1 Juan 4:1-21

  • Diosmantachus jamun icha manachus chayta allinta t’aqwinamanta (1-6)

  • Diosta allinta reqsinamanta, payta munakunamantawan (7-21)

    • “Diosqa munakuymi” (8, 16)

    • Munakuqqa manan imatapas manchakunchu (18)

4  Munasqa wayqe-panaykuna, askha llulla profetakunan kay pachantinman rijurimushan, chayrayku ama llapa profeciakunatachu creeychis, aswanpas allintapuni t’aqwiychis chay profeciakuna Diosmantapunichus jamushan icha manachus chayta.  Kaypin yachankichis ima profeciapas Diosmantachus jamun icha manachus chayta: Ima profeciapas Jesucristo runa jina jamusqanmanta riman chayqa, Diosmantan jamushan chay profeciaqa.  Ichaqa ima profeciapas mana Jesusmantachu rimanman chayqa, manan Diosmantachu jamushanman chay profeciaqa. Chaymantapas chay profeciaqa anticristoq* rimayninmi kashanman, yachasqaykichis jina, chhaynatan rimanan karan anticristoqa, ñataqmi kay pachapiqa chhaynataña rimakushanpas.  Wawallaykuna, qankunaqa Diosmantan paqarimurankichis, ñan vencenkichisña paykunatapas, qankunawan jujllachasqa Diosqa kay pachawan jujllachasqa Saqramanta aswan jatun kasqanrayku.  Paykunaqa kay pachamantan paqarimunku, chaymi rimanku kay pacha kaqkunamanta, chaymi kay pacha runakunapas uyarinku paykunataqa.  Noqanchismi ichaqa Diosmantapuni paqarimunchis. Pipas Diosta reqsiqqa uyariwasunmi, pipas mana Diosmantachu paqarimuqmi ichaqa mana uyariwasunchu. Chhaynapin reparanchis mayqen profeciachus cheqaq kasqanta, mayqentaqchus yanqa kasqanta.  Munasqa wayqe-panaykuna, jujkuna-jujkunawan munanakushallasun; munakuyqa Diosmantan paqarimun, chaymantapas pipas munakuqqa Diospa wawanmi, reqsintaqmi Diostapas.  Pipas mana munakuqmi ichaqa mana reqsinchu Diostaqa, Diosqa munakuymi.  Diosqa sapan Churinta kay pachaman kachamusqanwanmi munakuwasqanchista rikuchiran, chhaynapi chay Churinrayku kausayta chaskinanchispaq. 10  Manan noqanchischu Diostaqa munakuranchis, aswanmi pay noqanchistaqa munakuwaranchis, chaymi Churinta kachamuran juchanchisrayku allipunachiy sacrificiota ruwananpaq; chaymi munakuq kayqa. 11  Munasqa wayqe-panaykuna, chhaynatataq Diosqa munakuwanchis chayqa, obligasqan noqanchispas kashanchis jujkuna-jujkunawan munanakunanchispaq. 12  Manan pipas jayk’aqpas rikuranchu Diostaqa. Jujkuna-jujkunawanchus munanakushallasun chayqa, noqanchiswanmi Diosqa kashanqa, munakuyninpas junt’asqan noqanchispi kanqa. 13  Chaymantapas noqanchisqa paywan jujllachasqan kashanchis, paytaq noqanchiswan jujllachasqa kashan, chaytan yachanchis espiritunta qowasqanchispi. 14  Jinaspapas noqaykuqa allintan yachayku Yayaqa kay pacha runakunata salvananpaq Churinta kachamusqanta, chaymantan noqaykuqa rimashaykupas. 15  Pipas tukuy sonqowan “Jesusqa Diospa Churinmi” niqwanmi Diosqa jujllachasqa kashan, chay niqtaq Dioswan jujllachasqa kashan. 16  Noqanchisqa allintamá riki yachanchis Diosqa munakuwasqanchista, manataqmi chaymantaqa iskayananchischu. Diosqa munakuymi, pipas munakuqqa paywan jujllachasqan kashan, Diostaq chay munakuq runawan jujllachasqa kashan. 17  Chayraykun munakuyqa noqanchispi junt’a kashan, chhaynapi juicio p’unchaypi mana manchakuspa rimananchispaq; noqanchisqa imaynan Jesucristopas kashan, chhaynan kashanchis kay pachapiqa. 18  Pipas munakuqqa manan imatapas manchakunchu, chaymantapas junt’asqa munakuyqa manchakuytan wijch’un, manchakuymi ichaqa runata jark’an. Chayrayku, pipas manchakun chayqa, manan munakuyninqa junt’asqaraqchu kashanman. 19  Noqanchisqa Diosta munakunchis ñaupaqtaraq pay munakuwasqanchisraykun. 20  Pipas: “Diostan munakuni” nishaspa wayqenta cheqnikushanman chayqa, llullakushanmanmi. Rikushaspataq wayqenta mana munakushanmanchu chayqa, ¿imaynapitaq mana rikusqan Diostari munakunman? 21  Diospa kamachikuyninman jinaqa, pipas payta munakuqqa munakunallantaqmi wayqentapas.

Uraypi willakuykuna

Qhaway “explicasqa simikuna” nisqapi “anticristo” nisqata.