2 Corintios 3:1-18

  • Allin rimaq cartakunamanta (1-3)

  • Mosoq rimanakuymanta willaqkuna (4-6)

  • Mosoq rimanakuyqa aswan allin kasqanmanta (7-18)

3  Noqaykuri, ¿yapamantachu qankunaman reqsichikunayku? ¿Necesitaykuchu noqaykumanta allin rimaq cartakunata, imaynan jujkuna necesitanku jinata? ¿Necesitaykuchu chhayna cartakunataraq qankunapas noqaykupaq qelqanaykichista? Manan.  Aswanpas qankunan noqaykuq reqsichikunayku cartaqa kankichis, sonqoykupi qelqasqa carta, llapa runaq reqsisqan leesqan carta.  Qankunaqa Cristoq cartanpunin kankichis, noqayku kamachikunaq qelqasqayku carta; ichaqa manan tintawan qelqasqachu, aswanpas kausaq Diospa espiritunwan qelqasqan; manan rumipi qelqasqachu, aswanpas sonqopi* qelqasqan.  Cristoraykun noqaykuqa mana iskayaykuchu Diospa ñaupanpi kamachi kanaykupaq preparasqa kasqaykumanta.  Ichaqa, manan noqaykuqa kikillaykumantachu preparasqa kashayku ima llank’aytapas aparinaykupaqqa, aswanpas Diosmi preparawanku.  Arí, paymi allinta preparawanku willaqkuna kanaykupaq, ichaqa manan qelqasqa kamachikuymanta willanaykupaqchu, aswanpas mosoq rimanakuymanta* espiritumantawan willanaykupaqmi; qelqasqa kamachikuyqa wañuypaqmi juchachan, espiritun ichaqa kausachin.  Rumikunapi grabasqa wañuyman juchachaq kamachikuyqa ancha lliflli kaywanmi jamuran, chaymi Israel runakunaqa mana Moisespa uyanta qhawaykuytapas atirankuchu uyan sinchita k’anchasqanrayku, ichaqa chay k’anchayqa tukupunallanmi karan.  Chhaynataq chayqa, ¿imaraykutaq espirituq ruwayninri mana aswan lliflli kaywanchu kanman?  Juchachaq kamachikuyqa lliflli kayniyoqtaq karan chayqa, aswan jatun lliflli kayniyoqraqmi chanin kayman apaq llank’ayqa. 10  Kamachikuy simiq lliflli kayninqa manañan imapaschu kapun mosoq rimanakuypa lliflli kayninwan tupanachisqaqa. 11  Chinkapunanpaq kaqqa lliflli kaywantaq jamuran chayqa, mosoq rimanakuyqa aswan jatun lliflli kayniyoqraqmi. 12  Chhayna suyakuyniyoqtaq kanchis chayqa, mana manchakuspan rimashanallanchis. 13  Manataqmi Moisés jinachu ruwananchis, paymi uyanta tapakuran, chhaynapi chinkapunan kaq kamachikuy simiq lliflli kayninta Israel runakuna ama qhawaykunankupaq, 14  ichaqa yuyayninkun tutayapuran. Kunankamapas yuyayninkuqa telawan jinan tapasqallapuni kashan, chaymi manapuni chay ñaupa rimanakuy simitaqa entiendenkuchu; chay telataqa Cristollawanmi llat’akun.* 15  Sonqonkupas kunan p’unchaykaman tapasqallapuni kashan, chaymi mana Moisespa qelqasqankunata entiendenkuchu. 16  Pipas Jehová Diosman kutirikuqtinmi ichaqa chay tapaq tela llat’asqa kapun.* 17  Jehová Diosqa espiritun; maypichus Jehová Diospa espiritun kashan chaypiqa libren imapas. 18  Noqanchisqa manan uyanchis pakasqachu kashanchis, aswanmi espejo jina Jehová Diospa lliflli kayninta k’ancharichishanchis, payqa espiritun. Chayta ruwashananchiskamataq Jehová Diosqa cambiawashanchis payman rijch’akunanchispaq, chhaynapi lliflli kayninta aswan-aswanta k’ancharichinanchispaq.

Uraypi willakuykuna

Griego rimaypiqa “aycha tablapi, arí, sonqopi” ninmi.
Chaypiqa “mosoq acuerdomanta” nillanmantaqmi.
“Llat’akun” nisqa simitaqa “destapakun” nillankutaqmi.
Chaytaqa “destapasqa kapun” nillankutaqmi.