1 Timoteo 1:1-20

  • Napaykuy (1, 2)

  • Pantasqata yachachiqkunamantan cuidakuna (3-11)

  • Diospa ancha sumaq sonqo kayninta Pablo chaskisqanmanta (12-16)

  • Wiñay-wiñay reymanta (17)

  • “Allin kaq guerrapi” maqanakuymanta (18-20)

1  Salvawaqninchis Diospa munayninpi, suyakuy qowaqninchis Cristo Jesuspa munayninpi ima Cristo Jesuspa apostolnin noqa Pablon  qanman qelqamushayki, Señorpi iñiq cheqaq wawáy Timoteo: Qanwan kachun Dios Yayaq, jinallataq Señorninchis Cristo Jesuspa ancha sumaq sonqo kaynin, khuyapayakuynin, thaj kayninpas.  Imaynan Macedonia provinciaman rinay kashaqtin Éfeso llaqtapi qhepakunaykipaq valekurayki, chhaynatan kunanpas valekullaykitaq wakin runakunata anyanaykipaq, chhaynapi ama pantasqa yachachikuykunata mast’arinankupaq,  ama yanqa cuentokunata uyarinankupaq, ni ñaupa taytakunaq sutinkumanta listakunatapas t’aqwishanankupaqwan. Chaykunaqa manan imapaqpas valenchu, manataqmi iñiypi kallpachasqa kanapaq Diospa qosqanpaschu, aswanpas yanqa rimaykunallatan chaykunaqa jatarichin.  Chaykunataqa nimushayki llapanchis ch’uya sonqowan, allin concienciawan, tukuy sonqo iñiywan ima munakuq kananchispaqmi.  Chaykunata mana kasukuspankun wakinkunapas yanqa rimaykunaman urmaranku.  Paykunaqa Diospa kamachikuyninta yachachiqkunamanraqmi tukunkupas, ichaqa manan entiendellankupaschu imachus rimasqankuta, ni sayapakusqanku yachachikuykunatapas.  Ichaqa, yachasqayki jina, kamachikuy simiqa allinmi pipas allinta chayta junt’an chayqa;  chaymantapas kamachikuy simiqa manan chanin runakunapaqchu, aswanmi mana allinkunata ruwaqkunapaq, mana kasukuqkunapaq, Diosta mana manchakuqkunapaq, juchasapakunapaq, mana junt’aq kaqkunapaq, imachus ch’uya kaqta mana respetaqkunapaq, taytankuta wañuchiqkunapaq, mamankuta wañuchiqkunapaq, runa wañuchiqkunapaq, 10  qhelli kausaypi puriqkunapaq, qharipura puñuqkunapaq, runa suwaqkunapaq, llullakunapaq, rimasqankuta mana junt’aqkunapaq, allin yachachikuypa contranpi kaqkunapaq iman; 11  chay allin yachachikuyqa kusisqa Diosmanta jamuq ancha allin willakuykunaman jinan kashan, chaykunata willanaypaqmi noqaqa churasqa karani. 12  Atiy qowaqniy Señorninchis Cristo Jesustan “gracias” nini; paymi junt’aq runapaq qhawariwaspa juj llank’anata qowaran 13  ñaupaqpi Diosta pisichaspa rimaqña karani, jujkunata qatikachaqña karani, millay k’amiqña karani chaypas. Arí, khuyapayasqan noqaqa karani, mana yachaspa mana iñispa imatapas ruwasqayrayku. 14  Señorninchismantan chaskirani ancha sumaq sonqo kayninta, chaskillaranitaqmi iñiyta Cristo Jesuspa munakuynintapas. 15  Cristo Jesusqa juchasapakunata salvaqmi kay pachaman jamuran, chay nisqayqa cheqaqmi tukuy sonqowan chaskinapaq jinataqmi kanpas. Noqataqmi chay juchasapakunamanta aswan juchasapaqa kanipas. 16  Ichaqa khuyapayasqan karani, chhaynapi chhaynaniraq juchasapa kashaqtiy noqawan Cristo Jesús tukuy paciencianta rikuchinanpaq, wiñay kausayta suyakuspa paypi iñiqkunapaq ejemplo kanaypaqwan. 17  Wiñay-wiñay reypaq, arí, mana jayk’aq wañuq,* mana rikuna sapallan Diospaq kachun wiñay-wiñaypaq jatunchaypas qhapaq kaypas. Amén. 18  Chay yachachikuykunatan qanman saqeshayki, wawáy Timoteo, imaynachus qanmanta profetizasqa karan chayman jina; chay profeciakunaq nisqanman jina maqanakushallaypuni allin kaq guerrapi, 19  iñiypi allinta sayaspa allin concienciawan purispa ima; chaytan wakinqa mana valeqpaq jina qhawaripuranku, chhaynapin iñiyninku chinkapuran, imaynan barcopas unuman chinkaykapun chhaynata. 20  Paykunamanta wakinmi kashanku Himeneowan Alejandrowan, paykunatan noqaqa Satanasman entregapuni, chhaynapi wanachisqa kaspanku amaña Diosta pisichaspa rimashanankupaq.

Uraypi willakuykuna

Griego rimaypiqa “mana ismuq” ninmi.