Kichay leenaykipaq

Jehová Diospa testigonkuna

Simita akllay quechua (Cusco)

¿Iman ‘janaq pacha gobierno llavekuna’?

¿Ima ninmi Biblia?

‘Janaq pacha gobierno llavekunaqa’ Pedroq chaskisqan autoridadtan representan, paymi runakunata yanapanman ‘Diospa gobiernonman jaykunankupaq’ (Mateo 16:19; Hechos 14:22). * Jesusmi Pedroman qoran “janaq pacha gobierno llavekunata”. ¿Imaynapi? Pedron autoridadta chaskiran iñiyniyoq runakunaman Diospa siminta willananpaq, chhaynapi santo espiritunta chaskispa janaq pacha gobiernoman jaykunankupaq.

¿Pikunapaqmi Pedro llavekunata utilizaran?

Diosmi Pedroman autoridadta qoran kinsa grupokunaman ñanta kicharinanpaq, chhaynapi Diospa gobiernonman jaykunankupaq.

  1. Judiokunaman judioman tukupuqkunamanwan. Jesuspa wañupusqan qhepallatan Pedro askha judiokunata, jinallataq judioman tukupuqkunata kallpacharan Jesusta Diospa gobiernonpi reyta jina qhawarinankupaq. Willaranmi salvakunankupaq ima ruwanankuta. Chhaynapin ñanta kichariran Diospa gobiernonman jaykunankupaq, chaymi chay p’unchayqa waranqanpi ‘iñiqkunaman yapakuranku’ (Hechos 2:38-41).

  2. Samaria llaqtapi runakunaman. Qhepamanmi Pedroqa Samaria runakunaman willananpaq jujmanta llavekunata utilizaran. * Chaypin paywan apóstol Juanpiwan “Diosmanta mañakuranku iñipuqkuna santo espirituta chaskinankupaq” (Hechos 8:14-17). Chhaynapin Diospa gobiernonman jaykuyta atiranku.

  3. Waj llaqtayoq runakunaman. Jesuspa kinsa wata kuskan wañupusqan qhepatan, Diosqa Pedroman willaran mana judío runakunapas Diospa gobiernonman jaykuy atisqankuta. Chaymi Pedroqa jujmanta llavekunata utilizallarantaq waj llaqtayoq runakunaman predicananpaq. Chhaynapin paykunaqa atiranku cristianoman tukupuspa santo espirituta chaskiyta, jinaspa Diospa gobiernonman jaykuytapas (Hechos 10:30-35, 44, 45).

¿Imamantan rimashan ‘Diospa gobiernonman jaykuy’ nisqa simikuna?

Diospa gobiernonman jaykuqkunaqa Jesuswan kuskan rey kapunku. Biblian willashan paykunaqa ‘tronokunapi tiyaykunankuta’, jinallataq reykuna kaspa “lliu allpa pachata” gobernanankutapas (Lucas 22:29, 30; Apocalipsis 5:9, 10).

Janaq pacha gobierno llavekunamanta pantasqa yachachikuykuna

Pantasqa yachachikuy: Pedron deciden pichus janaq pachaman jaykunqa chayta.

Cheqaq kaq: Bibliaq willasqanman jina, Jusucriston “kausaqkunata wañusqakunatawan juzganqa”, manan Pedrochu (2 Timoteo 4:1, 8; Juan 5:22). Pedro kikinmi Jesusmanta willaran: “Paytan Dios churan kausaqkunata wañusqakunatapas juzgananpaq”, nispa (Hechos 10:34, 42).

Pantasqa yachachikuy: Janaq pachapiqa suyarankun jayk’aqchus Pedro llavekunata utilizanqa chayta decidinanta.

Cheqaq kaq: Jesús Janaq pacha llavekunamanta Pedrota rimapayaspaqa, nillarantaqmi: “Kay pachapi tukuy watasqaykiqa janaq pachapipas watasqallataqmi kanqa, kay pachapi tukuy paskasqaykipas janaq pachapiqa paskasqallataqmi kanqa”, nispa. (Mateo 16:19 Diospa Simin Qelqa). Chay simikunata leespan wakinqa piensanku imatapas Pedro decidiqtinña janaq pachapiqa chayman jina ruwakunanta. Ichaqa griego simipi imayna qelqasqa kasqanmi rikuchin janaq pachapi decidikuqtinña Pedroqa imatapas ruwananta.

Jinaspapas juj partekunapin Bibliapi rikukun Pedroqa llavekuna utilizananpaq Diospa kamachisqanman jina ruwasqanta. Ejemplopaq, kinsa kaq llaveta utilizaspaqa Diospa nisqantan kasukusharan (Hechos 10:19, 20).

^ párr. 3 Mayninpin Biblia “llavemanta” riman pipas autoridadta chaskisqanta representananpaq (Isaías 22:20-22; Apocalipsis 3:7, 8).

^ párr. 7 Samaria runakunaq religionninqa jujniraymi judiokunaq religionninmanta karan, ichaqa Moisespa chaskisqan kamachikuy simimanta wakin yachachikuykunatan kasukuranku.