k’uyuchata Juanpa mijusqanmanta (8-11)

10  Chayllamanmi rikuruni juj kallpasapa angelta phuyuwan p’achasqa* janaq pachamanta uraykamushaqta, umanpin kasqa juj k’uychi, uyanpas inti jinaraqmi kasqa, chakinkunataq raurashaq columnakuna jina kasqa,  makinpitaq paskasqa juch’uy qelqa k’uyuchata jap’isqa. Paña chakintan saruykuran lamar-qochaman, lloq’e chakintataq allpaman,  chaymantataq fuerteta qapariran, leonpas qaparishanman jinaraq, chhaynata qapariqtinmi qanchis rayo t’ojaykuna rimarimuran.  Chay qanchis rayo t’ojaykuna rimamuqtinmi qelqanayña kasharan chayta, chayllamanmi janaq pachamanta juj kunka nimuwan: “Chay qanchis rayo t’ojaykunaq imachus rimamusqantaqa ama qelqaychu, aswanpas sellowan wisq’ay”, nispa.  Lamar-qochaman allpamanwan saruykuqta rikusqay angeltaq janaq pachaman paña makinta oqariran.  Jinaspa wiñay-wiñaypaq kausaqpa sutinpi, arí, janaq pachata llapa chaypi kaqkunatawan, allpa pachata llapa chaypi kaqkunatawan, lamar-qochata llapa chaypi kaqkunatawan kamaqpa sutinpi juraran: “Manan unayñachu suyakuna kanqa.  Qanchis kaq ángel trompetanta tocananña kashaqtinmi, kamachin profetakunaman allin willakuykunata jina Diospa willasqan pakasqa yachayqa junt’akapunqa”, nispa.  Chayllamanmi janaq pachamanta uyarisqay kunkaqa wajmanta nimuwan: “Phaway, lamar-qochaman allpamanwan saruykuq angelmanta chaskimuy chay kichasqa qelqa k’uyuta”, nispa.  Jinan noqaqa chay angelpa kasqanman rispay chay qelqa k’uyuchata mañakuni. Jinan payqa niwan: “Kayqa jap’iy, jinaspa chayta mijuy; wijsaykitan k’arachisunki, simiykipin ichaqa miel jina misk’illaña kanqa”, nispa. 10  Jinan noqaqa chay qelqa k’uyuchata chay angelmanta chaskispay mijurani; cheqaqtan simiypiqa miel jina misk’illaña karan, wijsaytan ichaqa k’arachiwaran. 11  Jinan niwanku: “Wajmanta profetizay llaqtakunamanta, nacionkunamanta, rimaykunamanta, askha reykunamantawan”, nispa.

Uraypi willakuykuna

Chaypiqa “phuyuwan k’uyusqa” nillanmantaqmi.