1 Tesalonicenses 4:1-18

  • Qhelli juchapi puriymantan cuidakuna (1-8)

  • Astawanraq munanakunankumanta (9-12)

    • Manan jujkunaq ruwananmanqa metekunachu (11)

  • Cristowan jujllachasqa kaspa wañuqkuna ñaupaqtaqa kausarimpunankumanta (13-18)

4  Wayqe-panaykuna, qankunaqa imaynatachus Diospa sonqonpaq jina kausawaqchis chayta yachachisqaykuman jinan kausashankichis, ichaqa Señor Jesuspa sutinpin kallpachaykiku valekuykiku ima astawanraq chhaynata kausashanaykichispaq.  Qankunaqa allintan yachashankichis riki Señor Jesuspa sutinpi imakunachus kamachisqaykutaqa.  Kaymi Diospa munayninqa: Qankunaqa ch’uyan kanaykichis, t’aqakunaykichismi qhelli juchamantapas.*  Sapankaykichismi yachanaykichis cuerpoykichis kamachiyta, chhaynapi ch’uya kanaykichispaq allin qhawarisqa kanaykichispaqwan.  Ama Diosta mana reqsiq waj nacionkunamanta runakuna jinaqa kaychischu, paykunaqa mana controlakuspan sinchita warminayachikunku qharinayachikunku ima, manan chaykunawanqa amikunkupaschu.  Manapunin pipas chay mana allin ruwaykunataqa ruwananchu, manataqmi iñiqmasinmantapas aprovechakunanchu, chhayna ruwaqkunataqa castiganqan Jehová Diosqa; chaykunamantaqa willaraykikuñan kanpas, kunanpas astawanraqmi nishaykiku chaykunamanta cuidakunaykichispaq.  Diosqa manan millakunapaq kaqkunata ruwananchispaqchu wajamuwaranchis, aswanpas ch’uya kananchispaqmi.  Pipas chay yachachikuykunata mana kasukuqqa santo espirituta qosuqniykichis Diospa contranpin kashan, manan runakunaq contranpichu.  Wayqe-panantin jina munanakuymantaqa manan qelqamunayraqchu, Diosmi imaynachus qankunapura munanakunaykichistaqa yachachishasunkichis. 10  Chaytan Macedonia provinciapi wayqe-panakunawanpas ruwashankichis. Chaywanpas valekuykikun, wayqe-panaykuna, astawanraq chayta ruwashanaykichispaq. 11  Imaynan yachachiraykiku jina, kallpachakuychis thajpi kausanaykichispaq, llank’aq kanaykichispaq, ama jujkunaq ruwananmanpas metekunaykichispaqwan; 12  chhaynapi jawapi kaqkunaq ñaupanpi allinta kausanaykichispaq, ama imapas faltanasuykichispaqwan. 13  Chaymantapas, wayqe-panaykuna, noqaykuqa allintan yachanaykichista munayku imachus wañusqakunawan pasanqa chayta, chhaynapi imaynan mana suyakuyniyoqkuna llakikunku chhaynata ama llakikushanaykichispaq. 14  Jesuspa kausarimpusqanpitaq iñinchis chayqa, iñinallanchistaqmi llapa paywan jujllachasqa kaspa wañupuqkunapas paywan kuska kanankupaq Diospa kausarichimpunanpi. 15  Jehová Diospa siminman jinan kayta niykiku: Noqanchis ukhumanta pikunachus Señorpa chayamusqan tiempokama* kausashaqkunaqa manan wañuypi puñushaqkunamanta ñaupaqtachu oqarisqa kanqaku. 16  Señor kikinmi kamachikuq kunkawan, arcángel* kunkawan, Diospa trompetanwan ima janaq pachamanta uraykamunqa, jinan pikunachus Cristowan jujllachasqa kaspa wañuranku chaykuna ñaupaqta kausarimpunqaku. 17  Chaymantataq noqanchis ukhumanta kausashaqllaraq kaqkunapas phuyu sonqopi oqarisqa kasunchis chay kausarimpuqkunawan kuska tupananchispaq, Señorwan wayrapi tupananchispaqwan, chhaynapin Señorwan kuska wiñaypaq kapusunchis. 18  Chhaynaqa, chay yachachikuykunawan qankunapura llakikuyniykichispi kallpachanakushaychis.

Uraypi willakuykuna

Qhaway “explicasqa simikuna” nisqapi “qhelli jucha” nisqata.
Qhaway “explicasqa simikuna” nisqapi “Cristoq chayamusqan tiempo” nisqata.
Qhaway “explicasqa simikuna” nisqapi “arcángel” nisqata.