1 Pedro 4:1-19

  • Cristo jinan kausana Diospa munayninta ruwanapaqqa (1-6)

  • Tukuy imaymanaq tukukuynin cercapiña kasqanmanta (7-11)

  • Cristiano jina ñak’arinamanta (12-19)

4  Cristoqa aycha cuerpopi kashaspan ñak’ariran, chayrayku qankunapas preparakuychis pay jina piensanaykichispaq; chaymantapas pipas ñak’ariqqa juchamanta t’aqakusqantan rikuchishan,  chhaynapi kausashanankamaqa ama runakunaq munayninman jinachu kausananpaq, aswanpas Diospa munayninman jina kausananpaq.  Chaylla kachun kay pacha runakunaq munayninman jina imaynachus kausasqaykichisqa, arí, chaylla kachun mana p’enqarikuspa jucha ruwasqaykichisqa, mana allin kaqkunata munapayasqaykichispas, sinchita ujaspa purisqaykichispas, sinchi millay fiestakunapi purisqaykichispas, machay fiestakunapi kasqaykichispas, millay idolatría nisqapi purisqaykichispas.  Chay runakunaqa ancha admirasqan kashanku manaña paykunawan kuskachu sinchi millay kausasqankupi purisqaykichismanta, chaymi paykunaqa contraykichispipas millayta rimanku.  Ichaqa, kausaqkunatapas wañusqakunatapas juzgananpaq listo kashaq Cristomanmi chay runakunaqa cuentata qonanku kanqa.  Chaymantapas allin willakuykunaqa wañusqakunamanwanmi* willasqa karan, chhaynapi runakunaq imaynachus qhawarisqanman jinaña juzgasqa kanku chaypas, Diospa qhawarisqanman jina paypa espiritunwan pusachikuspa kausanankupaq.  Ñataq tukuy imaymanaq tukukuynin cercapiña kashan chayqa, allin yuyaywan kausaychis, listollapuni kashaychis Diosmanta mañakunaykichispaqpas.  Astawanqa tukuy sonqowan munanakuychis. Munakuyqa askha juchakunatan pampachan.  Chaymantapas ama rimapakuspalla jujkuna-jujkunawan sumaqta chaskiykunakuychis. 10  Qankunaqa Diospa imaymanapi rikukuq ancha sumaq sonqo kayninta chaskiq allin mayordomokunan kankichis, chayrayku maykamachus Diospa qokuyninta chaskisqaykichisman jina jujkuna-jujkunawan servinakuychis. 11  Pipas rimashaspaqa Diospa willakuynintapas willashanman jina rimachun. Pipas jujkunata serviqqa Diospa qosqan kallpawan chayta ruwachun, chhaynapi Diosqa tukuy imaymanapi Jesucristowan jatunchasqa kananpaq. Arí, Diospaq kachun wiñay-wiñaypaq jatunchasqa kaypas atiypas. Amén. 12  Munasqa wayqe-panaykuna, ama admirakuychischu nina jina kaq sinchi pruebakunapi tarikushasqaykichismantaqa, qankunaqa yachankichismá riki chay pruebakuna kanantaqa. 13  Aswanpas kusikushallaychis maykamachus Cristoq ñak’ariqmasin kashankichis chaymanta, chhaynapi lliflli kaynin rijurimunan tiempopipas anchatapuni kusikunaykichispaq. 14  Chaymantapas, Cristoq sutinraykuchus k’amisqa kashankichis chayqa, kusikuychis, chhayna k’amisqa kasqaykichismi rikuchin qhapaq espíritu, Diospa espiritun qankunapi kashasqanta. 15  Amapuni mayqenniykichispas ñak’arichunchu runa wañuchiq jinaqa, ni suwa jinapas, ni mana allin ruwaq jinapas, ni jujkunaq ruwananman chapukuq jinapas. 16  Ichaqa Cristiano kasqanraykuchus pipas ñak’arishan chayqa, ama p’enqakuchunchu, aswanpas chay sutita apaspa Diosta jatunchashallachun. 17  Kunanmi Diospa juzganan señalasqa tiempoqa qallarishan, wasintataqmi juzgaytaqa qallarishanpas. Chhaynaqa, noqanchistaq ñaupaqta juzgasqa kashanchis chayqa, ¡imaraqchá kanqa Diospa allin willakuyninkunata mana kasukuqkunamantaqa! 18  “Ñak’aytataq allin runapas salvakun chayqa, ¡imaraqchá kanqa Diosta mana manchakuq runamantaqa juchasapa runamantapas!” 19  Chhaynaqa, pipas Diospa munayninta ruwaspa ñak’arishan chayqa, junt’aq kamaqninchisman vidanta* jap’ichikuchun, chaymantapas imachus allin kaqta ruwashallachun.

Uraypi willakuykuna

Chaypiqa juchanku jawa wañusqa jina kashaqkunamantan rimashan. Qhaway Ef 2:1 textota.
Chaypiqa “almanta” nillanmantaqmi.