2 Corintios 6:1-18

  • Manan yanqapaqchu Diospa ancha sumaq sonqo kaynintaqa chaskina (1, 2)

  • Diospaq llank’ayninpi Pablota imakunachus pasasqanmanta (3-13)

  • Mana iñiqkunawan ama jujllachakunamanta (14-18)

6  Chaymantapas Diospa llank’aysiqmasinkuna kasqaykuraykun niykiku: Ama yanqapaqchu Diospa ancha sumaq sonqo kaynintaqa chaskiychis.  Paymi nin: “Chaskina tiempopin uyarirayki, salvana tiempopin yanaparayki”, nispa. Kayqá, kunanmi Diospa chaskinan tiempo kashan, kunanmi salvanan p’unchaypas kashan.  Noqaykuqa manan pitapas urmachinapaq jinachu imatapas ruwayku, chhaynapi Diospaq llank’asqaykumanta ama pipas mana allinta rimashananpaq.  Aswanmi noqaykuqa imaymanakunawan rikuchiyku Diospa kamachinkuna kasqaykuta: Imaymana pruebakunata aguantaspa, imaymana ñak’ariykunapi tarikuspa, pisichikuykunapi tarikuspa, imaymana sasachakuykunapi tarikuspa;  soq’asqa kaspa, carcelkunapi wisq’asqa kaspa, ch’aqwaykunata pasaspa, sinchita llank’aspa, mayninpi mana puñusqa, mayninpi mana mijusqa ima.  Diospa kamachinkuna kasqaykutan rikuchillaykutaq ch’uyata kausaspa, allin yachayman jina imatapas ruwaspa, pacienciawan imatapas aguantaspa, sumaq sonqo kaspa, santo espirituwan pusachikuspa, tukuy sonqowan munakuspa,*  cheqaq kaqta rimaspa, Diospa atiyninman jap’ipakuspa, chanin kaq armakunata paña makipi lloq’e makipi ima jap’ispa;  jatunchasqa kaspa, pisichasqa kaspa; runakunaq k’amisqan kaspa, runakunaq alabasqan kaspa; engañaqkunata jinaña qhawariwaqtinkupas, cheqaq kaqta rimaspa;  mana reqsisqata jinaña qhawariwaqtinkupas, Diospa allin reqsisqan kaspa; wañuyman qarasqaña kashaspapas, Diospa munayninpi kausaspa; castigasqaña kashaspapas, mana wañuchisqa kaspa; 10  khuyayña purishaspapas, kusisqallapuni kaspa; wajchaña kashaspapas, jujkunata qhapaqyachispa; mana imayoqña kashaspapas, tukuy imaymanayoq kaspa ima. 11  Corinto llaqtapi wayqe-panaykuna, noqaykuqa sut’itan imatapas nimushaykiku, tukuy sonqowantaqmi qankunataqa munakuykikupas.* 12  Noqaykuqa manan sonqoykuta wisq’aykuchu qankunapaq, qankunan ichaqa sonqoykichista wisq’awankiku. 13  Noqaqa wawaykunata jinan rimapayamushaykichis, chhaynaqa, imaynan noqayku rikuykiku chhaynatayá qankunapas rikuwayku; sonqoykichista jatunta kichariychis. 14  Amapuni mana iñiqkunawanqa yugomanpas watasqa kashawaqchis jinataqa jujllachakuychischu, chay jujllachakuyqa manan tupanmanchu. ¿Tupanmanchu allin kaq mana allin kaqwan? ¿Imallapipas igualchu kankuman k’anchaywan laqhayaqwan? Manan ¿riki? 15  ¿Imallapipas tupachinkumanchu Cristowan Satanaswan?* ¿Imapitaq igual kankuman iñiq runa mana iñiq runawan? 16  ¿Kanmanchu Diospa wasinpi idolokuna? Noqanchismi kausaq Diospa wasinqa kanchis. Diospunin niran: “Noqan paykuna ukhupi tiyasaq, paykuna ukhupin purisaqpas. Noqan Diosninku kasaq, paykunataq llaqtay kanqaku”, nispa. 17  Jehová Diosqa nillarantaqmi: “Chayrayku lloqsipuychis paykuna ukhumanta, arí, t’aqakuychis paykunamanta, amaña llamiykuychisñachu imachus qhelli kaqta,” “jinan noqaqa chaskisaykichis”, nispa. 18  Tukuy atiyniyoq Jehová Diosqa nillantaqmi: “Noqan qankunaq taytaykichis kasaq, qankunataq churiykuna ususiykuna ima kankichis”, nispa.

Uraypi willakuykuna

Griego rimaypiqa “mana iskay uyawan munakuspa” ninmi.
Chaypiqa “sonqoykutan jatuntaraq kicharimuykichis” nillanmantaqmi.
Chaypiqa “Belialwan” nillanmantaqmi.