1 Juan 2:1-29

  • Jesusqa Dioswan allipunachiq sacrificion (1, 2)

  • Diospa kamachikuyninkuna kasukunamanta (3-11)

    • Ñaupa kamachikuymanta, mosoq kamachikuymantawan (7, 8)

  • Imaraykuchus kay carta qelqakusqanmanta (12-14)

  • Kay pachata ama munakunamanta (15-17)

  • “Anticristo” nisqamantan cuidakuna (18-29)

2  Wawallaykuna, kay cartataqa qelqamushaykichis ama ima juchamanpas urmanaykichispaqmi. Ichaqa, pipas ima juchamanpas urman chayqa, kashanmi yanapaqninchis, payqa Jesucriston, payqa chaninmi, Yayawantaqmi kashanpas.  Paymi juchanchista perdonachiq Dioswan allipunachiq sacrificioqa, ichaqa manan juchallanchispaqchu chay sacrificioqa, aswanpas lliu kay pachantin runakunapaqwanmi.  Paypa kamachikuyninkunatachus kasukushallasun chayqa, chay ruwasqanchispin rikukunqa pay reqsisqanchista.  Pipas ninman: “Noqaqa reqsinin paytaqa”, nispa, manataq kamachikusqankunataqa kasukushanmanchu chayqa, llullakushanmanmi, manataqmi cheqaq kaqpas paypiqa kashanmanchu.  Ichaqa pipas paypa siminta kasukushanman chayqa, Diosta tukuy sonqowan munakusqantan chay runaqa rikuchishanman. Chayta ruwaspan noqanchispas rikuchishasunman paywan jujllachasqa kasqanchista.  Pipas: “Paywan jujllachasqan kashani”, nispa niqqa pay kikinmi obligasqa kashan imaynatachus Jesús kausaran chhaynata kausananpaq.  Munasqa wayqe-panaykuna, manan mosoq kamachikuytachu noqaqa qelqamushani, aswanpas qallariymantapacha reqsisqaykichis ñaupa kamachikuytan, arí, kay ñaupa kamachikuyqa qallariypi uyarisqaykichis kamachikuymi kashan.  Chhaynaña chaypas, mosoqmi chay kamachikuyqa; chay kamachikuyman jinan payqa kausaran, qankunapas chayman jinan kausashankichis ¿riki? Laqhayaqqa ñan pasashanña, cheqaq k’anchayñan kunanqa k’ancharimushan.  Chayrayku, pipas “k’anchaypin kashani” nishaspa wayqenta cheqnikushanman chayqa, laqhayaqllapiraqmi payqa kashanman. 10  Pipas wayqenta munakuqmi ichaqa k’anchaypi kashan, manataqmi urmachisqachu kanqapas. 11  Wayqenta cheqnikuqtaqmi ichaqa laqhayaqpi kashan, laqhayaqpitaqmi purishanpas, manan mayman riytapas atinchu chay laqhayaq ñawinta tutayachisqanrayku. 12  Wawallaykuna, kaytaqa qelqamushaykichis paypa sutinrayku juchaykichis perdonasqa kasqanraykun. 13  Taytakuna, kaytaqa qelqamushaykichis pichus qallariymantapacha kaqta reqsisqaykichisraykun. Waynakuna, kaytaqa qelqamushaykichis Satanasta* atipasqaykichisraykun. Wawallaykuna, kaytaqa qelqamushaykichis Yayata reqsisqaykichisraykun. 14  Taytakuna, kaytaqa qelqamushaykichis pichus qallariymantapacha kaqta reqsisqaykichisraykun. Waynakuna, kaytaqa qelqamushaykichis kallpasapa kasqaykichisrayku, Diospa simin qankunapi kasqanrayku, Satanastapas atipasqaykichisrayku iman. 15  Aman munakunkichischu kay pachataqa ni chaypi ima kaqkunatapas, pipas kay pachata munakuqqa, manan Yayataqa munakushanmanchu. 16  Kay pachapi tukuy ima kaqpas manan Yayamantachu jamun, aswanpas kay pachamantan, chaykunan kaykuna: aychaq munapayayninkuna, ñawiq rikusqan munapayaykuna, runakuna imankuwanpas alabakusqankuna ima. 17  Chaymantapas kay pacha kausayqa pasashanmi, jinallataq millay munapayayninkunapas, Diospa munayninta ruwaqmi ichaqa wiñaypaq kanqa. 18  Wawallaykuna, ñan tukukuy horapiña kashanchis; yachasqaykichis jina, anticristoqa* rijurimunanmi karan, ñataqmi askhaña rijurimushankupas, chaymi rikuchin tukukuy horapiña kashasqanchista. 19  Paykunaqa noqanchis ukhumantan lloqsipunku, ichaqa manan noqanchis t’aqamantachu paykunaqa karanku; noqanchis t’aqamantachus kankuman karan chayqa, noqanchiswan kuskallachá kashankuman karan. Paykunaq lloqsipusqankun sut’ita rikuchin mana llapachu noqanchis t’aqamanta kasqanta. 20  Qankunan ichaqa ch’uya Diospa ajllasqan karankichis, llapaykichistaqmi yachayniyoqpas kankichis. 21  Noqaqa qelqamushaykichis manan cheqaq kaqta mana yachasqaykichisraykuchu, aswanpas yachasqaykichisraykun; chaymantapas manan ima llullakuypas cheqaq kaqmantaqa jamunmanchu, chayraykupiwanmi noqaqa qelqamushaykichis. 22  ¿Pitaq llullari? ¿Manachu Jesusqa Cristo kasqanta negaq? Chhayna runan anticristopas, payqa Yayata Churitawanmi negan. 23  Arí, pipas Churita negaqqa manan Yayawan jujllachasqachu kashanman, pipas “noqaqa iñinin Churipi” niqmi ichaqa Yayawan jujllachasqa kashan. 24  Chayraykun qallariypi imachus yachasqaykichisqa sonqoykichispi allin saphichasqa kashanan, chay yachasqaykichischus sonqoykichispi allin saphichasqa kanqa chayqa, jujllachasqallapunin kashankichis Churiwanpas Yayawanpas. 25  Chaymantapas pay kikinmi wiñay kausaytaqa prometewaranchis. 26  Kaykunataqa qelqamushaykichis pikunachus pantachiyta munashasunkichis chaykunamanta cuidakunaykichispaqmi. 27  Qankunataqa Diosmi ajllarasunkichis santo espiritunwan, chay espiritun qankunapiqa kashan, chaymi qankunaqa manaña necesitankichischu pipas yachachinasuykichistaqa, aswanpas chay espiritun qankunamanqa tukuy imatapas yachachishasunkichis, chayqa cheqaqmi manataqmi llullakunchu. Chhaynaqa, chay espirituq yachachisqasuykichisman jina jujllachasqalla paywan kashaychis. 28  Arí, wawallaykuna, paywan jujllachasqallapuni qankunaqa kashaychis, chhaynapin pay rijurimuqtinqa mana manchasqachu rimasunchis, nitaqmi p’enqasqachu qhepaman kutirisunchis. 29  Qankunaqa yachankichismi payqa chanin kasqanta ¿riki? Chhaynaqa yachallankichistaqchá pipas chanin kaqta ruwaqqa Diosmanta nacesqanta.

Uraypi willakuykuna

Griego rimaypiqa “millay kaqta” ninmi.
Qhaway “explicasqa simikuna” nisqapi “anticristo” nisqata.