1 Pedro 1:1-25

  • Napaykuy (1, 2)

  • Wajmanta naceqkunaqa mana kuyuriq suyakuyniyoqmi kanku (3-12)

  • Kasukuq wawakunaqa ch’uya kanankumanta (13-25)

1  Jesucristoq apostolnin noqa Pedron qelqamushaykichis qankuna Ponto, Galacia, Capadocia, Asia, Bitinia ladokunapi ch’eqerisqa kaqkunaman, arí, qankuna forastero jina kausaq ajllasqa kaqkunaman.  Yayanchis Diosmi qankunataqa ñaupaqmantaña imachus yachasqanman jina ajllarasunkichis, santo espirituwantaq ch’uyancharasunkichispas, chhaynapi kasukuq kanaykichispaq, Jesucristoq yawarninwan ch’aqchusqa kanaykichispaqwan. Qankunaman yapasqa kachun Diospa ancha sumaq sonqo kaynin, thaj kayninpas.  Jatunchasqa kachun Señorninchis Jesucristoq Diosnin Yayaqa, paymi ancha khuyapayakuq kayninpi wajmanta nacechimuwaranchis, chhaynapi Jesucristoq kausarimpusqanwan mana kuyuriq suyakuyniyoq kananchispaq,  mana ismuq, mana ima qhelliyoq, mana jayk’aq tukukuq herenciata chaskinanchispaqwan. Chayqa janaq pachapin qankunapaq waqaychasqa kashan,  arí, qankuna iñisqaykichisrayku Diospa atiyninwan cuidasqa kaqkunapaq; payqa cuidashasunkichis salvasqa kanaykichispaqmi, chay salvacionqa tukukuy tiempopin rikukunqa.  Chaychá qankunaqa anchata kusikushankichis, jinaña juj rato imaymana pruebakunaq ñit’isqan kashankichis chaypas; ichaqa kananpunin karan chaykunaqa,  chhaynapi iñiyniykichis allin probasqa kaqtin Jesucristoq rijurimunan tiempopi alabasqa, jatunchasqa, respetasqa kanaykichispaq; chaymantapas allin probasqa iñiyqa ninawan ch’uyayachisqa chinkapuq qorimantapas astawanraqmi valen.  Qankunaqa manaña jayk’aqpas Cristota rikurankichischu chaypas, munakunkichismi paytaqa ¿riki? Manaña kunanpas rikunkichischu chaypas, iñishankichismi paypiqa, anchatataqmi kusikushankichispas mana rimay atina ancha jatun kusikuywanraq ¿riki?  Iñiyniykichisrayku salvasqa kanaykichista allinta yachaspachá chhaynaqa kashankichis. 10  Qankunapaq kaq Diospa ancha sumaq sonqo kayninmanta willaq profetakunapas maytapunin yachayta munaranku chay salvacionmantaqa, chaymi tapukuranku maskharanku ima. 11  Paykunaqa allintan estudiaranku paykunapi kaq santo espirituq willasqan jayk’aqchus ima tiempopichus Cristopi junt’akunan karan chayta, chay espiritun ñaupaqmantaña willaran imaynatachus Cristo ñak’arinan karan chayta, chay qhepaman imayna jatunchasqachus kanan karan chaytawan. 12  Ichaqa Diosmi paykunamanqa reparachiran kamachi jina imachus willasqankuqa mana paykunapaqchu kasqanta, aswanpas qankunapaq kasqanta; chay willasqankutan allin willakuykunata willaqkunaqa qankunaman willarasunkichis janaq pachamanta jamuq santo espirituq atiyninwan. Angelkunapas chaykunataqa yachaytapunin munashanku. 13  Chayrayku yuyayniykichista allinta preparaychis allinta llank’anaykichispaq, allin yuyaywantaq tukuy imatapas ruwaychis, tukuy sonqowan suyakuychis Diospa ancha sumaq sonqo kaynintapas, chaytan qankunaqa chaskinkichis Jesucristo rijurimuqtin. 14  Kasukuq wawakunataq kankichis chayqa, amaña imaynan Diosta manaraq reqsishaspa munasqaykichisman jina kausarankichis chhaynatañachu kausaychis, 15  aswanpas wajasuqniykichis ch’uya Dios jina tukuy imapipas ch’uyatapuni kausaychis. 16  Simin qelqapipunin nin: “Ch’uya kaychis, noqapas ch’uya kasqayrayku”, nispa. 17  Mana pimanpas sayapakuspa sapankaq imachus ruwasqanman jina juzgaq Yayatataq wajakunkichis chayqa, payta manchakuspa kausaychis kay pachapi forastero jina kausashanaykichiskamaqa. 18  Yachasqaykichis jina, qankunaqa manan ismupuq qolqewanchu ni qoriwanchu ñaupa taytaykichismanta chaskisqaykichis mana valeq kausaymantaqa librasqa karankichis, 19  aswanmi qankunaqa mana imanasqa ch’uya cordero jina Cristoq ancha valeq yawarninwan librasqa karankichis. 20  Payqa runakuna manaraq mirayta qallarishaqtinmi* ajllasqa karan, ichaqa qankunaraykun kay tukukuy p’unchaykunapi rijurimuran. 21  Payraykun qankunaqa Diospipas creenkichis, chay Diosmi paytaqa wañusqamanta kausarichimuran jinaspa jatuncharan, chhaynapi qankunaqa chay Diospi iñinaykichispaq paypi suyakunaykichispaqwan. 22  Kunanqa ñataq cheqaq willakuyta kasukuspa ch’uyanchakunkichisña,* chhaynapitaq wayqe panantin jinaña ch’uya sonqowan kausashankichis chayqa, tukuy sonqowanpuni qankunaqa munanakuychis. 23  Qankunaqa wajmantan nacemurankichis, ichaqa manan ismuq mujumantachu, aswanmi qankunaqa wiñaypaq kausaq Diospa siminpa yanapayninwan mana ismuq mujumanta nacemurankichis. 24  “Llapa runapas campopi qora jinallan, sumaq rijch’ayninpas t’ikakuna jinallan. Qoraqa naq’epuspan ch’akipun, t’ikakunapas urmapullanmi. 25  Jehová Diospa rimasqanmi ichaqa wiñay-wiñaypaq”, chay “rimasqanmi” qankunamanqa allin willakuykuna jina willasqa karan.

Uraypi willakuykuna

Chaypiqa rimashan Adán Evaq wawankunamantan.
Chaypiqa “almaykichista ch’uyanchankichisña” nillanmantaqmi.