Kichay leenaykipaq

Jehová Diospa testigonkuna

Simita akllay quechua (Cusco)

Sonqota kusirichiq videokuna

Wawakunapaq Jehová Diospa amigon kay nisqa videokunata qhawaspan Malasia nacionmanta juj tayta niran: “Jehová Diospas tayta mamakunaq sonqonta leerunman karan jinatan piensani chay videokunata qhawaspay”, nispa.

Chay videokunaqa Carlitosmanta familianmantawanmi kashan, chaykunataqa llapantan Jehová Diospa testigonkuna ruwanku. JW.ORG nisqa paginaman jaykunki chayqa, llapa chay videokunatan chaypi tarinki. Chay videokunaqa kusapunin wawakunata educanapaq chhaynapi allin yuyaywan imatapas ruwanankupaq Diosta reqsinankupaq ima. Jujnin videon kashan imaynapis suwakuyqa mana allinchu chaymanta, jujnintaq imaynatas Diosmanta mañakuna chaymanta.

Lliu wawakuna yachanankupaqmi ñaupaq kaq videoqa ña 131 simi rimaykunapiña lloqsimushan.

Lliumi contento kashanku

Juj señoran qelqamusqa: “Qayninpallan chaskikamuyku Allinpunin Diosta kasukuyqa nisqa videota, ñan yaqa pisqa chunka kutitaña wawaykunawan kuska qhawaruyku chay videota”, nispa, payqa pisqa wawakunayoqsi. Chay videowan kuskan kashan ñaupaqta lloqsimuq videokunapas.

Milliepas willakullantaqmi imachus pasasqanta, payqa 12 watanpin kashan, Inglaterra nacionpitaqmi tiyan. Turan Thomastaq kashan 15 watanpi, payqa “síndrome de Down” nisqa onqoyniyoqmi. Millien nin: “Turayqa tabletninpin jap’ishan Carlitosmanta videokunata, payqa qhawachillanmi chay videokunata escuelapi compañeronkunaman. Takikunan paymanqa masta gustan, munaychatan takinpas. Juj kutinmi juj hermana uyarisharan takisqanta, jinan payqa waqarunraq takisqanta uyarispa”, nispa.

Avan juj cartata apachimusqa, chaypin nimusqa: “Pusaq wataypi, isqon killaypi, iskay chunka pisqayoq p’unchayniypin kashani. Carlitoswan panachanpiwanqa allin ejemplon wawakunapaq”, nispa.

Mikaylan juj cartata apachimullasqataq, paymi nin: “Soqta wataypin kashani. Gracias Allinpunin Diosta kasukuyqa nisqa videomanta. Chay videon yachachiwan papaytapas mamaytapas kasukunaypaq, chayta ruwaqtiyqa Jehová Diospas kusisqan kanqa”, nispa.

Kusatan yachachin chay videokunaqa

Dibujokunawan videokuna ruwayta yachaq jovenmi qhawasqa Suwakuyqa juchan nisqa videota, chayta qhawaspan payqa, manaña Testigochu chaypas, mayta admirakusqa. Chay videota juj pisi grupo runakunalla ruwasqankuta yachaspan astawanqa admirakusqa. Paymi nin: “Noqaqa reqsinin dibujokunawan videokuna ruwaq runakunata, wakinmi llank’anku jatun empresakunapi wakintaq juch’uykunapi. Chaymi noqaqa niq kani: ‘Imaynachá kanman chaykunapi llank’ay ehh’ nispa. Bueno chaykunapi tukuy ima ruwakusqanpas runakunaq juj rato asirikunallanpaqmi. Qankunaq ruwasqaykichis videokunan ichaqa kusapuni wawakunata educanapaq; chhaynapi imas allin imataqsi mana allinchu chayta yachanankupaq, chayman jina imatapas ruwanankupaqwan. Qankunaqa allintan ruwashankichis. Jujkunatan yanapashankichis”, nispa.

Lliu mundopi tayta-mamakunan contento kashanku chay videokunawan. Juj señoran juj mensajeta apachimullasqataq, paypa wawachanqa kinsa watallanpiraqsi kashan, paymi nin: “Juj kutinmi waway qhawasharan Jehová Dioswan amigontin kasun nisqa videota, jinan payqa, kuskanpi jina video kashaqtin, makichanta qhasqonman churarukuspa: ‘Mamay, kay videoqa sonqoymanmi chayan’ nispa niwan”, nispa.