Gálatas 2:1-21

  • Jerusalenpi apostolkunawan Pabloq juñukusqanmanta (1-10)

  • Pedrota (Cefasta) Pabloq anyasqanmanta (11-14)

  • Pipas iñisqanrayku chaninpaq jap’isqa kananmanta (15-21)

2  Chaymantataq chunka tawayoq wata qhepaman Jerusalén llaqtata rillaranitaq Bernabewan kuska Titota pusariykuspa.  Jerusalentaqa rirani janaq pachamanta kamachisqa kasqayraykun, chaypin allin respetasqa iñiqmasikunaman sapaqllapi willarani waj nacionkunaman allin willakuykuna willashasqaymanta, chaytaqa ruwarani chaykama llank’ashasqay ñaupaq llank’asqaypas allinchus kasharan icha yanqapaqchus kasharan chayta yachanaypaqmi.  Ichaqa noqawan kashaq Titoqa griego runaña karan chaypas, manan kamachisqachu karan qhari kaynin qaracha kuchusqa kananpaqqa.  Chay jawan iñiq t’aqapi rijuriq yanqa iñiqkunaqa mana allinta rimayta qallariranku, paykunan mana reparachikuspalla iñiq t’aqaman jaykumusqaku Cristo Jesusrayku libre kasqanchista qhawaq, chhaynapi kamachikuy simiman watawananchispaq.  Noqaykuqa manapunin paykunataqa ni juj ratollapas kasuraykuchu, chhaynapi cheqaq allin willakuykuna qankunapi kashanallanpaq.  Ichaqa chay allin qhawarisqa iñiqmasikunapas noqamanqa manan ima mosoq yachachikuytapas willawarankuchu. (Paykuna ñaupaqpi imaynaña karanku chaypas, noqapaqqa manan imananpaschu, Diospas manan runataqa rijch’ayninta qhawaspachu juzgan.)  Aswanmi paykunaqa yacharanku, imaynan Pedroqa qhari kayninku qaracha kuchusqa kaqkunaman allin willakuykunata willananpaq churasqa karan, chhaynallataq noqapas qhari kayninku qaracha mana kuchusqa kaqkunaman allin willakuykunata willanaypaq churasqa kasqayta.  Arí, Diosmi Pedroman atiyta qoran qhari kayninku qaracha kuchusqa kaqkunapaq apóstol kananpaq, payllataqmi noqamanpas atiyta qowaran waj nacionkunapaq apóstol kanaypaq.  Jinan paykunaqa Dios ancha sumaq sonqo kayninta rikuchiwasqanta repararanku, chaymi columna jina kaqkuna Santiago, Cefas, Juan ima Bernabeta noqatawan paña makinkuwan llamiykuspa niwaranku: “Allinmi waj nacionkunata willaq rinkichis chayqa, noqaykutaq qhari kayninku qaracha kuchusqa kaqkunaman willasaqku”, nispa. 10  Chaymantataq niwaranku: “Wajcha iñiqmasinchiskunataqa qhawarillankichispuni”, nispa, chayta ruwanaypaqmi noqaqa tukuy atisqayta kallpachakurani. 11  Chaymi noqaqa Antioquía llaqtata Cefas jamuqtin uyanpi anyarani mana allin ruwashasqanmanta. 12  Santiagoq kachamusqan runakuna manaraq chayamushaqtinqa waj nacionkunamanta runakunawan kuskan payqa mijuq, paykuna chayamuqtinkun ichaqa phiñakunankuta manchakuspa manaña waj nacionkunamanta runakunawan kuskachu mijusharan, chay chayamuqkuna qhari kayninku qaracha kuchusqa runakuna kasqankurayku. 13  Wakin iñiq judiokunapas Pedroq iskay uya jina ruwasqantan qatikullarankutaq, hasta Bernabepiwanpas chaytan ruwallarantaq. 14  Chaymi noqaqa mana cheqaq yachachikuyman jinachu ruwashasqankuta reparaspa llapankuq ñaupanpi Cefasta nirani: “Qanqa judío runaña kashaspapas waj nacionkunamanta runakuna jinataq kausashanki chayqa, ¿imaynapitaq waj nacionkunamanta runakunatari tanqashanki judío runakunaq costumbrenta ruwanankupaq?”, nispa. 15  Noqanchis judío runakunaqa manaña waj nacionkunamanta juchasapa runakuna jinachu kanchis chaypas, 16  allintan yachanchis runaqa mana kamachikuy simita junt’asqanraykuchu chaninpaq jap’isqa kananta, aswanpas Cristo Jesuspi iñisqanraykulla chaninpaq jap’isqa kananta. Chaymi Cristo Jesuspi iñinchis, chhaynapi Cristopi iñisqanchisrayku chaninpaq jap’isqa kananchispaq, manataq kamachikuy simita junt’asqanchisraykuchu. Arí, manan pipas kamachikuy simita junt’asqanraykuchu chaninpaqqa jap’isqa kanqa. 17  Cristorayku chaninpaq jap’isqa kayta maskhasqanchisraykuchus jujkuna juchasapata jina qhawariwasunman chayqa, ¿nisunmanchu “Criston juchaman tanqawashanchis” nispa? ¡Manapunin! 18  Ñaupaq tiempopi thunisqay kaqkunatachus wajmanta jatarichishayman chayqa, kamachikuy simitan p’akishayman. 19  Noqaqa kamachikuy simiq yanapayninwanmi kamachikuy simipaq wañurani, chhaynapi Diospaq kausanaypaq. 20  Chaymantapas Cristowan kuskan k’aspipi clavasqa kashani, chaymi manaña noqachu kausashani, aswanpas Criston noqapi kausashan. Chayraykun runa kayniypiqa Diospa Churinpi iñispa kausashani, paymi noqata munakuwaspa noqarayku wañuran. 21  Noqaqa manan Diospa ancha sumaq sonqo kaynintaqa wijch’uykunichu. Kamachikuy simiwanchus pipas chaninpaq jap’isqa kanman chayqa, yanqapaqchá riki Cristoqa wañuran.

Uraypi willakuykuna