2 Pedro 3:1-18

  • Burlakuqkunaqa manan creenkuchu juicio p’unchay chayamunanpi (1-7)

  • Jehová Diosqa manan unaymantachu promesantaqa junt’an (8-10)

  • Imayna runachus kanamanta (11-16)

    • Mosoq cielomanta, mosoq pachamantawan (13)

  • Allintan cuidakuna ama pipas pantachiwananchispaq (17, 18)

3  Munasqa wayqe-panaykuna, kaywanqa ñan iskay cartataña qelqamushaykichis; kunanpas ñaupaq apachimusqay cartapi jinan imatapas allin yuyaywan ruwanaykichispaq kallpachamushaykichis, ichaqa yuyarichiq jinallan qelqamushaykichis,  chhaynapi ch’uya profetakunaq ñaupaqmantaña rimasqanta yuyarinaykichispaq, salvawaqninchis Señorpas apostolkunawan* imachus kamachikusqanta yuyarinaykichispaqwan.  Wayqe-panaykuna, ñaupaqtaqa kayta allinta yachaychis: Tukukuy p’unchaykunataqa burlakuq runakunan rijurimunqa, paykunan kausanqaku munasqankuman jina,  ninqakutaq: “‘Jamusaqmi’ nintáq, ¿maytaq jamusqan kanchu? Ñaupa taytanchiskunaq wañusqanmantapachapas kaqllamá imapas kakushan, arí, runata Diospa kamasqanmantapachapas manan imapas cambianchu”, nispanku.  Paykunaqa yuyaypin mana yuyariyta munankuchu imaynas cieloqa ñaupa tiempomantaña karan chayta, imaynas Diospa siminwan allpapas unumanta t’aqasqa kasharan unu chaupipitaq kasharanpas chaytawan.  Chaykunawanmi Diosqa chay tiempopi runakunata wañuchipuran. Chaymi pasaran llapa kay pachata unu millp’uqtin.  Diospa simillanwantaqmi kay tiempopi kaq cielopas kay pachapas ninapaq waqaychasqa kashan, Diosta mana manchakuq runakunapaq juicio p’unchay chayamunankamataqmi kanqapas, chay p’unchaypin chay runakunaqa chinkachisqa kanqaku.  Ichaqa aman kayta qonqankichischu, munasqa wayqe-panaykuna, Jehová Diospa “juj p’unchay” nisqanqa waranqa wata jinan noqanchispaqqa, “waranqa wata” nisqanchistaq juj p’unchay jinalla paypaqqa.  Wakinña piensanku Jehová Dios unaymanta promesanta junt’ananpaq chaypas, manan payqa unaymantachu junt’anqa, aswanmi payqa qankunawan pacienciakushan; chaymantapas payqa manan munanchu pipas wañunantaqa, aswanmi munan lliupas juchankumanta pesapakunanta. 10  Jehová Diospa p’unchayninqa suwa jinan jamunqa, chaypin cieloqa manchay kunununuywan tukupunqa, qallariy kaqkunapas sinchita rupharispan unuyapunqa, kay pachapas chaypi imaymana ruwasqakunapas sut’iman orqosqan kanqa. 11  Tukuy chaykunaqa chhayna unuyachisqataq kanqa chayqa, allinta piensaychis imayna runachus kanaykichis chaypi; qankunaqa ch’uyata kausaq runakunan kanaykichis, Dios sonqo runakuna jinataqmi imatapas ruwanaykichis. 12  Chaymantapas ama qonqaspa makilla suyashaychis Jehová Diospa p’unchaynin chayamunanta, chaypin cieloqa nina rauraywan kanaykusqa kanqa, qallariy kaqkunapas sinchita rupharispan unuyapunqa. 13  Ichaqa paypa prometesqanman jinan mosoq cielo, mosoq pacha ima kanqa, chaypiqa chanin kausayllan kanqa; chaytan noqanchisqa suyakushananchis. 14  Chayrayku, munakusqay wayqe-panaykuna, chaykunatataq suyakushankichis chayqa, tukuy atisqaykichista ruwaychis Diosqa mana ima qhelliyoqta, mana k’iñasqata, paywan sumaq kausashaqta ima tukukuypi tarinasuykichispaq. 15  Chaymantapas Señorninchispa pacienciantaqa salvasqa kanaykichispaqpas pacienciakushanman jinata rikuychis; iñiqmasinchis Pablopas chhaynatan rikuran, chaychá paypas Diospa yuyaychasqan kaspa qelqamurasunkichis 16  tukuy kaykunamanta, arí, lliu cartanpin payqa chaykunamanta qelqamusqa. Ichaqa chay cartakunapi qelqamusqanmanta wakinqa sasa entiendeymi kasqa, chaytan iñiypi mana allin tajasqa, mana yuyayniyoq kaqkunaqa q’ewinku, imaynan Diospa simin wakin qelqakunatapas q’ewinku chhaynata, ichaqa paykuna chinkachisqa kanallankupaqtaqmi chaytaqa ruwashanku. 17  Munasqa wayqe-panaykuna, qankunaqa ñataq chaykunata yachankichisña chayqa, allinta cuidakuychis, paqtataq chay millayta kausaq runakuna pantasqa yachachikuyninkuwan pantachisunkichisman, jinaspa manaña qaqatachu sayawaqchis. 18  Chayrayku wiñashallaychis salvawaqninchis Señorninchis Jesucristoq ancha sumaq sonqo kayninta chaskiypi, jinallataq paymanta yachaypipas. Pay jatunchasqa kachun kunanpas wiñay-wiñaypaqpas. Amén.

Uraypi willakuykuna

Griego rimaypiqa “apostolniykichiskunawan” ninmi.