Filemón 1:1-25

  • Napaykuy (1-3)

  • Filemonpa munakuyninmanta iñiyninmantawan (4-7)

  • Onesimopaq Pablo favorta mañapusqanmanta (8-22)

  • Despedikusqanmanta (23-25)

 Cristo Jesusrayku preso kashaq noqa Pablon wayqenchis Timoteopiwan kay cartata qelqamushayki qanman, munasqa llank’aqmasiyku Filemón,  jinallataq panayku Apiaman, soldadomasiyku Arquipoman, wasiykipi juñukuq iñiq t’aqamanwan:  Qankunawan kachun Yayanchis Diospa, jinallataq Señor Jesucristoq ancha sumaq sonqo kaynin thaj kayninpas.  Wayqéy Filemón, Diosniymanta mañakushaspa qanta yuyarispayqa “gracias” nillanipunin qanmanta.  Qanqa kusatas Señor Jesuspi iñishanki, tukuy sonqos paytaqa munakunkipas, llapa iñiqmasikunatapas* chhaynatas munakunki, chaytan lliupas willawanku.  Diosmantan mañakuni rikuchishanki chay iñiyniyki sonqoykita kuyurichinanpaq, chhaynapi Cristorayku llapa allin kaqkuna chaskisqanchista reparanaykipaq.  Anchatan kusikuni imayna munakuqchus kasqaykita yachaspay, sonqoypas thajmi kashan; qansi, wayqelláy, iñiqmasikunaq sonqonta llanllarichisqanki.  Chayrayku, Cristoq apostolnin kasqayrayku atiymanña imatachus nimusayki chayta ruwanaykipaq kamachiyta chaypas,  manan chaytachu ruwasaq, aswanmi munakuq kasqaykirayku chayta ruwanaykipaq kallpachayta munashayki. Chaymantapas noqaqa kuraqñan kashani, Cristo Jesusraykun presopas kashani. 10  Waway Onesimopaqmi juj favorta mañakuyta munashayki, paypaqmi noqaqa taytan jina kapurani preso kasqaypi. 11  Ñaupaqpiqa manapaschá imapaqpas payqa servirasunkichu, kunanmi ichaqa qanpaqpas noqapaqpas allin servicioyoq kapun. 12  Paytan kunan kachampushayki, noqaqa tukuy sonqoywanmi paytaqa munakuni. 13  Noqaqa munaymanmi kaypi qhepachiyta, chhaynapi allin willakuykunarayku carcelpi kashanaykama qanpa rantiykipi yanapawashanallanpaq. 14  Ichaqa manan imatapas mana simiykimantaqa ruwayta munaymanchu, chhaynapi ama kamachisqa jinachu imachus valekusqayta ruwanaykipaq, aswanpas tukuy sonqowan chaytaqa ruwanaykipaq. 15  Yaqapaschá kay pisi tiempollapaq* chinkakamusqanqa wiñaypaq qanwan kapunanpaq karan. 16  Ichaqa manañachá kamachi jinañachu qanwanqa kanqa, aswanpas kamachimantaqa aswanraqchá kanqa, munasqa wayqe jinapunichá qanpaqqa kanqa, noqapaqpas chhaynapunin payqa; qanpaqqa astawanraqchá chhayna kanqa kamachiyki kasqanrayku Señorpi iñiqmasiyki kasqanrayku ima. 17  Chayrayku, amigoykita* jinachus rikuwanki chayqa, sumaqtayá payta chaskiykapuway imaynan noqatapas chaskiwankiman jinata. 18  Chaymantapas, ima mana allintaña ruwarasunki chaypas, imapiña manu kasunki chaypas, noqamanta manuchapuway. 19  Kaytaqa noqa kikiy Pablon qelqamushayki; imapiña manu kasunki chaypas, noqan chaytaqa pagapusayki, ichaqa qanpas kikin vidaykimantamá manuy kashanki, chaymantaqa manamá ima niykipaschu. 20  Wayqelláy, Señorwan jujllachasqa kasqanchisraykun valekuyki chaywan yanapaykuwanaykipaq; chhaynapin Cristoq qatikuqnin jina sonqoyta llanllarichiwanki. 21  Qanqa nimusqayman jinapunichá ruwanki, chay nimusqaymantapas astawanraqchá ruwankipas; chhayna kananpi confiaspan noqaqa qelqamushayki. 22  Chaymantapas alistapuwashankiyá maypichus alojakunaypaq. Yaqapas noqapaq mañakusqaykichiswan libre kapuyman, chhaynapi qankunata watukuq jamunaypaq. 23  Cristo Jesusrayku presomasiy Epafrasmi napaykamusunki, 24  napaykamullasunkitaqmi llank’aqmasiy Marcospas, Aristarcopas, Demaspas, jinallataq Lucaspas. 25  Señor Jesucristoq ancha sumaq sonqo kaynin imayna yuyayniyoqchus kasqaykichiswan kachun.

Uraypi willakuykuna

Griego rimaypiqa “ch’uyakunatapas” otaq “santokunatapas” ninmi.
Griego rimaypiqa “juj horallapaq” ninmi.
Griego rimaypiqa “ruwaqmasiykita” ninmi.