Silviaqa enfermeran, paymi nin: “Universidadpi kashaqtiyqa askha runakunan religionniyoq kaqku, ichaqa drogakuqkun, examenkunapipas copiakuqkun, kawsayninkupiqa manan rikuchiqkuchu religionniyoq kasqankuta”, nispa.

Luispas nillantaqmi: “Compañeroykunaqa llullakuspan ‘onqosqan kashani’ nispa llank’anankuman mana hamuqkuchu. Runakunaq rikunallanpaqmi religionniyoq kaqku, kawsayninkupitaqmi mana rikuchiqkuchu”, nispa.

Runakunataqa manan religionninku yanapanchu allinta kawsanankupaq. ‘Dios sonqo runamanmi rikch’akunku, kawsayninkuwantaqmi ichaqa Dios sonqo-kaytapas “manan valenchu” ninku’ (2 Timoteo 3:5). Religionpi umalliqkunaqa mana allinkunatan ruwanku, manan allintachu Bibliamantapas yachachinku, chhaynapin runakunata mana yanapankuchu allinta kawsanankupaq. Chayraykun askha runakuna ninku: “Diosmanqa manan imapas qokunchu kawsayninchisqa”, nispa.

Bibliaqa sut’itan willan Diosqa sienteq kasqanta, imayna kawsasqanchisqa paytan kusichinman otaq llakichinmanpas. Israel runakunaqa mana kasukusqankuwanmi sapa kuti “¡chay ch’inneq cheqaspi payta llakichirqanku!” (Salmo 78:40). Ichaqa ancha kusikuymi ‘hanaq pachapiqa’ kan pipas cheqaqtapuni huchanmanta kutirikuspa kawsayninta cambiaqtinqa (Lucas 15:7). Diosta reqsispaqa astawanmi payta munakusun, chay munakuytaqmi yanapawasun allin kaqta pay hina munakunapaq, mana allin kaqtataq cheqnikunapaq (Amós 5:15).

Estados Unidospin huk periódico nirqan: “Jehová Diospa testigonkunaqa runakunatan yanapanku familiapi allinta kawsanankupaq, allin llank’aq, allin runa kanankupaq”, nispa. Nillantaqmi: “Paykunaqa allin kawsayniyoq kasqankutan rikuchinku cigarrota mana pitaspa, mana machaspa, mana drogakuspa, mana qolqepaq p’ukllaspa, mana qhelli huchakunapi purispa, mana warmipura otaq qharipura puñuspa, mana chayqa Dios serviyninkutan hark’anman”, nispa.

¿Imapin Testigokunata yanaparqan Diosta allinta reqsisqanku? Silvian nin: “Yuyaq onqosqa runakunata cuidanapaq llank’asqankupiqa suwakunkun. Chay ruwasqankuqa munapayanapaq hinan. Ichaqa imaynatachus Jehová Dios suwakuyta qhawarisqanta yachasqaymi yanapawan chayta mana ruwanaypaq. Chhaynapin kusisqa thak tarikuni”, nispa. Silviataqa religionninmi yanaparqan allinta kawsananpaq.