1 Corintios 9:1-27

  • Pablo apóstol jina allin ejemplo kasqanmanta (1-27)

    • “Aman torotaqa senq’apankichu” (9)

    • ‘Ay imachá noqamanta kanman mana predicaqtiyqa’ (16)

    • “Lliu runaq kamachinmanmi tukupuni” (19-23)

    • Kausay carrerapi phawaq runaqa tukuy imapin cuerponta kamachinan (24-27)

9  ¿Manachu noqaqa libre kashani ima munasqaytapas ruwanaypaq? ¿Manachu noqaqa apóstol kani? ¿Manachu noqaqa Señorninchis Jesusta rikuq kashani? ¿Manachu qankunaqa Señorta servispa llank’asqaykuna kashankichis?  Manaña jujkunapaq apostolchu kani chaypas, qankunapaqqa apostolpunin kani. Qankunan sello jina rikuchinkichis Señorpa apostolnin kasqayta.  Juzgawaqniykunamantan khaynata defiendekuni:  Noqaykuqa atiykumanmi mijunatapas ujanatapas mañakuyta ¿riki?  Noqaykuqa atiykumanmi wakin apostolkuna jina, Señorpa wayqenkuna jina, jinallataq Cefas* jina esposayoq* kayta, jinaspa paywan compañachikuytapas ¿riki?  Icha, ¿noqawan Bernabellawanchu mantenekunaykupaq llank’apakunayku?  ¿Pitaq soldado kashaspa paypa qolqellanwan gastonkunata paganman? ¿Pitaq uvas chajrayoq kashaspa rurunta mana mijunchu? ¿Pitaq ovejakunayoq kashaspa lechenta mana ujanchu?  Chaytaqa manan runaq piensasqanman jinachu rimashani ¿riki? ¿Manachu kamachikuy simipipas chaykunamantaqa rimashan?  Chay kamachikuy simipin Moisés qelqaran: “Aman torotaqa senq’apankichu erata sarushaqtinqa”, nispa. ¿Torokunamantachu Dios llakikun? 10  Icha, ¿noqanchisraykuchu chayta qelqachiran? Arí, noqanchisraykun chayqa qelqasqa karan. Chajra llank’aqwan eraqwanqa tupaqninku ruruta chaskinankupi piensaspan llank’anku ¿riki? 11  Noqaykuqa Diosmanta willakuytataq qankunapi tarpurayku chayqa, ¿manachu atiykuman qankunamanta ima yanapayllatapas cosechayta? 12  Juj runakunapas atinkumantaq qankunamanta yanapay chaskiyta chayqa, ¿manachu noqaykuqa astawanraq atiykuman qankunaq yanapayniykichis chaskiyta? Atiykumanña chay ruwayta chaypas, manan chaytaqa ruwaykuchu, aswanmi tukuy imata aguantayku, chhaynapi Cristomanta allin willakuykunata mana jark’anaykupaq. 13  ¿Manachu yachankichis templopi ch’uya ruwanakunata ruwaqkunaqa templopi kaqkunata mijusqankuta? ¿Manachu yachankichis altarpi llank’aqkunapas altarpi jaywasqa kaqkunamanta wakinta paykunapaq chaskisqankuta? 14  Señorpas kamachikuranmi allin willakuykuna willaqkunaqa chay willasqankumanta kausanankupaq. 15  Chaywanpas manan noqaqa imatapas qankunamantaqa mañakuraykichischu. Chaymantapas manan chayta noqapaq ruwanaykichisraykuchu kaytaqa qelqamushaykichis. ¡Aswanchá wañupuyman mana imatapas mañakuspalla predicasqaymanta jatunchakunayta pipas qechuwananmantaqa! 16  Ichaqa allin willakuykunata willasqaymantaqa manan jatunchakuymanchu, chaytaqa ruwanaypuni kasqanrayku. ¡Ay imachá noqamanta kanman manachus allin willakuykunata willayman chayqa! 17  Tukuy sonqowanchus chayta ruwasaq chayqa, premiotan chaskisaq; manaña noqachu chay ruwayta ajllakurani chaypas, ruwanaypunin chaytaqa, chaypaq churasqa kasqayrayku. 18  Chhaynaqa, ¿imataq premioyri? Premioyqa allin willakuykunata mana imallapaq willaymi, chhaynapi imatapas mañakuymanña chaypas, allin willakuykunata willanayrayku ama mañakunaypaq. 19  Manaña piqpa kamachinchu kani chaypas, lliu runaq kamachinmanmi tukupuni, chhaynapi lliu atisqay runata iñichinaypaq. 20  Chaymi judiokunapaq judío jina kani, chhaynapi judiokunata iñichinaypaq; kamachikuy simi waqaychaqkunapaqpas kamachikuy simitapas waqaychashayman jina kani, noqaqa manaña kamachikuy simita waqaychashanichu chaypas, chhaynapi kamachikuy simi waqaychaqkunata iñichinaypaq. 21  Mana kamachikuy simipi kaqkunapaqpas manapas kamachikuy simipichu kashayman jinan kani, Diospa kamachiyninta Cristoq kamachiyninta imaña ruwani chaypas; chhaynapi mana kamachikuy simipi kaqkunata iñichinaypaq. 22  Pisi kallpayoqkunapaqpas pisi kallpayoqmi kani, chhaynapi pisi kallpayoqkunata iñichinaypaq. Imaymanatan ruwarani imaymana clase runakunata yanapanaypaq, chhaynapi imaynallamantapas paykunata salvanaypaq. 23  Tukuy imaymanatan ruwani allin willakuykunarayku, chhaynapi chay willakuykunata lliuman willanaypaq. 24  ¿Manachu yachankichis carrerapi phawaqkunaqa llapanku phawasqankuta, jujllataq premiotaqa chaskisqanta? Chhaynaqa phawaychis premiota gananaykichispaq jina. 25  Pipas carrerapi* phawaq runaqa tukuy imaymanapin cuerponta kamachin. Paykunaqa ismuq coronata chaskinankupaqmi chayta ruwanku, noqanchismi ichaqa mana ismuq coronata chaskisun. 26  Noqaqa manan yanqapas phawashayman jinachu phawashani, saqmaspapas manan ch’usaqmanchu saqmashani. 27  Aswanmi cuerpoyta maqani jinaspa kamachita jina purichini; mana chayqa paqtapas jujkunata yachachiq kashaspa noqa kikillaytaq Diospa mana allin qhawarisqan kayman.

Uraypi willakuykuna

Chayqa apóstol Pedroq jujnin sutinmi.
Kaypiqa iñiq warmimantan rimashan.
Griego rimaypiqa manan carrerapi phawayllamantachu rimashan, chay jina juj ruwaykunamantawanmi rimashan.