1 Juan 3:1-24

  • Diospa wawankuna kasqanchismanta (1-3)

  • Diospa wawankunaqa manan igualchu Saqraq wawankunawanqa (4-12)

    • Jesusmi chinkachinqa Saqraq imakunachus ruwasqanta (8)

  • Jujkuna-jujkunawan munanakunamanta (13-18)

  • Diosqa sonqonchismanta aswan jatunmi (19-24)

3  Maytan Yayaqa munakuwanchis, chaychá “Diospa wawankuna” nisqapas kanchis, arí, paypa wawankunan noqanchisqa kanchis. Kay pacha runakunan ichaqa mana payta reqsinkuchu, chaymi noqanchistapas mana reqsiwanchischu.  Munasqa wayqe-panaykuna, noqanchisqa Diospa wawankunaña kanchis chaypas, manan yachanchisraqchu imaynapunichus kasun chaytaqa. Ichaqa yachakunñan pay rijurimuqtinqa pay jina kananchista, chaypachan rikusunchis imaynapunichus payqa chayta.  Pipas chay suyakuyniyoq kaqqa ch’uyanchakunanmi, chhaynapi pay jina ch’uya kananpaq.  Pipas juchapi puriqqa kamachikuykunatan p’akishan, juchaqa kamachikuykunata p’akiymi.  Yachasqaykichis jina, payqa juchanchiskunata apapuqmi jamuran, manataqmi paypiqa ima juchapas kanchu.  Pipas paywan jujllachasqa kaqqa manan juchapiqa purinmanchu, pipas juchapi puriqmi ichaqa mana paytaqa rikunchu ni reqsinpaschu.  Wawallaykuna, paqtataq pipas pantachisunkichisman. Pipas chanin kaqta ruwaqqa chanin runan, imaynan Jesuspas chanin chhayna.  Juchapi puriq runaqa Saqramantan jamun, Saqraqa qallariymantapachan juchapi purishan. Chaymi Diospa Churinqa Saqraq imachus ruwasqankunata ch’usaqman tukuchinanpaq jamuran.  Pipas Diosmanta naceqqa manan juchapiqa purinmanchu, paypi Diospa espiritun* kasqanrayku. Chaymantapas Diosmanta nacemusqanraykun payqa manapuni juchapiqa purinmanchu. 10  Pipas mana chaninta kausaqqa, wayqentapas mana munakuqqa manan Diosmantachu jamun. Chaywanmi sut’ita yachakun pikunachus Diospa wawankuna kasqanta, pikunataqchus Saqraq wawankuna kasqantapas. 11  Chayrayku qankunaqa amapuni qonqankichischu qallariymantapacha uyarisqaykichis willakuytaqa, chay willakuypi nisqan jina, noqanchisqa jujkuna-jujkunawanmi munanakunanchis. 12  Manan Satanasmanta* jamuq Caín jinachu kananchis, paymi mana khuyapayaspa wayqenta wañuchiran. Ichaqa, ¿imanaqtinmi wayqenta wañuchinman karan? Cainqa mana allinllatapunin imatapas ruwaq, chaymi chayta ruwaran; wayqenmi ichaqa allintakama imatapas ruwaq. 13  Wayqe-panaykuna, aman admirakunkichischu kay pacha runakuna cheqnisqasuykichismantaqa. 14  Noqanchisqa wañusqan kasharanchis, kunanmi ichaqa kausashanchis, chaytan rikuchin iñiqmasinchiskunata munakusqanchis. Pipas mana munakuqmi ichaqa wañusqalla kashan. 15  Pipas wayqenta cheqnikuqqa runa wañuchiqmi; yachasqaykichis jina, runa wañuchiqkunaqa manan wiñay kausaytaqa chaskinqakuchu. 16  Imachus munakuy kasqantaqa yachanchis noqanchisrayku Jesucristoq wañusqanwanmi, chaymi noqanchispas obligasqa kashanchis iñiqmasinchiskunarayku wañunanchispaq.* 17  Ichaqa pipas yanapananpaq imanpas kashaqtin pisichikuypi tarikuq wayqenta mana khuyapayanmanchu chayqa, ¿munakushanmanchu chay runa Diosta? 18  Wawallaykuna, ama simillawanchu ni rimayllawanchu munakusunqa, aswanpas tukuy sonqowan imatapas ruwaspa munakuq kasqanchistaqa rikuchisun. 19  Chaypin rikukunqa noqanchisqa cheqaq kaqmanta kasqanchista, manataqmi sonqonchispipas iskayasunchu Dios munakuwasqanchismantaqa. 20  Imamantaña sonqonchis juchachawasun chaypas, yuyarinanchismi Diosqa sonqonchismanta aswan jatun kasqanta, chaymantapas payqa yachashanmi tukuy imatapas. 21  Munasqa wayqe-panaykuna, manachus sonqonchis juchachawasun chayqa, mana manchakuspan Dioswanqa rimasun. 22  Chaymantapas kamachikuyninta kasukusqanchisrayku, sonqonpaq jina kausasqanchisrayku iman payqa tukuy ima mañakusqanchista qowasun. 23  Kaymi Diospa kamachikuyninqa: Churin Jesucristoq sutinpin iñinanchis, noqanchispurataqmi munanakunanchispas, imaynan pay kamachiwaranchis jinata. 24  Chaymantapas, pipas paypa kamachikuyninkunata kasukuqqa paywan jujllachasqan kashan, paytaq chay kasukuqwan jujllachasqa kashan. Qowasqanchis espiritunwantaqmi yachanchis payqa noqanchiswan jujllachasqa kashasqanta.

Uraypi willakuykuna

Griego rimaypiqa “mujun” ninmi.
Griego rimaypiqa “millay kaqmanta” ninmi.
Chaypiqa “almanchista qonanchispaq” nillanmantaqmi.