Kichay leenaykipaq

Jehová Diospa testigonkuna

Simita akllay quechua (Cusco)

¿Imapin creenku Jehová Diospa testigonkuna?

Jehová Diospa testigonkunaqa Jesuspa kamachisqanman jina imatapas ruwanaykupaqmi kallpachakuyku, chaytan apostolninkunapas ruwaranku. Kaypin juj chikanta yachanki imakunapis creeyku chayta.

  1. Dios. Noqaykuqa tukuy imata kamaq Diostan adorayku, paypa sutinmi Jehová (Salmo 83:18; Apocalipsis 4:11). Paymi Abrahampa, Moisespa, Jesuspa Diosninqa (Éxodo 3:6; 32:11; Juan 20:17).

  2. Biblia. Noqaykupaqqa Bibliapin kashan Diospa palabran, chaywanmi payqa runakunata rimapayashan (Juan 17:17; 2 Timoteo 3:16). Chay Bibliapin kashan 66 librokuna, chaytan nikullantaq “Ñaupa Testamento” “Mosoq Testamento” nispa. Chaypi imachus nisqanman jinan noqaykuqa imapipas creeyku. Chaymanta rimashaspan juj profesor niran: “Jehová Diospa testigonkunaqqa Bibliapi imachus nisqanman jinan imapipas creesqankuqa kashan, manan imatapas cambiankuchu ni munayninkuman jinachu imatapas q’ewirinku” nispa. *

    Noqaykuqa llapa Bibliapiña creeyku chaypas manan ima costumbremanchu k’askapakuyku. Chaymantapas Bibliapi wakin partekunaqa comparacionkunapi rijch’anachiykunapi iman kashan, chaymi mana imatachus nishan chayman jinapunichu chaykunataqa entiendena (Apocalipsis 1:1).

  3. Jesús. Noqaykuqa Jesuspa yachachisqanman jinan imatapas ruwayku, paypa ejemplontan qatikuyku. Chaymantapas salvaq kasqanrayku, Diospa wawan kasqanrayku iman tukuy sonqo respetayku paytaqa (Mateo 20:28; Hechos 5:31). Chhaynapin rikuchiyku noqaykuqa cristiano kasqaykuta (Hechos 11:26). Ichaqa Bibliapiqa manan maypipas ninchu “Jesusqa tukuy atiyniyoq Diosmi” nispaqa, manan ni rimanpaschu “santísima trinidad” nisqamantapas (Juan 14:28).

  4. Diospa gobiernon. Chay gobiernoqa janaq pachapin kashan, manan piqpa sonqonpichu kashan. Chay gobiernon jaykunqa llapa kay pachapi gobiernokunaq rantinta, chhaynapin junt’akunqa imatachus Dios kay pachapaq munaran chay (Daniel 2:44; Mateo 6:9, 10). Chaykunaq pasanan tiempoqa ñan chayamushanña, Bibliapi nisqan jina ‘tukukuy p’unchaykunapiñan’ kashanchis (2 Timoteo 3:1-5; Mateo 24:3-14).

    Chay Diospa gobiernonpiqa Jesusmi gobiernashan, 1914 watamantapachañan payqa gobiernamushan (Apocalipsis 11:15).

  5. Salvasqa kaymanta. Jesús vidanta sacrificiopi qosqanraykun runakuna juchamanta wañuymantawan librasqa kanqaku (Mateo 20:28; Hechos 4:12). Chayta chaskinapaqmi ichaqa Jesuspi iñina, vidanchista cambiana bautizakuna ima (Mateo 28:19, 20; Juan 3:16; Hechos 3:19, 20). Imayna kausasqanwantaqmi pipas rikuchinan iñishanchus manachus chayta (Santiago 2:24, 26). Ichaqa salvasqaqa kasun manan imatapas ruwasqanchisraykuchu, aswanmi chaytaqa chaskisun “Diospa ancha sumaq sonqo” kasqanrayku (Gálatas 2:16, 21).

  6. Janaq pacha. Jehová Diospas, Jesuspas, angelkunapas janaq pachapin tiyanku (Salmo 103:19-21; Hechos 7:55). * Janaq pachamanmi rinqaku juj pisi t’aqa runakunapas Jesuswan kuska gobiernamunankupaq, llapanpiqa kanku 144.000 runakunan (Daniel 7:27; 2 Timoteo 2:12; Apocalipsis 5:9, 10; 14:1, 3).

  7. Kay pacha. Diosmi kay pachataqa kamaran runakuna chaypi wiñaypaq tiyanankupaq (Salmo 104:5; 115:16; Eclesiastés 1:4). Chaymi payqa kasukuq runakunata kay pachapi wiñaypaq tiyachinqa, chaypiqa manan onqoypas kanqachu sumaq huertamantaqmi kay pachaqa tukupunqapas (Salmo 37:11, 34).

  8. Millay kausaywan llaki kausaypiwan. Bibliaq willasqan jina, millay kausaypas llaki kausaypas juj angél Diospa contranpi jatarisqan kausan rijurimuran (Juan 8:44). Chay angeltan nikullantaq “Saqra” “Satanás” nispa. Paymi ñaupa tayta-mamanchista engañaran payta qatikunankupaq, chaywanmi mana allin kausay rijurimuran (Génesis 3:1-6; Romanos 5:12). Diosqa jinallatan qhawaran millay kausay kananta llaki kausay kanantapas, chhaynapi Satanasqa yanqa rimaq kasqanta sut’iman orqonanpaq; ichaqa manan wiñaypaqchu chhayna kausayqa kanqa.

  9. Wañuy. Wañusqaqa wañusqan kashan, manañan imanpas kausanñachu (Salmo 146:4; Eclesiastés 9:5, 10). Manan ima nina rauraypichu ñak’arishanku.

    Askha runakunatan Dios kausarichimpunqa (Hechos 24:15). Ichaqa manachus munanqaku Diospa munayninman jina kausayta chayqa wiñaypaqmi wañuchisqa kanqaku, manañan paykunaqa jayk’aqpas kutimunqakuñachu (Apocalipsis 20:14, 15).

  10. Familia. Diosmi casado kausaytaqa qallarichiran, payqa qharita warmitawan kamaspan kuskata tiyachiran. Chaymantapas mayqenninkupas jujwan pantallaqtinmi divorciakunanku (Mateo 19:4-9). Bibliapiqa ancha sumaq consejokunan kashan familiakuna sumaqta kausanankupaq (Efesios 5:22–6:1).

  11. Diosta imayna adorasqaykumanta. Noqaykuqa manan cruztachu ni ima idolotachu adorayku (Deuteronomio 4:15-19; 1 Juan 5:21). ¿Imakunatan ruwayku? Chaytan kunan yachanki, noqaykuqa:

  12. ¿Imayna organizasqan kashayku? Noqaykuqa t’aqa-t’aqapin juñukuyku, sapanka t’aqatataq “iñiq t’aqa” nikun. Sapanka iñiq t’aqatan qhawarin juj grupo hermanokuna paykunatan nikun “umalliq” nispa, paykunaqa manan jujkunamanta aswan jatunpaq qhawarisqachu kanku nitaqmi ima pagotapas chaskinkuchu (Mateo 10:8; 23:8). Noqaykuqa manan ima diezmotapas ni ima ofrendatapas churaykuchu (2 Corintios 9:7). Aswanmi sapanka churan imaynatachus sonqonpi yuyaykusqanman jina, manataqmi mayqenpas yachanchu pipas jayk’a churasqantapas.

    Juj grupo umalliqkunan qhawarinku pachantinpi Testigokunaq llank’asqankuta, paykunatan nikun “umalliq t’aqa” nispa, Estados Unidospi jatun oficinamantataqmi lliuta dirigemushankupas.

  13. Jujllan kayku. Maymantaña kayku chaypas noqaykuqa juj yuyayllan kayku (1 Corintios 1:10). Imayna clase runaña kayku chaypas, may llaqtayoqña kayku chaypas, imayna colorña kayku chaypas kallpachakuykun juj sonqolla kanaykupaq (Hechos 10:34, 35; Santiago 2:4). Chhaynaña kayku chaypas sapankaykun libre kayku concienciaykuman jina imatapas decidinaykupaq (Romanos 14:1-4; Hebreos 5:14).

  14. ¿Imaynan kayku? Noqaykuqa tukuy atisqaykutan kallpachakuyku tukuy imatapas munakuywan ruwanaykupaq (Juan 13:34, 35). Chaymantapas manan munaykuchu Diosta phiñachiyta, chaymi yawarwanqa mana ima mana allintapas ruwaykuchu ni churachikuykupaschu (Hechos 15:28, 29; Gálatas 5:19-21) Manan guerrakunapipas participaykuchu (Mateo 5:9; Isaías 2:4). Respetaykun gobiernokunatapas, kasukuykutaqmi ima kamachisqankutapas, ichaqa Diospa kamachikusqan contrachus ima kamachisqankupas kashanman chayqa Diospa kamachisqantan kasukuyku (Mateo 22:21; Hechos 5:29).

  15. ¿Imaynatan jujkunawan apanakuyku? Jesusmi niran: “Runamasiykitan munakunki qan kikiykita jina”, nispa. Ichaqa discipulonkunamanta rimashaspan nillarantaq: “Manan kay pachamantachu kanku”, nispa (Mateo 22:39; Juan 17:16). Chaymi noqaykuqa lliupa allinnintaña maskhayku chaypas mana participaykuchu ni politicapipas ni juj religionkunaq ima ruwasqankupipas (Gálatas 6:10; 2 Corintios 6:14). Ichaqa respetaykun jujkunaq imapas ruwasqankutaqa (Romanos 14:12).

Imakunapichus creesqaykumanta astawan yachayta munanki chayqa, internetpi paginaykuman jaykuy. Munaspaykiqa qelqawaqmi sucursalniykumanpas, atiwaqmi juñunakuyniykuman riytapas, mana chayqa wasi qayllaykipi testigokunata tapurikuy.

^ párr. 4 Qhaway Jason BeDuhn profesorpa qelqasqan librota, 165 paginapi. (Truth in Translation)

^ párr. 10 Millay angelkuna janaq pachamantaña wijch’usqa karanku chaypas, kausashankuraqmi espiritu cuerpowan (Apocalipsis 12:​7-9).