¿Ima ninmi Biblia?

Arí, Bibliaqa allintan yanapawasunman Diosmanta jamusqanrayku, Diosqa ‘llakisqakunata kallpachaqmi’ (2 Corintios 7:6).

¿Imaynatan llaki onqoywan kaqkunata Dios yanapan?

  • Kallpachaspa. Diosqa kallpatan qowasun problemanchiskunata aguantananchispaq (Filipenses 4:13). Jehová Diosqa uyariwanchispunin mañakusqanchistaqa, chaymi Biblia nin: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin”, nispa (Salmos 34:18). Llakikuypi tarikushaspa “yanapaykuway” niqtinchisqa uyariwasunmi, manaña astawan ima niytapas atisunchu chaypas (Romanos 8:26, 27).

  • Bibliapi kaq ejemplokunawan. Salmos librota qelqaqpas llakikuypi tarikuspan kayta niran: “Señor Diosníy, sinchi llakikuy ukhumantan waqyakamuyki”, nispa. ¿Iman yanaparan chay llaki onqoyta aguantananpaq? Diosqa perdonakuq kasqanta yuyariymi. Chaymi niran: “Señor Diosníy, juchakunatachus yuyashawaq chayqa, ¿pitaq manaqa juchachasqachu kanman? Ichaqa qanmi jucha pampachaykuqqa kanki, qanta manchakunaykupaq”, nispa (Salmos 130:1, 3, 4).

  • Sumaq suyakuykunawan. Diosqa pisi tiempollamantan sufrimientota, llaki onqoykunatapas chinkachipunqa. “Ñaupaq sucedesqankunaqa [llakikuy onqoykunaqa] qonqasqan kapunqa, manañan yuyarisqapasñachu kanqa” (Isaías 65:17).

Willakuy: Jehová Diospa testigonkunaqa confiaykun ima llakikuytapas atipanaykupaq Dios yanapawanankupi, chaymantapas medicokunaq yanapaynintan maskhayku llaki onqoypi tarikuspaqa otaq juj onqoykunawan kaspapas (Marcos 2:17). Ichaqa sapankan decidinan kanqa imawanchus qhaliyananpaq yanapachikunqa chaytaqa.