Kichay leenaykipaq

Jehová Diospa testigonkuna

Simita akllay quechua (Cusco)

¿Jayk’aqmi Jesusmanta rimaq evangeliokuna qelqakuran?

¿Ima ninmi Biblia?

Apóstol Juanmi Jesuspa kausayninmanta qelqaspa kayta niran: “Tukuy chaykunata rikuqmi kaytaqa willashan, paypa willasqanqa cheqaqmi. Payqa yachanmi imachus willasqanqa cheqaq kasqanta, chhaynapi qankunapas creenaykichispaq”, nispa (Juan 19:35).

Jesuspa vidanmanta willaq librokunaqa confianapaq jinan, chay evangeliokunapi willakusqantaqa askha runakunan rikuranku, paykuna kausashaqtinkuraqmi Mateo, Marcos, Lucas, Juanpas chay evangeliokunataqa qelqaranku. Askha runakunan ninku: “Mateo librotaqa 41 watakunapi jinan qelqakuran”, nispa. Wakintaqmi ninku: “Unay watakuna qhepamanñan qelqakuran”, nispa. Chhaynaña kaqtinpas, yaqa llapallankun acuerdopi kashanku griego rimaypi qelqakunaqa qallariy siglo tukukushaqtin jina tukusqa kasqanta.

Jesuspa kausasqanta, wañusqanta, kausarisqanta ima rikuq runakunaqa repararankun evangeliokunaqa cheqaqtapuni willasqankuta. Imapas evangeliokunapi nisqan mana cheqaqchu kanman karan chayqa ninkumanmi karan. Bibliamanta yachaq Frederick F. Bruce runa nin: “Apostolkunaqa yacharankun runakuna Jesuspa vidanmanta yachasqankuta, chaymi chay confianzawan paykunata predicaspa niranku: ‘Manan noqallaykuchu chaykunamanta testigo kayku, qankunapas yachankichismi’, nispa (Hechos 2:22).