Askha runakunan manaraq casarakushaspa kuskaña juj wasipi tiyanku. Wakinqa chaytaqa ruwanku “allintachus apanakusaqku icha manachus, kanqachus comprensión icha manachus” nispan, “chayman jina casarakusaqkuchus manachus” nispa. Ichaqa, ¿allinchu kanman chay?

Kaypin yachasunchis kay tapuykunamanta:

•  ¿Imaninmi Biblia?

•  ¿Manaraq casarakushaspa kuska tiyay yanapakunchu casarakunapaq?

•  ¿Yanapakunchu qolqeta juñunapaq?

•  ¿Yanapakunchu allin qosata o allin esposata tarinapaq?

•  ¿Kanmanchu juj aswan allin ruway?

 ¿Imaninmi Biblia?

•   Diospa qhawarisqanman jinaqa, mana casarakuspa warmi-qhari puñuyqa juchan. Chaymi Bibliapi nin: “Qankunaqa ch’uyan kanaykichis, t’aqakunaykichismi qhelli juchamantapas”, nispa (1 Tesalonisenses 4:3; 1 Corintios 6:18). Manaraq casarakuspa tiyaqkuna “tiempowanqa casarakusaqkun” ninkumanña chaypas, chayqa juchan. a Bibliapi kaq kamachikuykunaqa imaymana sasachakuymantan libran manaraq casarakuspa tiyay munaqkunataqa. Jujkaq sasachakuymi kanman wawayoq kay.

•   Jehová Diosmi casado kausaytaqa paqarichirqan. Adanta Evatawan casarachispan nirqan: “Qhariqa taytanta mamantan saqepunqa, jinaspa esposanman jujllachakapunqa, chhaynapitaq iskayninku juj aychalla kapunqaku”, nispa (Génesis 2:24). Chhaynaqa casarakuyqa manan común ruwayllachu, casarakuqqa junt’ananmi casarakuspa promesa ruwasqantaqa, chhaynapin familiaqa kusisqa kausanqa, qaqatan sayanqapas.

 ¿Manaraq casarakushaspa kuska tiyay yanapakunchu casarakunapaq?

 Wakinqa “chhaynan” ninkun. Paykunaq piensasqanman jinaqa, kusisqa kausanapaqqa manaraq casarakuspa kuska tiyaspas preparakuna. Wasipi imaymana ruwanakunata kuska ruwaspas allinta reqsinakuna. Ichaqa warmi-qharipi kusisqa kausanapaqqa kananmi juj compromiso, juj juramento.

 ¿Imaynatan pipas yachanman allin tiempopipas mana allin tiempopipas kuskalla kayta? Mayqen warmi-qharipas pruebapi jinalla kuska tiyashankuman ¿chayri? ¿Atinkumanchu ima llakipas ima sasachakuypas chayamuqtin kuskalla kayta? Manan ¿riki? Warmi-qhari kausayninku allin kananpaqqa kananmi juj compromiso, juj juramento. Arí, juj promesatan ruwananku ima problemapas sasachakuypas kaqtinqa kuskamanta allichanankupaq.

 Chhaynaqa: Mana casarakuspalla tiyayqa manan pitapas casarakunanpaqchu yanapashan, aswanpas t’aqanakunanpaqmi preparashan.

 Bibliapin nin: “Imatachus runaqa tarpunqa chayllatataqmi cosechanqapas”, nispa (Gálatas 6:7).

 ¿Yanapakunchu qolqeta juñunapaq?

 Wakinqa “chhaynan” ninkun. Chaykunamanta estudiaq Estados Unidos nacionpi Pew Research Center organizacionpa nisqanman jinaqa, chunka runamantas tawa qolqeta juñunankurayku mana casarakuspalla tiyanku. Ichaqa tiempoq pasasqanman jinas chay runakunata wakinta tapullasqakutaq, jinas willakusqaku imaynas qolqerayku mana listochu casarakunankupaq kashanku chayta.

 Mana casarakuspalla tiyayqa sasachakuykunatan apamun, astawanqa warmikunapaqmi sasa. ¿Imarayku? T’aqanakapuqtinkuqa warmikunawanmi yaqa llapa wawakunapas qhepakun.

 Chhaynaqa: Mana casarakuspalla tiyayqa aswan sasachakuykunatan apamun.

 Biblian nin: “Noqa Jehová Diosmi Diosniykiqa kani, noqaqa allinniykipaqmi yachachiyki”, nispa (Isaías 48:17).

 ¿Yanapakunchu allin qosata o allin esposata tarinapaq?

 Wakinqa “chhaynan” ninkun. Ichaqa Luche por salvar su matrimonio nisqa libropin nin: “Mana casarakuspalla tiyaq runakunapaqqa aswan sasaraqmi t’aqanakuyqa”, nispa. ¿Imaraykun chay pasanman? Wakin parejakunaqa tiempoq pasasqanman jinan reparanku imaynas mana comprensión kanchu, imaynas mana allintachu apanakunku chayta. Ichaqa ñataq kuskaña tiyashanku chayqa wakin ruwaykunataqa kuskamantañan ruwashanku. Animalkunataña uywanku chaypas alquilertaña pagananku chaypas kuskamantan chayta ruwanku. Mana piensayña wawayoq ima karunku chaypas kuskamantan payta uywanku. Chayraykun manaña facilchu t’aqanakuyqa. Chaymanta rimaspan chaykunata estudiaq wakin runakuna ninku: “Mana piensaymi kuska kausayman yachakapunku”, nispa. b Luche por salvar su matrimonio nisqa libropin nillantaq: “Wakin runakunaqa t’aqanakunankumantaqa casarakapullankuñan, chay ruwaymi fácil paykunapaq”, nispa.

 Chhaynaqa: Manaraq casarakuspa tiyayqa allin qosata allin esposata ajllakunaykipaq yanapanasuykimantaqa aswan sasachakuymanmi churasunkiman.

 Bibliapin nin: “Allin yuyayniyoqqa mana allin kaqtan reparan, jinaspan pakakun; mana yuyayniyoqkunan ichaqa pasallanku jinaspa ñak’ariypi tarikunku”, nispa (Proverbios 22:3).

 ¿Kanmanchu juj aswan allin ruway?

 Mana casarakuspalla tiyaspa imaymana sasachakuypi tarikunaykimantaqa atiwaqmi casarakuspa kusisqa kausayta. ¿Iman chaypaq yanapasunkiman? Chaypaqqa Bibliapi casarakuymanta kamachikuykunatan kasukunayki. Chaymantapas allintan reqsinayki piwanchus casarakuyta munanki chay runata, chaytaqa ruwanayki manaraq paywan tiyashaspan. Piwanchus casarakuyta munanki chay runapiqa manan uyallantachu ni cuerpollantachu qhawanayki, aswanpas qan jina allin kausayniyoqchus, qan jinachus Diostapas respetan chaykunatan qhawarinayki.

 Bibliapin imaymana yachachikuykunata tarinki casarakuspa kusisqa kausanaykipaq. c Chaykunan yanapasunki…

•   esposaykita o qosaykita mana jayk’aq tracionanaykipaq.

•   allin qosa, allin esposa kanaykipaq.

•   reqsinakushaspa allinta imatapas reparanaykipaq. Chaypaq qhaway detector las señales de alarma durante el noviazgo nisqata.

 Chaykunamanta astawan yachayta munanki chayqa “Casarasqakunapaq familiakunapaqwan” nisqa yachachikuyta qhaway jw.org paginapi.

 Bibliapin nin: “Diospa simin qelqapi qelqasqa kaqqa llapanmi Diospa yuyaychasqan, chaymi chaykunaqa allinpuni yachachinapaq”, nispa (2 Timoteo 3:16).