2 Corintios 7:1-16

  • Limpio kanamanta (1)

  • Pablo Corintopi iñiqkunarayku ancha kusisqa kasqanmanta (2-4)

  • Titoq allin willakuy apamusqanmanta (5-7)

  • Diospa munayninman jina llakikuyqa arrepientekuymanmi apan (8-16)

7  Munasqa wayqe panaykuna, chaykunatataq Diosqa prometewanchis chayqa, tukuy ima qhellimantayá limpiakusun cuerponchista sonqonchistapas,* chhaynapin Diosta manchakuspa aswan-aswan ch’uya kasunchis.  Sonqoykichista kichariwayku. Noqaykuqa manamá pitapas mana allintaqa ruwaraykuchu, manan pitapas pantachiraykuchu, manallataqmi pimantapas aprovechakuraykuchu.  Chaytaqa manan juchachanaypaqchu nimushaykichis. Ñaupaqpi nisqay jina, qankunaqa sonqoykupin kashankichis, qankunawan kuskan kausasaqkupas wañusaqkupas.  Noqaqa sut’intan imatapas nimushaykichis. Qankunamantan alabakuni, sonqoypas allin kallpachasqan kashan; llakikuypiña kashayku chaypas, ancha kusisqan kashani.  Macedoniaman chayaspaykuqa manan thajchu kasharayku, imaymana sasachakuykunapin tarikusharayku, arí, jawapi kaqkunan sinchita qatikachawasharanku, noqayku ukhupipas llakisqan kasharayku.  Ichaqa llakisqakunata kallpachaq Diosmi kallpachawaranku Titoq chayamusqanwan.  Ichaqa manan chayamusqallanwanchu kallpachawaranku, aswanpas qankuna jawa Titopas kallpachasqa kasqanwan iman kallpachasqa tarikurayku. Paymi willawanku imaynas qankunaqa anchatapuni rikuyta munawashankichis chayta, llakisqa kasqaykichismanta, imaynas qankunaqa noqamanta sinchita llakikunkichis chaytawan; chaykunawanmi noqaqa astawan kusikurani.  Llakichiraykichisña chay apachimusqay cartawan chaypas, noqaqa manan pesapakunichu chaymanta. Arí, qallariypiqa pesapakusharanin chay carta llakichisqasuykichismanta, ichaqa pisi tiempolla llakichisqasuykichisraykun  kunanqa kusisqa kashani. Ichaqa manan llakisqa kasqaykichismantachu, aswanpas chay llakikuyniykichis juchamanta pesapakuyman apasqasuykichismantan. Chhayna llakikuyniykichisqa Diospa munayninman jinan kashan, chayraykun qankunata imapas nimusqaykuqa mana imapipas mana allinniykichispaqchu karan. 10  Diospa munayninman jina llakikuyqa juchamanta pesapakuymanmi apan, chhaynapi salvasqa kanapaq, manataqmi chayqa ñakapakunapaqchu; kay pachaq llakikusqanta jina llakikuymi ichaqa wañuyman apan. 11  Diospa munayninman jina llakikusqaykichismi kallpacharasunkichis tukuy sonqowan imatapas ruwanaykichispaq, ch’uyanchakunaykichispaq, juchata cheqnikunaykichispaq, Diosta manchakunaykichispaq, tukuy sonqowan juchaykichismanta pesapakunaykichispaq, tukuy sonqowan Diosta servinaykichispaq, juchamanta limpiakunaykichispaq ima. Chay juchata allichanaykichispaq tukuy imapas ruwasqaykichisqa allinmi kashan. 12  Qelqamuspayqa manan noqaqa juchata ruwaqraykuchu qelqamurani, nitaq chay jucha jawa mana allinpi tarikuqraykuchu; aswanmi qelqamurani noqaykuta uyariyta munankichischus icha manachus chayta Diospa ñaupanpi sut’ita rikuchinaykichispaq. 13  Chayraykun kallpachasqa kashayku. Kallpachasqa kasqaykumantaqa Titoq kusisqa kasqanta rikuspan astawanraq kusikuyku, anchatapunin paytaqa llapaykichis kallpachamusqankichis.* 14  Noqan Titoq ñaupanpi qankunamanta alabakurani, chay alabakusqayqa manamá yanqapaqchu kasqa; aswanpas imaynan qankunata tukuy ima nimusqaykupas cheqaq karan, chhaynallataqmá qankuna jawa Titoq ñaupanpi alabakusqaykupas cheqaqllataq kasqa. 15  Qankunaq kasukusqaykichista, ancha respetowan chaskisqaykichista ima yuyarispan payqa astawanraq munakusunkichis. 16  Noqaqa allintan yachani tukuy imatapas allinta ruwanaykichista, chaymi kusikuni.

Uraypi willakuykuna

Griego rimaypiqa “aychanchista espiritunchistapas” ninmi.
Griego rimaypiqa “espiritunta kallpachamusqankichis” ninmi.