2 Pedro 2:1-22

  • Llulla yachachiqkuna rijurinanmanta (1-3)

  • Llulla yachachiqkuna juzgasqapuni kanankumanta (4-10a)

    • Wakin angelkunan “Tártaro” nisqaman wijch’usqa karanku (4)

    • Jatun paramanta, Sodoma Gomorra llaqtakunamantawan (5-7)

  • Llulla yachachiqkuna imaynachus kasqankumanta (10b-22)

2  Ichaqa llaqtapiqa kallarantaqmi llulla profetakunapas, chhaynatan qankuna ukhupipas kallanqataq llulla yachachiqkuna. Paykunan mana reparaylla t’aqanakuyman apasunkichis, chaywanmi iñiyniykichista chinkachinqaku. Paykunaqa rantiqninku dueñonkutapas cheqnikunqakun, chhaynapin paykunallataq usqhaylla chinkachisqa kanqaku.  Askhan paykunaq mana p’enqarikuspa purisqankuta qatikunqaku, paykunaq causanpin runakunaqa cheqaq ñanmantapas millayta rimanqaku.  Chaymantapas, sinchi munapayaq kasqankuraykun engañollawan qankunamanta aprovechakunqaku. Ichaqa ñaupaqmantañan paykunaqa juchachasqa karanku, chay juchachasqa kasqankuqa usqhamushanmi, chinkachisqa kanankupas chayamunqapunin.*  Diosqa castigaranmi juchallikuq angelkunatapas, chaymi payqa paykunata “Tártaro”* nisqaman wijch’uykuspa chay sinchi laqhayaq ukhupi cadenakunawan jap’iykachiran, chaypin wisq’arayanqaku juzgasqa kanankukama.  Ñaupa tiempopi runakunatapas* castigaranmi, arí, payta mana manchakuq runakunatan unuwan millp’uchiran, chanin kaqmanta willaq Noetataq qanchis runakunatawan kuskata libraran.  Sodoma llaqtata Gomorra llaqtatapas castigaranmi, usphamanmi chay llaqtakunataqa tukuchipuran, chaywanmi payqa rikuchiran payta mana manchakuq runakunata imachus qhepaman pasanqa chayta.  Chaninta kausaq Lot-tan ichaqa libraran, payqa maytan llakikuq millay kausaq runakunaq mana p’enqarikuspa juchallikusqankuta rikuspa.  Arí, chay chanin runaqa chay sinchi millay runakunawan tiyasqanpin paykunaq imayna kausasqanta rikuq imakuna rimasqankutapas uyariq, chaywanmi payqa sapa p’unchay sinchi llakisqa kaq.  Rikusqanchis jina, Jehová Diosqa yachanmi pay sonqo runakunata pruebamanta librayta, mana allin runakunatataq juicio p’unchaypi chinkachisqa kanankupaq waqaychayta. 10  Astawanqa waqaychan jujkunaq cuerponkuta qhellichaspa puriqkunatan, paykunaqa autoridadtapas pisichankun. Chaymantapas chay mana manchakuq, gustollankuta ruwaq runakunaqa sinchi millaytan rimanku Diospa jatunchasqan runakunamantapas. 11  Angelkunan ichaqa paykunamanta aswan kallpayoqña aswan atiyniyoqña kanku chaypas, Jehová Diosta respetasqankurayku mana paykunata k’aminkuchu. 12  Chay runakunan ichaqa animalkuna jina mana yuyayniyoq kanku, animalkuna jinan imatapas ruwanku, animalkuna jina jap’isqa kaspa wañunankupaqtaqmi nacenkupas. Mana yachasqankumantan paykunaqa millayta rimanku, chhayna kasqankumantan chinkachisqapas kanqaku, 13  arí, mana allin ruwasqankumantan paykunaqa mana allinllawantaq pagasqa kanqaku. Paykunaqa may allinpaqmi rikunku p’unchaypiwanpas aychankuq munasqanman jina kausayta. Chaymantapas paykunaqa p’achapi qhelli jinan kanku, uyapi k’irikuna jinataqmi kankupas, may kusikuywanmi pantasqa yachachiyninkutapas yachachinku qankunawan mijushaspankuqa. 14  Paykunaqa ima jinallañan munashanku jujwan pantayta,* manan aguantakunkuchu jucha ruwaytapas, iñiypi pisi kallpakunaq sonqontapas* suwankun. Sonqonkupas imaymana munapayayman yachasqan kashan, ñakasqa wawakunan paykunaqa kanku. 15  Paykunaqa allin ñanmantan mana allin ñanman pantapunku, Beorpa wawan Balaampa ñanninmanmi jaykupunkupas. Paymi pagota chaskiytapuni munaspa mana allinkunata ruwaran, 16  ichaqa anyasqan karan mana allin ruwasqanmanta. Asnonmi chay profetata runa jina rimapayaran mana yuyaywan ruwashasqanta jark’ayta munaspa. 17  Paykunaqa mana unuyoq pujukunan kanku, sinchi wayraq apakachasqan phuyun kankupas. Sinchi laqhayaq tutan paykunapaqqa waqaychasqa kashan. 18  Paykunaq rimasqankuqa admirakunapaq jinaraqmi, ichaqa ch’usaq simikunatan rimanku. Aychaq munayninta antojachispa, mana p’enqarikuspa imatapas ruwaspanku iman paykunaqa pantasqapi kausaq runakuna ukhumanta chayraq lloqsimuq runakunaq sonqonta suwanku. 19  Paykunaqa “libren kankichis” nispan runakunataqa ninku, ichaqa paykuna kikinkun mana allin kausaypa kamachin kanku; yachasqaykichis jina, pipas piwanpas vencechikuspaqa, chay venceqninpa kamachinmi kapun. 20  Pipas salvaq Señor Jesucristota allinta reqsisqanrayku kay pachapi millay kausaymanta lloqsipushaspa wajmanta chayman kutispa chaywan vencechikuqqa, ñaupaqpi imayna kasqanmantapas aswan mana allinpiraqmi rikukushanman. 21  Allinchá paykunapaqqa kanman karan chay allin ñanta ch’uya kamachikuytawan mana reqsiy, chaykunata reqsishaspaña chaykunamanta karunchakunankumantaqa. 22  Paykunapin junt’akun: “Alqon aqtusqanta kutirpan, bañasqa khuchipas wajmantan t’urupi qhospan”, nisqa rimay.

Uraypi willakuykuna

Griego rimaypiqa “manan puñunqachu” ninmi.
Qhaway “explicasqa simikuna” nisqapi “Tártaro” nisqata.
Griego rimaypiqa “kay pachatapas” ninmi.
Griego rimaypiqa “ñawinkuqa pantay juchawanmi junt’a kashan” ninmi.
Chaypiqa “almantapas” nillanmantaqmi.