Kichay leenaykipaq

¿Ima ninmi Biblia terremotokunamanta, lloqllakunamanta, juj desgraciakunamantapas?

¿Ima ninmi Biblia terremotokunamanta, lloqllakunamanta, juj desgraciakunamantapas?

 ¿Imaraykun nisunman: “Terremotokunapas, lloqllakunapas, juj desgraciakunapas manan Diospa castigonchu”, nispa?

Bibliaqa willanmi imaynatachus Dios kamasqankunata utilizaspa jujkunata juzgasqanta. Ichaqa manan igualchu kunan tiempopi pasaq terremotokunawan, lloqllakunawan, juj desgraciakunawanqa. ¿Imaraykun chayta ninchis?

  • Terremotokunapas, lloqllakunapas, juj desgraciakunapas lliu runakunatan sufrichin. Jehová Diosmi ichaqa millay runakunata castiganallanpaq kamasqankunata utilizaran, allin runakunatan ichaqa manan sufrichiranchu. Sodoma llaqtata Gomorra llaqtatawan thunishaspapas Diosqa salvaranmi Lot-ta iskaynin ususinkunatawan. Lotqa allin runan karan (Génesis 19:29, 30). Jehová Diosqa allintan reqsiran chay runakunata, chaymi millay runakunallata wañuchiran (Génesis 18:23-32; 1 Samuel 16:7).

  • Terremotokunapas, lloqllakunapas, juj desgraciakunapas qonqayllan chayamun. Diosmi ichaqa ñaupaqmantaraq willaran kamasqankunata utilizaspa jujkunata castigananpaq. Chaymi pikunachus kasukuqkunaqa mana wañuchisqachu karanku (Génesis 7:1-5; Mateo 24:38, 39).

  • Runakunapas juchayoqmi kanku terremotokunapas, lloqllakunapas, juj desgraciakunapas kananpaqqa. ¿Imarayku? Tiyasqanchis allpata dañota ruwasqankurayku, wasikunata unuq kasqanpi, pachaq chhafchikunan kasqanpi, otaq mana ruwananku kasqanpi jatarichisqanrayku ima (Apocalipsis 11:18). Chaykunamantaqa manan Dioschu juchayoq (Proverbios 19:3).

 Terremotokunapas, lloqllakunapas, juj desgraciakunapas kasqan, ¿rikuchinchu tukukuy p’unchaykunapi tiyasqanchista?

Arí. Bibliapi profeciakunaqa sut’itan willan terremotokuna, lloqllakuna, juj desgraciakunapas kananta. Chaykunaqa kanan karan ‘tiempokuna tukukapunanpaqña kashaqtinmi’ otaq ‘tukukuy p’unchaykunapi’ (Mateo 24:3; 2 Timoteo 3:1). Kay tiempomanta rimaspan Jesusqa niran: “Kayneqpi chayneqpin kanqa yarqaypas terremotokunapas”, nispa (Mateo 24:7). Pisi tiempollamantan Diosqa imakunachus ñak’arichiwanchis chaykunata chinkachipunqa. Terremotokunatapas, lloqllakunatapas, juj desgraciakunatapas chinkachipunqan.

 ¿Imaynatan Dios yanapan terremotokunapi, lloqllakunapi, juj desgraciakunapipas tarikuqkunata?

  • Diosqa Bibliawanmi consolan. Bibliaqa sut’itan willan Diosqa noqanchismanta llakikusqanta, sufriqtinchispas sufrisqanta (Isaías 63:9, NM; 1 Pedro 5:6, 7). Bibliaqa nillantaqmi pisi tiempollamanta Diosninchis terremotokunata, lloqllakunata, juj desgraciakunatapas tukuchinanta (Qhaway “ Terremotokunapi, lloqllakunapi, juj desgraciakunapipas tarikuqkunata consolanapaq Bibliamanta textokuna” nisqata).

  • Diosqa payta serviq runakunatan utilizan consolananpaq. Bibliapi profeciakunan willan Jesusqa ‘llakisqa sonqoyoqkunata kusirichinan’ kasqanta, jinallataq ‘lutopi kaqkunata sonqochanan’ kasqantapas (Isaías 61:1, 2). Chhaynatan kunanpas Jehová Diosta serviq runakunaqa Jesús jina kanankupaq kallpachakunku (Juan 13:15).

    Diosqa serviqnin runakunatan utilizan terremotokunapi, lloqllakunapi, juj desgraciakunapipas tarikuqkuqkunata yanapananpaq (Hechos 11:28-30; Gálatas 6:10).

Jehová Diospa testigonkunan yanapashanku Puerto Rico nacionpi Huracán pasaqtin llakipi tarikuqkunata.

 Terremotokuna, lloqllakuna, juj desgraciakunapas kaqtin preparasqa kananchispaq, ¿yanapawasunmanchu Biblia?

Arí yanapawasunmanmi. Bibliaqa manan terremotokuna, lloqllakuna, juj desgraciakunapas manaraq jamushaqtin listo kananchispaq librochu, chaywanpas yachachikuyninkunaqa yanapawasunmanmi. Ejemplopaq:

  • Manaraq ima desgraciapas jamushaqtin allinta preparakuy. Biblian nin allin yuyayniyoq runaqa mana allin kaqta reparaspa pakakuq kasqanta (Proverbios 22:3). Chhaynaqa manaraq imapas pasashaqtin allinta preparakuy. Familiaykiwan allinta alistay ima desgraciapas pasaqtin imakunatachus necesitawaqchis chayta. Chaymantapas rimanakuychis ima desgraciapas pasaqtin maypichus tupawaqchis chayta. Chay qhepamantaq rimasqaykichisman jina practicaychis.

  • Vidaykin tukuy ima kaqniykikunamantapas aswan valorniyoqqa. Biblian nin: “Manan imatapas kay pachamanqa apamuranchischu, manallataqmi imatapas apasunchu”, nispa (1 Timoteo 6:7, 8). Chhaynaqa, salvakunanchispaqqa liston kashananchis wasinchista kaqninchiskunata saqenanchispaq. Chayraykun yuyarinanchis, vidanchismi tukuy imanchismantapas aswan valorniyoqqa (Mateo 6:25).