3 Juan 1:1-14

  • Napaykuymanta mañakuymantawan (1-4)

  • Gayota Juanpa kallpachasqanmanta (5-8)

  • Ambicioso Diotrefesmanta (9, 10)

  • Demetriomanta allinta rimanku (11, 12)

  • Juanpa visitay munasqanmanta, napaykuy apachisqanmantawan (13, 14)

 Noqa kuraq* runan qanman qelqamushayki, ancha munasqa wayqéy Gayo, qantaqa tukuy sonqoywanpunin munakuyki.  Munasqa wayqéy, Diosmantan mañakuni imaynan tukuy ima ruwasqaykipi ñauparishanki chhaynata ñauparishanallaykipaq qhalilla kanaykipaqwan.  Maytapunin noqaqa kusikuni imaynas qanqa cheqaq yachachikuyta sonqoykipi jap’inki, imaynas chayman jina kausashankipas chayta yachaspay, chaytan willawanku kayman jamuq iñiqmasikuna.  Noqaqa wawaykuna cheqaq kaqpi allinta purishasqankuta yachaspaymi imamantapas astawanqa kusikuni.*  Munasqa wayqéy, mana reqsisqayki iñiqmasikunapaq imaymanata ruwapusqaykiwanmi qanqa rikuchishanki Diospaq junt’aq sonqo kasqaykita.  Paykunan iñiq t’aqaq ñaupanpi willakunku chhayna munakuq kasqaykimanta. Ripuqtinkuqa Diospa munayninman jinayá sumaqta paykunataqa kachapunki.  Paykunaqa Diospa sutinrayku predicaqmi lloqsimunku, manataqmi imatapas waj nación runakunamantaqa* chaskikunkuchu.  Chayraykun noqanchisqa sumaqta paykunataqa chaskinanchis, chhaynapi cheqaq yachachikuyta willaypi llank’aysikunanchispaq.  Iñiq t’aqamanmi juj cartata apachimurani, Diotrefes-si ichaqa kamachiq churakuspa mana respetowanchu chaskin ima nisqaykutapas. 10  Chaymi jamusaq chayqa, noqaykumanta millayta rimasqanta sut’iman orqosaq. Payqa manas contentakunchu chhaynata rimaspapas, aswansi watukamuqkunatapas mana sumaqtachu chaskin, chaskiyta munaqkunatapas jark’ansi, qarqoytas munan iñiq t’aqamantapas. 11  Munasqa wayqéy, aman mana allin ruwaqkunaq ejemplontaqa qatikunkichu, aswanpas allin ruwaqkunaq ejemplontan qatikunkiqa. Pipas allin kaqta ruwaqqa Diosmantan jamun, mana allin kaqta ruwaqmi ichaqa mana Diosta rikunchu. 12  Llapankun Demetriomantaqa allinta rimanku, cheqaq yachachikuyman jina kausasqanpas allintan rikuchin sumaq sonqo runa kasqantaqa, noqaykupas allintan paymantaqa rimayku; yachasqayki jinapas, noqaykuq rimasqaykuqa cheqaqmi. 13  Imaymanatan qanwanqa rimanay kashan, ichaqa manan munaymanchu cartallapi chaykuna qelqamuytaqa. 14  Chaymi qanwan tupayta munashani, chhaynapi uya-uyapura parlarinanchispaq. Thaj kay qanwan kachun. Amigonchiskunan napaykuyta apachimushasunki. Chaypi kaq amigonchiskunatapas sapankankuta napaykapuway.

Uraypi willakuykuna

Chaypiqa “umalliq” nillanmantaqmi.
Chaytaqa “anchata agradecekuni” nispapas t’ijrakullanmantaqmi.
Chaypiqa mana iñiq runakunamantan rimashan.