1 Corintios 11:1-34

  • Pabloq ‘ejemplonta qatikunamanta’ (1)

  • Pichus uma kasqanmanta, umata tapakunamantawan (2-16)

  • Señorpa cenanta yuyarinamanta (17-34)

11  Noqaq ejemployta qatikuwaychis imaynan noqapas Cristoq ejemplonta qatikuni jinata.  Wayqe-panaykuna, anchatan agradecekuykichis tukuy imapi yuyariwasqaykichismanta, tukuy imatapas yachachisqayman jinapuni ruwasqaykichismantawan.  Ichaqa kaytan yachanaykichista munani: Criston llapa qhariq umanqa, warmiq umantaq qhari, Cristoq umantaq Dios.  Mayqen qharipas uman tapasqa mañakushanman otaq profetizashanmanpas chayqa, umantan p’enqayman churashanman.  Ichaqa mayqen warmitaqchus q’ara umalla mañakunman otaq profetizanmanpas chayqa, umantan p’enqayman churashanman, chujchan p’aqlasqa warmipas kanman jina.*  Chayrayku pi warmipas mana tapakunqachu umanta chayqa, chujchanta rutukuchun. Ichaqa p’enqaychus paypaq kanqa chujchanta rutuchikuy p’aqlachikuypas chayqa, umanta tapakuchun.  Qhariqa manan umanta tapakunanchu Diospa rijch’aynin kasqanrayku, Diosta jatunchanapaq kasqanrayku ima; warmin ichaqa qharita jatunchanapaq.  Manan qharichu warmimanta kamasqaqa karan, aswanpas warmin qharimanta kamasqa karan.  Chaymantapas, manan qharichu warmirayku kamasqa karan, aswanpas warmin qharirayku kamasqa karan. 10  Chayraykun warmiqa qosanman sujetasqa kasqan señalta umanpi apanan, angelkunarayku iman chaytaqa ruwanallantaq. 11  Señorpi iñiqkuna ukhupiqa qhariqa warmitan necesitan, warmipas qharitan necesitallantaq. 12  Imaynan warmiqa qharimanta kamasqa karan chhaynatan qharipas warmimanta nacemun, ichaqa Diospan tukuy imapas. 13  Qankuna kikiykichis reparaychis: ¿Allintachu juj warmi ruwashanman q’ara umalla Diosmanta mañakuspa? 14  ¿Manachu yachankichis chujchata jatunta wiñachikuyqa qharipaq p’enqay kasqanta, 15  warmipaqtaq ichaqa ancha sumaq kasqanta? Umanta tapananpaqmi warmimanqa chujchata qokun. 16  Ichaqa piña chay ruwayta mana allinpaq qhawarinman chaypas, noqaykupaqpas Diospa iñiq t’aqankunapaqpas manan waj costumbreqa kanchu. 17  Juñunakuyniykichiskunaqa allinniykichispaq kananmantaqa mana allinniykichispaqmi, chayrayku kaykunata nispayqa manan “allinmi” niykichismanchu. 18  ¿Cheqachu juñunakuykunapi t’aqanakuy kashan? Chaytan uyarini, creenitaqmi wakintaqa. 19  Ichaqa kananmi karan t’aqanakuykunaqa, chhaynapi qankuna ukhupi Diospa allin qhawarisqan runakuna sut’i reqsisqa kanankupaq. 20  Señorpa cenanta mijunaykichispaq juñukuspapas manataqsi chayta mijunaykichispaqchu juñukushankichis. 21  Chay cenata mijuna horaspaqqa ñas wakinqa mijusqaña machasqa imaña kashankichis, wakintaqsi ichaqa yarqasqa kashanku. 22  ¿Manachu wasiykichis kan mijunaykichispaq ujanaykichispaqpas? Icha, ¿Diospa iñiq t’aqanta pisichayta munaspachu mana imayoq kaqkunata p’enqachiyta munankichis? ¿Ima nisaykichistaq? ¿“Allintan ruwashankichis” nisaykichischu? Manapunin chaymantaqa “allinmi” niykichismanchu. 23  Noqaqa Señormanta chaskisqaytan willaraykichis, paymi jap’ichisqa kanan tutapi t’antata jap’ispa 24  Diosman graciasta qoran, p’akispataq niran: “Kayqa cuerpoytan representan, chayqa qankunaraykun qosqa kanqa. Kaytaqa ruwallankichispunin noqata yuyariwanaykichispaq”, nispa. 25  Kaqllatataqmi copawanpas ruwaran, cenayta tukuqtinkun niran: “Kay copaqa mosoq rimanakuy* qallarinanpaq yawarniytan representan. Kaytaqa ruwallankichispunin sapa ujaspaykichis, chhaynapi noqata yuyariwanaykichispaq”, nispa. 26  T’antata sapa mijuspaykichisqa copatapas sapa ujaspaykichisqa Señorpa wañusqantan willashankichis, pay jamunankama. 27  Chhaynaqa, pipas t’antata mana respetowan mijushan otaq Señorpa copanta mana respetowan ujashan chayqa, Señorpa cuerpon contra yawarnin contra iman juchallikushan. 28  Chayrayku sapanka sonqonta allinta t’aqwikuchun, chhaynapi chaypaq jinachus kashan icha manachus chayta yachananpaq, chayña t’antataqa mijuchun copatapas ujachun. 29  Pipas mijushanman ujashanmanpas manataq reparanmanchu chay mijusqanqa ujasqanpas Señorpa cuerpon representasqanta chayqa, pay kikillantaqmi juchachasqa kayman churakushan. 30  Chayraykun askha kashankichis pisi kallpa onqosqa ima, askhataq wañusqapas kashankichis.* 31  Ichaqa, allintachus noqanchis kikinchista t’aqwikusun chayqa, manan juzgasqachu kasun. 32  Manachus chayta ruwasun chayqa, juzgasqan kasun; arí, Jehová Diosmi wanachiwasun, chhaynapi mana kay pachawan kuskachu juchachasqa kananchispaq. 33  Chhaynaqa, wayqe-panaykuna, mijunaykichispaq juñunakuspaqa suyanakuychis. 34  Pipas yarqasqa kashan chayqa, wasinpi mijuchun, chhaynapi juñunakuyniykichisqa ama juiciopaqchu kananpaq. Wakin asuntokunataqa chayamuspayñan qhawarisaq.

Uraypi willakuykuna

Corinto llaqtapiqa qhelli juchaman urmaq warmikunatan p’aqlata rutuqku, chaymantan Pabloqa kaypi rimashan.
Chaypiqa “mosoq acuerdo” nillanmantaqmi.
Kaypiqa manan cheqaq wañuymantachu rimashan, aswanpas Dioswan manaña allinpichu kasqankumantan rimashan.